ADផ្ទាំងផ្សព្វផ្សាយពាណិជ្ជកម្ម

ប្រមុខណាតូថ្លែងថាអ៊ុយក្រែនវា.យ.ដ.ណ្ដើ.មបានមកវិញជាបណ្ដើរៗនូវតំបន់កា.ន់.កា.ប់របស់រុស្ស៊ី

1 ឆ្នាំ មុន

២៩ ខែ កញ្ញា ឆ្នាំ ២០២៣ ម៉ោង ០៥:១៥

អគ្គលេខាធិការអង្គការណាតូ លោកស្តុលថឹនបឺក (Stoltenberg) នៅក្នុងដំណើរទស្សនកិច្ចដែលមិនប្រកាសឱ្យដឹងទុកជាមុនទៅកាន់ទីក្រុងកៀវកាលពីពេលថ្មីៗនេះ លោកបញ្ជាក់ថាយុទ្ធនាការរបស់អ៊ុយក្រែនដែលវាយបកទៅលើមូលដ្ឋានរបស់កងទ័ពរុស្ស៊ីអាចទទួលបានផ្លែផ្កាជាបណ្ដើរៗ។ ក្នុងនោះ ពួកគេដណ្ដើមបានទឹកដី១ចំណែកពីកណ្ដាប់ដៃរបស់រុស្ស៊ី។

ថ្លែងនៅឯសន្និសីទកាសែតរួមគ្នាជាមួយប្រមុខដឹកនាំអ៊ុយក្រែន អគ្គលេខាធិការរូបនេះយល់ថាទោះបីអ៊ុយក្រែនវាយយកបានចំណែកដីតិច ឬច្រើន សូម្បីតែ១ម៉ែត្រ ឬ២ម៉ែត្រក៏ដោយ ឱ្យតែអាចវាយយកបានមានន័យថារុស្ស៊ីបាត់បង់ទីតាំងឈរជើងរបស់ខ្លួន។ លោកយល់ថាទិដ្ឋភាពនៃការតស៊ូនៅក្នុងសង្គ្រាមនេះមានភាពផ្ទុយគ្នារវាងរុស្ស៊ី និងអ៊ុយក្រែន។ អ៊ុយក្រែនច្បាំងដើម្បីការរស់រានមានជីវិតនៃក្រុមគ្រួសាររបស់គេ ដើម្បីជោគវាសនាអនាគតរបស់គេ និងដើម្បីសិទ្ធិសេរីភាពរបស់គេ។

ចំណែករុស្ស៊ីច្បាំងដើម្បីបម្រើឱ្យចិត្តវង្វេងដែលចង់ត្រួតត្រាគេ។ លោកហ្សេលែនស្គីសង្កត់ធ្ងន់ថាអ៊ុយក្រែនត្រូវការជាចាំបាច់នូវខែលការពារដែនអាកាសដើម្បីទប់ទល់នឹងការវាយប្រហាររបស់រុស្ស៊ី។ លោកថ្លែងថាទីក្រុងម៉ូស្គូបានប្រើប្រាស់យន្តហោះដ្រូនម៉ាកសាហ៊ីដ (Shahed)ដែលផលិតនៅប្រទេសអ៊ីរ៉ង់ចំនួន៤០គ្រឿងដើម្បីវាយប្រហារទៅលើអ៊ុយក្រែនកាលពីយប់មុន។

ការវាយប្រហារនេះកើតឡើងសឹងតែឥតលស់យប់ណាទេ ហើយធ្វើឱ្យប៉ះពាល់យ៉ាងខ្លាំងចំពោះជីវិតរស់នៅរបស់ជនស៊ីវិលអ៊ុយក្រែន, ទីក្រុងតូច-ធំ និងកំពង់ផែសម្រាប់ដឹកជញ្ជូនស្បៀងអាហារទៅកាន់ទីផ្សារពិភពលោក។ យើងត្រូវការជាចាំបាច់នូវការដាក់សម្ពាធកាន់តែខ្លាំងទៅលើប្រទេសរុស្ស៊ី និងត្រូវការបង្កើនសមត្ថភាពការពារដែនអាកាសរបស់យើង។

លោកស្តុលថឹនបឺកថ្លែងថាលោកតែងតែជំរុញឱ្យសម្ព័ន្ធមិត្តនៅក្នុងអង្គការណាតូឧបត្ថម្ភគាំទ្របន្ថែមទៀតសម្រាប់អ៊ុយក្រែន និងពន្លឿនការដឹកជញ្ជូនជំនួយឱ្យបានឆាប់រហ័សរួមទាំងប្រព័ន្ធការពារដែនអាកាសផងដែរ។ លោកប្រកាសថាណាតូបានចុះកិច្ចសន្យាជាមួយក្រុមហ៊ុនផលិតអាវុធនានាជាមួយនឹងទឹកប្រាក់ជាង២ពាន់ ៥រយលានដុល្លារដើម្បីទិញគ្រាប់កាំភ្លើង។

លោកថ្លែងថាតាមរយៈកិច្ចសន្យានេះ, ណាតូអាចដាក់ជំនួសនូវគ្រាប់កាំភ្លើងដែលបានប្រើរលស់អស់ពីឃ្លាំង ហើយក៏អាចលៃទុក១ផ្នែកសម្រាប់អ៊ុយក្រែន។ លោកប្រកាសថ្កោលទោសការវាយប្រហារពីសំណាក់កងទ័ពរុស្ស៊ីថ្មីៗនេះទៅលើតំបន់ព្រំដែនរវាងអ៊ុយក្រែន និងរ៉ូម៉ានីដែលជាប្រទេសសមាជិកអង្គការណាតូ។ លោកមិនទាន់មានភស្តុតាងបញ្ជាក់ថារុស្ស៊ីធ្វើនេះដោយចេតនា ឬយ៉ាងណាទេ។ ប៉ុន្តែយ៉ាងហោចណាស់លោកចាត់ទុកថានេះជាទង្វើធ្វេសប្រហែស និងបង្កអស្ថិរភាព៕

ប្រភព៖ Reuters
https://www.reuters.com/world/europe/ukrainian-forces-are-gradually-gaining-ground-nato-chief-says-2023-09-28/#:~:text=KYIV%2C%20Sept%2028%20(Reuters),their%20counteroffensive%20against%20Russian%20forces