ខេត្តបាត់ដំបង៖ អ្នកគ្រូបង្រៀនម្នាក់ បានបង្ហោះសារលើហ្វេសប៊ុក បង្ហាញពីផ្លូវលំដ៏លំបាកមួយ ទៅកាន់សាលា ក្នុងភូមិ​ព្រែកត្រប់ ឃុំព្រែកនរិន្ទ ស្រុកឯកភ្នំ។ អ្នកគ្រូ លើកឡើងថា «ចង់ឱ្យ​មេភូមិ មេឃុំ… ជិះម៉ូតូ មកបង្រៀន​ជាមួយខ្ញុំម្តង។ មើលហាក់មិនពិបាក តែការពិត ពិតជាពិបាក។ ប្រជាជនរអ៊ូ ជាង ១០ឆ្នាំហើយ។ ហ៊ឹម!!! ស្រុកខ្ញុំ ពេលជិះម្តងៗ សឹងតែបក​ក្រោយទៅផ្ទះវិញ តែដើម្បីសិស្ស គឺត្រូវតែទៅមុខ ទោះត្រូវរអិលដួលយ៉ាងណាក៏ដោយ ពេលខ្លះ លួចយំ ហើយក៏លួច… តិចៗដែរ។ ទេវតាអើយ សុំផ្លូវ ១ខ្សែមក ពិបាកជិះទៅបង្រៀនខ្លាំងណាស់!»។

ចំពោះការបង្ហោះសារដូច្នេះ ត្រូវបាន​មន្ទីរសាធារណការ និងដឹកជញ្ជូន​ ខេត្តបាត់ដំបង បានចេញ​សេចក្តី​ស្រាយ​បំភ្លឺ ដោយលើកឡើងថា «យោងតាមការព្យាករអាកាសធាតុ មានប្រព័ន្ធ​សម្ពាធទាបមួយ បានកើតឡើង អូសកាត់លើព្រះរាជាណាចក្រ​កម្ពុជា ដែលធ្វើឱ្យ​មានភ្លៀងធ្លាក់​ជោគជាំស្ទើរពេញ​ផ្ទៃប្រទេស ក្នុងនោះ ខេត្តបាត់ដំបង ក៏មានភ្លៀងធ្លាក់ជាបន្តបន្ទាប់ដែរ ដែលធ្វើឱ្យ​ក្រុមការងារពិបាកក្នុងការជួសជុលអំឡុងពេលនេះ។ ក្រុមការងារមន្ទីរ នឹងចុះទៅធ្វើការជួសជុល ក្នុងពេលឆាប់ៗនេះ បន្ទាប់ពីអាកាសធាតុអំណោយផល»។

ចំណែក​រដ្ឋបាលឃុំ​ព្រែកនរិន្ទ បានប្រកាសតាមហ្វេសប៊ុក ឆ្លើយតបនឹងការប្រកាសបែរបន់​របស់អ្នកគ្រូថា «បានដឹងពីសុខទុក្ខរបស់ប្រជាពលរដ្ឋ ពីព្រោះថា ការអភិវឌ្ឍផ្លូវនេះ មិនមានតែមួយកន្លែងទេ យើងបានច្រើនមកហើយ នៅកន្លែង ដែលពិបាកជាច្រើនទៀត យើងបានធ្វើជាបណ្តើរៗហើយ​។ ហើយក៏មិនបានទុកបងប្អូនចោលដែរ ដោយសារតែកញ្ចប់ថវិការបស់ឃុំមានចំនួនកំណត់មិនអាចធ្វើបានទាំងព្រម​នោះទេ​»។

រដ្ឋបាលឃុំព្រែកនរិន្ទ បន្តថា «ដូច្នេះមានតែការសូមយោគយល់អធ្យាស្រ័យពីបងប្អូន​យើងទាំងអស់ក្នុងឃុំ សូមមានការយោគយល់ ហើយម្យ៉ាងវិញទៀត រាំងភ្លៀងស្ងួតដីបន្តិច រដ្ឋបាលបាល​ឃុំ-ស្រុក-ខេត្ត នឹងចាក់គ្រួស បង្ហាប់ជូនបងប្អូនប្រើប្រាស់បណ្តោះអាសន្នសិន។ មានផ្លូវជាច្រើន ដែលលំបាកជាងនេះ ប៉ុន្តែយើងបានដោះស្រាយជូនបងប្អូនបានរួចរាល់​បណ្តើរហើយដែរ»៕