- ភ្នំពេញ
បើមើលតួរលេខនៃការដំឡើងនេះ សម្រាប់កម្មករ និងកម្មការិនីម្នាក់ឡើងតែ៤ដុល្លារនោះទេ។ នេះគឺចំនួនតិច ហើយកម្មករខ្លះយល់ថា មិនគ្រប់គ្រាន់សម្រាប់ការរស់នៅរបស់គាត់។ ប៉ុន្តែសម្រាប់រោងចក្រឧស្សាហកម្មមួយ
បើមើលតួរលេខនៃការដំឡើងនេះ សម្រាប់កម្មករ និងកម្មការិនីម្នាក់ឡើងតែ៤ដុល្លារនោះទេ។ នេះគឺចំនួនតិច ហើយកម្មករខ្លះយល់ថា មិនគ្រប់គ្រាន់សម្រាប់ការរស់នៅរបស់គាត់។ ប៉ុន្តែសម្រាប់រោងចក្រឧស្សាហកម្មមួយ បន្ទុកពិតជាមិនធម្មតានោះប៉ុន្មានទេ ដោយនៅក្នុងមួយរោងចក្រៗ មួយខែៗ គឺត្រូវរ៉ាប់រងមិនតិចម៉ឺនដុល្លារនោះឡើយ។
តួលេខ៤ដុល្លារ គឺតិច និងមិនជួយច្រើនដល់កម្មករឡើយ ដោយសារការចំណាយក្នុងការរស់នៅកាន់តែខ្ពស់។ ប៉ុន្តែទាំងកម្មករ និងរោងចក្រ គឺស្ថិតក្នុងស្ថានភាពលំបាកដូចគ្នា។
នៅក្នុងលក្ខខណ្ឌសេដ្ឋកិច្ច ស្ថិតនៅក្នុងស្ថានភាពស្រពិចស្រពិលបែបនេះ ការសម្រេចចិត្តរបស់រាជរដ្ឋាភិបាលតាមរយៈយន្តការនៃការបោះឆ្នោតរបស់ក្រុមប្រឹក្សាប្រាក់ឈ្នួលអប្បបរមា និងការអាកាត់របស់នាយករដ្ឋមន្ត្រី គឺការសម្រេចចិត្តមួយដ៏លំបាក ដ្បិតបងប្អូនកម្មករ និងកម្មការិនីនៅពេលនេះ ពិតជាត្រូវការថវិការច្រើន ដើម្បីលំនឹងជីវភាពរស់នៅប្រចាំថ្ងៃ។
តាមការព្យាករអំពីកំណើនសេដ្ឋកិច្ចកម្ពុជា ដែលធ្វើឡើងដោយធនាគារអភិវឌ្ឈន៍អាស៊ី បានឲ្យដឹងថា ការនាំចេញសម្លៀកបំពាក់ ស្បែកជើង និងទំនិញធ្វើដំណើរ គឺបានធ្លាក់ចុះ រហូតដល់ទៅ ១៨,៦ ភាគរយឯណោះកាលពីឆមាសទី១ នៃឆ្នាំ២០២៣ នេះ ហើយដោយសារតែការធ្លាក់ចុះនេះហើយ ទើបបានទាញទម្លាក់ការព្យាករណ៍កំណើនសេដ្ឋកិច្ចពី៥,៥ ភាគរយ មកនៅ ៥,៣ភាគរយវិញ ។
ការព្យាករណ៍ដែលចេញផ្សាយតាមរបាយការណ៍ទស្សនវិស័យអភិវឌ្ឍន៍អាស៊ី (ADO) ខែកញ្ញា ឆ្នាំ២០២៣ បានកត់សម្គាល់ថា បើកុំតែបានការប៉ះប៉ូវមួយផ្នែកដោយកំណើនជិត២៣ភាគរយ នៃការនាំចេញផលិតផលកាម្មន្តសាលក្រៅពីវិស័យកាត់ដេរ មានជាអាទិ៍ គ្រឿងបន្លាស់រថយន្ត បន្ទះស្រូបពន្លឺព្រះអាទិត្យ និងគ្រឿងសង្ហារឹមនោះទេ កុំអីមិនដឹងកំណើន សេដ្ឋកិច្ចកម្ពុជាធ្លាក់ដល់ណានោះទេ ។
នៅពេលនេះ ដោយសារតែរោងចក្រមួយចំនួនមានបញ្ហារឿងការបញ្ជាទិញ រោងចក្រមួយ ចំនួនត្រូវបានព្យួរការងារ ហើយរោងចក្រមួយចំនួនឱ្យកម្មករ និងកម្មការិនីចែកវេនគ្នាធ្វើការ ខណៈពេលដែលវិស័យទេសចរណ៍កើន ប៉ុន្តែនៅក្នុងកំណើនមួយនៅក្នុងសន្ទុះ មិនខ្លាំងក្លាឡើយ ។
