ជំនន់ទឹកភ្លៀងកំពុងជន់លិចស្រុក-ក្រុងមួយចំនួននៅខេត្តពោធិ៍សាត់ ក្រោយភ្លៀងធ្លាក់ជាប់ៗគ្នា
- ពោធិ៍សាត់
ខេត្តពោធិ៍សាត៖ ប៉ុន្មានថ្ងៃនេះ ភ្លៀងបានធ្លាក់ជាប់ៗគ្នា ទាំងយប់ទាំងថ្ងៃ នៅតំបន់ភ្នំក្នុងភូមិ
ខេត្តពោធិ៍សាត៖ ប៉ុន្មានថ្ងៃនេះ ភ្លៀងបានធ្លាក់ជាប់ៗគ្នា ទាំងយប់ទាំងថ្ងៃ នៅតំបន់ភ្នំក្នុងភូមិសាស្ត្រស្រុកវាលវែង ធ្វើឲ្យថ្ងៃទី២៨ខែកញ្ញាឆ្នាំ២០២៣ បង្កជាទឹកជំនន់ ជន់លិចផ្ទះសម្បែង ផលដំណាំប្រជាពលរដ្ឋ ផ្លូវជាតិលេខ៥៥តាមកន្លែងមួយចំនួន ក្នុងភូមិសាស្ត្រស្រុកវាលវែងនិងស្រុកភ្នំក្រវាញ ត្រូវទឹកលិចមិនអាចធ្វើដំណើរទៅមកបាន។
នៅវេលាម៉ោង៣និងម៉ោង៤ទៀបភ្លឺឈានចូលថ្ងៃទី២៩ កញ្ញា នេះ ខណៈពេលដែលស្រុកវាលវែងនិងស្រុកភ្នំក្រវាញចាប់ផ្ដើមស្រកបន្តិចហើយនោះ ទឹកជំនន់បានសម្រុកមកជន់លិចក្នុងទីប្រជុំជនក្រុងពោធិ៍សាត់ និងស្រុកកណ្ដៀងយ៉ាងសន្ធាប់បំផុត ព្រមទាំងបានកាត់ផ្ដាច់ផ្លូវនៅឃុំវាល និងបំផ្លាញហេដ្ឋារចនាសម្ព័ន្ធមួយចំនួនទៀត។
ស្ថិតក្នុងស្ថានភាពបែបនេះ លោក ខូយ រីដា អភិបាលនៃគណៈអភិបាលខេត្តពោធិ៍សាត់ បានដឹកនាំកម្លាំងចុះត្រួតពិនិត្យស្ថានភាពទឹកជំនន់ ទាំងថ្ងៃទាំងយប់តាំងពីថ្ងៃទី២៨មក ដើម្បីជួយអន្តរាគមន៍ប្រជាពលរដ្ឋដែលងាយរងគ្រោះ។ ថ្ងៃទី២៩នេះទឹកកំពុងហក់ឡើងខ្លាំងមែនទែន លោកអភិបាលខេត្តបានចលនាកម្លាំងចម្រុះនិងកម្លាំងយុវជន ដើម្បីគ្រប់គ្រងសភាពការណ៍នេះ។
លោកអភិបាលខេត្ត សូមឲ្យអាជ្ញាធរក្រុងស្រុកឃុំសង្កាត់គ្រប់លំដាប់ថ្នាក់ និងប្រជាជនទូទាំងខេត្តពោធិ៍សាត់ ពិសេសប្រជាពលរដ្ឋដែលរស់នៅតាមដងស្ទឹងពោធិ៍សាត់ សូមបង្កើនការប្រុងប្រយ័ត្នខ្ពស់ ដើម្បីជៀសវាងនូវគ្រោះថ្នាក់ផ្សេងៗ ដែលអាចកើតមានឡើងដោយយថាហេតុ និងត្រៀមរកទីទួលសុវត្ថិភាព សម្រាប់ជម្លៀសប្រជាពលរដ្ឋដែលងាយរងគ្រោះ។
មន្ត្រីជំនាញមន្ទីរធនធានទឹកនិងឧតុនិយមខេត្តពោធិ៍សាត់បានប្រាប់ឲ្យដឹងថា ស្ថានភាពទឹកស្ទឹងពោធិ៍សាត់នៅថ្ងៃទី២៩ កញ្ញានេះ កម្ពស់ទឹកបានកើនឡើងដល់កម្រិតដែលត្រូវប្រកាសអាសន្ន(៥ម)។ ទឹកជំនន់នេះបង្កឡើងដោយសារភ្លៀងធ្លាក់ប៉ុន្មានថ្ងៃជាប់ៗគ្នានៅតំបន់ជួរភ្នំក្រវាញ រួចហើយបានហូរតាមស្ទឹងអារ៉ៃ ស្ទឹងព្រៃខ្លុង មកប្រសព្វជាមួយស្ទឹងពោធិ៍សាត់បង្កជាទឹកជំនន់តែម្ដង។
សូមបងប្អូនមានការប្រុងប្រយ័ត្នជាប់ជានិច្ច ព្រោះតំបន់ភ្នំនៅតែមានភ្លៀងធ្លាក់ជាបន្តបន្ទាប់។ នៅពេលនេះយើងមិនទាន់ដឹងថា ទឹកជំនន់បង្កគ្រោះថ្នាក់ ឬបំផ្លាញអ្វីខ្លះនោះទេ ព្រោះទឹកកំពុងតែជន់ឡើង ៕
ចែករំលែកព័តមាននេះ