ខេត្តបាត់ដំបង ៖ ជនសង្ស័យចំនួន០៣នាក់ ត្រូវអ្នកភូមិក្របួច.កជាប់ពេលកំពុងនាំគ្នាលួចកាច់ និងដកដែកនៅក្នុងរោងបណ្ដុះផ្សិតគេមួយកន្លែង រួចប្រគល់ឲ្យសមត្ថកិច្ចចាត់ការបន្តតាមផ្លូវច្បាប់ កាលពីវេលាម៉ោង៣និង៤០នាទីរសៀលថ្ងៃទី២៦ កញ្ញា នៅចំណុចភូមិពពាលខែ ឃុំអូរតាគី…
ខេត្តបាត់ដំបង ៖ ជនសង្ស័យចំនួន០៣នាក់ ត្រូវអ្នកភូមិក្របួច.កជាប់ពេលកំពុងនាំគ្នាលួចកាច់
និងដកដែកនៅក្នុងរោងបណ្ដុះផ្សិតគេមួយកន្លែង រួចប្រគល់ឲ្យសមត្ថកិច្ចចាត់ការបន្តតាមផ្លូវច្បាប់ កាលពីវេលាម៉ោង៣និង៤០នាទីរសៀលថ្ងៃទី២៦ កញ្ញា នៅចំណុចភូមិពពាលខែ ឃុំអូរតាគី ស្រុកថ្មគោល ។
យោងតាមរបាយការណ៍អធិការស្រុកថ្មគោលបានឲ្យដឹងថា ជនសង្ស័យទាំង០៣នាក់នេះ ១-ឈ្មោះ ឈៀង ពិសិដ្ឋ អាយុ៣៤ឆ្នាំ ២-ឈ្មោះ រ៉ុង ចំណាប់ អាយុ២៨ឆ្នាំ និង៣-ឈ្មោះ អាត សំអាន អាយុ៣៨ឆ្នាំ ជនទាំង០៣នាក់នេះរស់នៅភូមិ-ឃុំកើតហេតុខាងលើ ។
បើតាមសមត្ថកិច្ចបានឲ្យដឹងថា ជនទាំង០៣នាក់នេះ បានធ្វើសកម្មភាពចូលលួចកាច់និងដកដែកទីប ដែកជ្រុង នៅក្នុងរោងបណ្ដុះផ្សិតរបស់ឈ្មោះ អ៊ួ សុផល ភេទប្រុស អាយុ៥៤ឆ្នាំ នៅចំណុចខាងលើ ។ ពេលកំពុងធ្វើសកម្មភាព ក៏ត្រូវម្ចាស់ឃើញក៏ហៅកម្មករឲ្យជួយអន្តរាគមន៍ចាប់បានទាំង០៣នាក់ជាមួយនឹងវត្ថុតាងផង ។ ម្ចាស់រោងបណ្ដុះផ្សិត លោក អ៊ូ សុផល បាននិយាយប្រាប់សមត្ថកិច្ចថា គាត់បានឃើញជនទាំង០៣នាក់នេះ កំពុងលួចដកដែក និងខ្លះកាច់បំបាក់ដែកទីប ដែកជ្រុង នៅក្នុងរោងបណ្ដុះផ្សិតគាត់ ដោយគ្មានខ្លាចញញើតម្ចាស់ឡើយ ។
គាត់បញ្ជាក់ថា ពេលឃើញសកម្មភាពបែបនេះ គាត់ក៏ទូរស័ព្ទហៅកម្មករឡឥដ្ឋប៉ុន្មាននាក់ នៅក្បែរនោះឲ្យជួយអន្តរាគមន៍រហូតចាប់បានទាំង០៣នាក់ ហើយក៏បានរាយការណ៍ប្រាប់សមត្ថកិច្ចឲ្យទទូលយកជនទាំង០៣នាក់នេះតែម្ដង ដែលមានទាំងវត្ថុតាងផងដែរ ។ លោក សេង លុច អធិការស្រុកថ្មគោលបានប្រាប់ថា ជនសង្ស័យទាំង០៣នាក់នេះ ត្រូវបានពលរដ្ឋចាប់បានភ្លាមៗពេលកំពុងធ្វើសកម្មភាពលួច ។
លោកបានបញ្ជាក់ថា ជាមួយនឹងការឃាត់ខ្លួននេះ សមត្ថកិច្ចក៍បានចុះទៅកន្លែងកើតហេតុ ដកហូតបានវត្ថុតាង ដែកទីប,ដែកជ្រុងជិត២០ដើម ដែលក្រុមជនសង្ស័យបានលួចនៅក្នុងរោងបណ្ដុះផ្សិតរបស់ជនរងគ្រោះខាងលើនេះ ។ ពេលនេះ មន្ត្រីជំនាងកំពុងសួរនាំជនទាំង០៣នាក់ ដើម្បីកសាងសំណុំរឿងបញ្ជូនទៅតុលាការហើយ ៕
ចែករំលែកព័តមាននេះ