ស្វី​ស ៖ សហព័ន្ធ​បាល់ទាត់​ទ្វីបអឺរ៉ុប ដែល​ហៅ​កាត់​ថា UEFA បាន​ប្រកាស​ថា ក្រុមបាល់ទាត់​ជម្រើស​ជាតិ​រុ​ស្ស៊ី​អាយុ​ក្រោម​១៧​ឆ្នាំ​ទាំងប្រុស និង​ស្រី នឹង​ទទួល​បានការ​អនុញ្ញាត​ឱ្យ​ចូលរួម​ប្រកួត​ពានរង្វាន់​អឺរ៉ុប​ជា​លើក​ដំបូង ឬ UEFA Under-17 Euro ដែល​ស៊ី​បទ​ទួល​ធ្វើ​ជា​ម្ចាស់ផ្ទះ​នៅ​ឆ្នាំ​ក្រោយ ចាប់តាំងពី​ប្រទេស​នេះ បាន​ឈ្លានពាន​លើ​ប្រទេស​អ៊ុយ​ក្រែ​ន កាលពី​១៩​ខែ​មុន​។ នេះ​បើ​យោង​តាម​ប្រភព​ពី BBC ចេញផ្សាយ​កាលពី​ថ្ងៃ​ទី​២៦ ខែកញ្ញា ឆ្នាំ​២០២៣​។

ស្ថាប័ន​គ្រប់គ្រង​បាល់ទាត់​ទ្វីបអឺរ៉ុប​បាន​បញ្ជាក់​ថា ក្មេង​ប្រុស និង​ក្មេង​ស្រី មិន​គួរ​ត្រូវ​បាន​ទទួល​ទណ្ឌកម្ម ចំពោះ​ទ​ង្វើ​របស់​មនុស្ស​ពេញវ័យ​នោះ​ទេ ហើយ​បាល់ទាត់​មិន​គួរ​បោះបង់​ចោលការ​ផ្ញើ​សារ​សន្តិភាព និង​ក្តី​សង្ឃឹម​ឡើយ​។

ទោះ​យ៉ាងណា​ក៏​ដោយ សមាគម​កីឡាបាល់ទាត់​ប្រទេស​មួយ​ចំនួន​ផ្សេង​ទៀត មិន​យល់​ស្រប​នឹង​ការ​សម្រេចចិត្ត​របស់ UEFA ឡើយ ដោយ​ក្នុង​ចំណោម​នោះ ចក្រភព​អង់គ្លេស​ប្រកាស​មុនគេ​ថា ខ្លួន​នឹង​មិន​ចូលរួម​ប្រកួត បើ​មាន​វត្តមាន​រុ​ស្សី​។ អ្នកនាំពាក្យ​របស់​សហព័ន្ធ​បាល់ទាត់​អង់គ្លេស (FA) បាន​ថ្លែង​ថា «​យើង​មិន​គាំទ្រ​ជំហរ​នៃ​ការ​បញ្ចូល​រុ​ស្ស៊ី​ទៅ​ក្នុង​ការ​ប្រកួត​កម្រិត​អាយុ​ក្រោម​១៧​ឆ្នាំ​របស់ UEFA នោះ​ទេ ហើយ​ជំហរ​របស់​យើង​នៅ​តែ​ថា ក្រុម​អង់គ្លេស​នឹង​មិន​ប្រកួត​ជាមួយ​រុ​ស្ស៊ី​»​។

គួរ​រំលឹក​ថា UEFA បាន​ផ្អាក​សកម្មភាព​ក្រុម និង​ក្លិប​របស់​រុ​ស្ស៊ី​ទាំង​អស់ពី​ការ​ប្រកួត​របស់​ខ្លួន នៅ​ពេល​ដែល​ការ​លុកលុយ​ពេញលេញ​លើ​អ៊ុយ​ក្រែ​ន បាន​ចាប់ផ្តើម​នៅ​ក្នុង​ខែកុម្ភៈ ឆ្នាំ​២០២២​។ UEFA ក៏​បាន​ដកហូត​សិទ្ធិ​ធ្វើ​ជា​ម្ចាស់ផ្ទះ សម្រាប់​ការ​ប្រកួត​វគ្គ​ផ្តាច់ព្រ័ត្រ Champions League ឆ្នាំ ២០២២ និង Super Cup ឆ្នាំ ២០២៣ ដែល​គ្រោង​នឹង​ធ្វើ​ឡើង​នៅ​ទីក្រុង Saint Petersburg និង Kazan ក៏​ដូច​ជា​ការ​លុប​ចោល​កិច្ចសន្យា​ឧបត្ថម្ភ​ជាមួយ​ក្រុមហ៊ុន​ថាមពល​យក្ស Gazprom ដែល​គ្រប់គ្រង​ដោយ​រដ្ឋាភិបាល​រុ​ស្ស៊ី ដោយ​បញ្ជាក់​ពី​ជំហរ​របស់​ខ្លួន​ថា ធ្វើការ​ថ្កោលទោស​ជា​ថ្មី​ចំពោះ​សង្គ្រាម​ខុសច្បាប់​របស់​រុ​ស្ស៊ី​។

លោក Aleksander Ceferin ប្រធាន UEFA បាន​គូសបញ្ជាក់​ថា «​ការ​បន្ត​ផ្អាក​របស់ UEFA ប្រឆាំង​នឹង​ក្រុម​កីឡាករ និង​កីឡាការិនី​ពេញវ័យ​របស់​រុ​ស្ស៊ី ឆ្លុះ​បញ្ចាំង​អំពី​ការ​ប្តេជ្ញា​ចិត្ត​របស់ UEFA ក្នុង​ការ​ប្រកាន់​ជំហរ​ប្រឆាំង​នឹង​អំពើ​ហិង្សា និង​ការ​ឈ្លានពាន ហើយ​ជំហរ​នេះ នឹង​បន្ត​រហូត​ដល់​សង្គ្រាម​បាន​បញ្ចប់ ជាមួយ​សន្តិភាព​ត្រូវ​បាន​ស្តារ​ឡើង​វិញ​»​។

បុរស​ជនជាតិ​ស្លូ​វេ​នី​វ័យ​៥៥​ឆ្នាំ​រូប​នេះ បាន​បន្ថែម​ថា «​តាម​រយៈ​ការ​ហាមប្រាម​លើ​កុមារ​ពី​ការ​ប្រកួត​របស់​យើង មិន​ត្រឹមតែ​បរាជ័យ​ក្នុង​ការ​លើកកំពស់​សិទ្ធិ​មូលដ្ឋាន សម្រាប់​ការ​អភិវឌ្ឍន៍​របស់​ពួក​គេ​ប៉ុណ្ណោះ​ទេ ប៉ុន្តែ​យើង​មានការ​រើសអើង​ដោយ​ផ្ទាល់​ប្រឆាំង​នឹង​ពួក​គេ តាម​រយៈ​ការ​ផ្តល់​ឱកាស​លេង និង​ប្រកួតប្រជែង​ជាមួយ​មិត្ត​ភ័ក្តិ​ពួក​គេ​មក​ពី​ទូ​ទាំង​ទ្វីបអឺរ៉ុប យើង​កំពុង​វិនិយោគ​លើ​អ្វី​ដែល​យើង​សង្ឃឹមថា នឹង​ក្លាយជា​មនុស្ស​ជំនាន់​ក្រោយ​ដ៏​ភ្លឺស្វាង​ដ៏​មាន​សមត្ថភាព និង​អនាគត​ដ៏​ល្អ​ប្រសើរ​»​។ (​ប្រភព​ពី BBC)