ទីក្រុងឥស្លាមម៉ាបាដ៖ ប្រទេសប៉ាគីស្ថានសម្រេចចិត្តបិទសាលារៀនជាង៥ម៉ឺនកន្លែងចាប់ពីថ្ងៃនេះរហូតដល់ចុងសប្ដាហ៍ដើម្បីទប់ស្កាត់ការឆ្លងរាលដាលនៃជំងឺភ្នែក១ប្រភេទ។ សិស្សរាប់លាននាក់ត្រូវស្នាក់នៅក្នុងផ្ទះបន្ទាប់ពីខេត្តផានជេប (Punjab) ដែលមានមនុស្សរស់នៅច្រើនជាងគេ ប្រកាសពីការផ្ទុះជំងឺភ្នែកដែលឆ្លងទៅមនុស្សជាង៣សែននាក់ចាប់ពីដើមឆ្នាំ២០២៣។
ជំងឺភ្នែកដែលកំពុងផ្ទុះឡើងខ្លាំងនៅប្រទេសប៉ាគីស្ថាននេះបណ្ដាលឱ្យអ្នកជំងឺឡើងក្រហមភ្នែក រមាស់ និងហូរទឹកភ្នែក។ ជំងឺនេះអាចឆ្លងយ៉ាងងាយស្រួលតាមរយៈការប៉ះដៃគ្នា ការក្អក និងការកណ្ដាស់។ អ្នកនាំពាក្យក្រសួងអប់រំប្រាប់ថាការបិទសាលារៀនជាវិធានការដ៏ល្អ១ដើម្បីការពារសិស្សពីការឆ្លងជំងឺនេះ។
សព្វថ្ងៃនេះ នៅខេត្តផានជេបមានមនុស្សរស់នៅ១២៧លាននាក់ និងមានសាលារៀន៥ម៉ឺន ៦ពាន់កន្លែង។ នេះមិនទាន់គិតទៅដល់សាលារៀនឯកជនដែលមានរាប់ពាន់កន្លែងទៀត។ សាលាទាំងនេះក៏ត្រូវបិទទ្វារផងដែរ។ អ្នកនាំពាក្យក្រសួងអប់រំសង្ឃឹមថាចំណាត់ការនេះអាចជួយទប់ស្កាត់ការឆ្លងរាលដាលជំងឺភ្នែកនៅខេត្តផានជេប។ សាលារៀននៅទូទាំងប្រទេសប៉ាគីស្ថានគង់តែបិទទ្វារដដែលទេដើម្បីឈប់សម្រាកថ្ងៃបុណ្យជាតិនៅថ្ងៃសុក្រ។
ប៉ុន្តែសាលាខ្លះត្រូវបើកទ្វារនៅថ្ងៃសៅរ៍-អាទិត្យដើម្បីរៀនសូត្រកម្មវិធីបន្ថែម ឬរៀបចំការប្រឡង។ អាជ្ញាធរនៅខេត្តផាន់ជេបប្រាប់ថានៅពេលត្រឡប់ចូលសាលារៀនវិញនៅថ្ងៃចន្ទសប្ដាហ៍ក្រោយ សិស្សទាំងអស់ត្រូវឆ្លងកាត់ការពិនិត្យមើលសុខភាពដើម្បីធ្វើឱ្យប្រាកដថាពួកគេគ្មានជំងឺភ្នែក៕
ប្រភព៖ Channel News Asia
https://www.channelnewsasia.com/asia/56000-pakistan-schools-shut-over-eye-virus-outbreak-3802951
ចែករំលែកព័តមាននេះ