បើតាមលោក ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈក្រៅ ពីប្រាក់ខែគោលនេះ កម្មករក៏នៅបន្តទទួលបានប្រាក់អត្ថប្រយោជន៍ផ្សេងៗថែមទៀតដដែល ដូចជាប្រាក់រង្វាន់១០ដុល្លារសម្រាប់អ្នកដែលធ្វើការទៀងទាត់ និង៧ដុល្លារនៅក្នុងមួយខែ សម្រាប់ថ្លៃដឹកជញ្ជូនផ្សេងៗទៀត ។
ពាក់ព័ន្ធនឹងបញ្ហាប្រាក់បៀវត្សអប្បបរមារបស់កម្មករ និងកម្មការិនីរោងចក្រនេះ សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានលើកឡើងថា លោកបានតាមដានយ៉ាងយកចិត្តទុកដាក់លើការពិភាក្សាប្រាក់ឈ្នួលអប្បបរមានេះ តាំងពីពេលចាប់ផ្តើម ហើយការសម្រេចនេះជាការជួយលើកកម្ពស់ជីវភាពរស់នៅរបស់ប្រជាពលរដ្ឋ ដែលជាអាទិភាពខ្ពស់បំផុតរបស់រាជរដ្ឋាភិបាល។
សម្តេចធិបតី បានបន្តថា លោកនឹងបន្តជំរុញដល់ក្រសួង ស្ថាប័ន អាជ្ញាធរពាក់ព័ន្ធពិនិត្យ តាមដាន និងដាក់វិធានការបន្ថែម ដើម្បីពិនិត្យលទ្ធភាពកាត់បន្ថយបន្ទុកចំណាយរបស់បងប្អូនកម្មករ និយោជិត។ ទន្ទឹមនឹងនេះ លោកក៏នឹងដឹកនាំកិច្ចប្រជុំជាមួយវិស័យឯកជនមួយ នៅខែវិច្ឆិកា ខាងមុខ ដើម្បីកែលម្អបរិយាកាសវិនិយោគ និងការធ្វើធុរកិច្ចនៅកម្ពុជា សំដៅបង្កើនភាពប្រកួតប្រជែង និងទាក់ទាញទុនវិនិយោគបន្ថែម និងបង្កើតការងារថ្មីៗជូនប្រជាពលរដ្ឋ។
នៅក្នុងស្ថានភាពសេដ្ឋកិច្ចបែបនេះ នេះគឺជាលទ្ធផលនៃការយកចិត្តទុកដាក់របស់រាជរដ្ឋាភិបាលកម្ពុជា ហើយថ្វីដ្បិតតែប្រាក់ដំឡើងងនេះវាមិនច្រើន ប៉ុន្តែនៅពេលដែលគេដឹងថា អ្នកដែលទទួលអត្ថប្រយោជន៍ពីការសម្រេចនេះ មានប្រមាណជា ៨០០.០០០ នាក់ ដែលកំពុងតែបម្រើការនៅក្នុងរោងចក្រសរុប ១.០៧៧ រោងចក្រ នៅក្នុងនោះរោងចក្រកាត់ដេរមានជាង៨០០កន្លែង ស្បែកជើងមាន១៤០រោងចក្រ និងរោងចក្រផលិតទំនិញធ្វើដំណើរមានជាង១៣០រោងចក្រ ដូច្នេះសរុបទៅគ្រាន់តែមួយខែ រោងចក្រទាំងនោះត្រូវរ៉ាប់រងបន្ទុកចំណាយរហូតដល់ទៅជាង៣,២លានដុល្លារឯណោះ ។
សរុបសេចក្តីទៅនៅក្នុងស្ថានភាពបែបនេះ បងប្អូនកម្មករ និងកម្មការនីរោងចក្រ ក៏គួរយល់ចំណុច និងការលំបាកនេះ ហើយគួរតែពុះពារបំពេញការងារអោយអស់ពីសមត្ថភាព ។ នៅក្នុងស្ថានភាពនេះ យើងកំពុងតែស្ថិតនៅក្នុងសំពាធនៃបញ្ហា ហើយបើសិនជាយើងមិនខំនោះទេ វិស័យដែលជាឆ្នាំងបាយយើងទាំងអស់គ្នាអាចនឹងធ្លាក់ចុះថែមទៀត ៕ ដោយ ៖ ហេង ចេស្តារ
ចែករំលែកព័តមាននេះ