អស់ទាស់! ទឹកដីចិនអាចក្លាយជាទីតាំងប៉ះគ្នារវាងក្រុម Ronaldo និង Messi ដើមឆ្នាំក្រោយ
អន្តរជាតិ ៖ កំពូលខ្សែប្រយុទ្ធព័រទុយហ្គាល់ Cristiano Ronaldo និងកំពូលខ្សែប្រយុទ្ធអាហ្សង់ទីន Lionel
អន្តរជាតិ ៖ កំពូលខ្សែប្រយុទ្ធព័រទុយហ្គាល់ Cristiano Ronaldo និងកំពូលខ្សែប្រយុទ្ធអាហ្សង់ទីន Lionel Messi អាចនឹងប៉ះគ្នាលើទីលានប្រកួតសារជាថ្មីម្តងទៀត នៅក្នុងការប្រកួតលក្ខណៈមិត្តភាពរវាងក្រុម Al-Nassr នៃលីគកំពូលអារ៉ាប៊ីសាអូឌីត នឹងក្រុម Inter Miami នៃលីគកំពូលសហរដ្ឋអាមេរិក នៅដើមឆ្នាំក្រោយ។ នេះបើយោងតាមប្រភពពី Marca និង Pubity ចេញផ្សាយកាលពីពេលថ្មីៗនេះ។
ដំណឹងដ៏ភ្ញាក់ផ្អើលនេះ បានផ្ទុះឡើងកាលពីពេលថ្មីៗនេះ បន្ទាប់ពីខ្សែប្រយុទ្ធ Lionel Messi បានខកខានជួយក្រុម Inter Miami សម្រាប់ការប្រកួតវគ្គផ្តាច់ព្រ័ត្រពានរង្វាន់ US Open Cup នៅពេលដែលក្រុមខ្លួនបានចាញ់ក្រុម Houston Dynamo ដោយលទ្ធផល ២-១ កាលពីថ្ងៃទី២៧ ខែកញ្ញា ឆ្នាំ២០២៣ ដោយសារបញ្ហារបួស។
របាយការណ៍ពីអ្នកកាសែតអារ៉ាប៊ីសាអូឌីតម្នាក់ បានបង្ហើបថា ក្រុមហ៊ុនទីផ្សារអន្តរជាតិដ៏ធំមួយ ដែលមិនត្រូវបានបញ្ចេញឈ្មោះ កំពុងជំរុញឱ្យរៀបចំការប្រកួតមិត្តភាពរវាងក្រុមរបស់ Lionel Messi នឹងក្រុមរបស់ Cristiano Ronaldo ដោយជំនួបដ៏កក្រើកនេះ គ្រោងនឹងឡើងនៅក្នុងប្រទេសចិន នាខែមករា ឆ្នាំក្រោយ។
ប្រភពដដែលបន្ថែមថា ក្រុម Al-Nassr ទទួលបានការអញ្ជើញរួចហើយ នៅឡើយតែការពិភាក្សាបន្ថែមទៀតជាមួយក្រុម Inter Miami ខណៈដែលអ្នកគាំទ្រនៅទូទាំងពិភពលោក កំពុងទន្ទឹមរង់ចាំព័ត៌មានបន្ថែមដោយភាពរំភើប នៃការបានឃើញម្ចាស់ជើងឯកពានរង្វាន់ World Cup ឆ្នាំ ២០២២ និងម្ចាស់ជើងឯកពានរង្វាន់ Euro ឆ្នាំ ២០១៦ តទល់នឹងគ្នាសារជាថ្មីម្តងទៀតនៅលើទីលានប្រកួត។
សូមជម្រាបថា ការជួបគ្នាចុងក្រោយរវាង Lionel Messi ម្ចាស់ពានរង្វាន់ Ballon d’Or ៧សម័យកាល និង Cristiano Ronaldo ម្ចាស់ពានរង្វាន់ Ballon d’Or ៥សម័យកាល កើតឡើងកាលពីខែមករា ដើមឆ្នាំនេះ ពោលគឺក្នុងការប្រកួតមិត្តភាពរវាង PSG គ្រាដែល Messi ប្រកបអាជីពនៅបារាំង តទល់នឹងក្រុម All Star ដែលត្រូវបានជ្រើសរើសចេញពីក្រុម Al-Nassr និងក្រុម Al-Hilal នៅទីក្រុង Riyadh នៃទឹកដីអារ៉ាប៊ីសាអូឌីត បញ្ចប់ទៅដោយ PSG យកឈ្នះលទ្ធផល ៥-៤ ។
រង់ចាំមើលទាំងអស់គ្នាថា តើជំនួបដ៏កក្រើកពិភពបាល់ទាត់រវាងកំពូលកីឡាករទាំងពីររបស់ពិភពលោក អាចនឹងកើតឡើងដែរឬទេ? ខណៈអ្នកគាំទ្រនៅជុំវិញពិភពលោកកំពុងរង់ចាំលទ្ធផលចុងក្រោយនៃដំណឹងនេះ៕ (ប្រភពពី Marca និង Pubity)
ចែករំលែកព័តមាននេះ