ខេត្តបន្ទាយមានជ័យ ៖ នេះគឺជាសកម្មភាពមួយដែលមិនគួរឱ្យកើតមានទាល់តែសោះ ខណៈក្រុមអ្នកមានទ្រព្យធន និងក្រុមអ្នកដើរទិញលក់អេតចាយកំប៉ិកកំប៉ុកប្រើអំពើហិ.ង្សាដាក់គ្នាដូចជនទំនើងធ្វើឱ្យកក្រើកនាពេលរាត្រីថ្ងៃទី១៥ ឧសភា បណ្តាលឱ្យរងរបួស៥នាក់ ក្នុងនោះថៅកែស្ថានីយប្រេង និងគូទំនាស់៣នាក់របស់គាត់បានរងរបួសជាទម្ងន់
ខេត្តបន្ទាយមានជ័យ ៖ នេះគឺជាសកម្មភាពមួយដែលមិនគួរឱ្យកើតមានទាល់តែសោះ ខណៈក្រុមអ្នកមានទ្រព្យធន និងក្រុមអ្នកដើរទិញលក់អេតចាយកំប៉ិកកំប៉ុកប្រើអំពើហិង្សាដាក់គ្នាដូចជនទំនើងធ្វើឱ្យកក្រើកនាពេលរាត្រីថ្ងៃទី១៥ ឧសភា បណ្តាលឱ្យរងរបួស៥នាក់ ក្នុងនោះថៅកែស្ថានីយប្រេង និងគូទំនាស់៣នាក់របស់គាត់បានរងរបួសជាទម្ងន់។
សមត្ថកិច្ចនគរបាលក្រុងសិរីសោភ័ណ និងកងរាជអាវុធហត្ថខេត្ត ក៏បានចុះទៅអន្តរាគមន៍ក្នុងករណីនេះ តែក្រោយមកខាងកងរាជអាវុធហត្ថបានបដិសេធមិនផ្តល់ព័ត៌មានជុំវិញហេតុការណ៍ដែលកើតឡើងនោះទេ ។ ប៉ុន្តែបើតាមមន្ត្រីនគរបាលក្រុងសិរីសោភ័ណ បានឱ្យដឹងថា ហេតុការណ៍នេះបានកើតឡើងនៅវេលាម៉ោង៨និង៣០នាទីយប់ ថ្ងៃទី១៥ ឧសភា ឆ្នាំ២០១១ នៅចំណុចខាងក្រោយស្ថានីយប្រេងឥន្ធនៈចម្ងាយ២០០ម៉ែត្រ ស្ថិតក្នុងភូមិ៤ សង្កាត់ព្រះពន្លា ក្រុងសិរីសោភ័ណ។ ខាងក្រុមថៅកែស្ថានីយប្រេងឥន្ធនៈមានគ្នា៥នាក់ ឯខាងក្រុមដើរទិញអេតចាយក៏មានគ្នា៥នាក់ដែរ ។ មុនពេលកើតហេតុមានរថយន្តម៉ាក ISUZU DUMEX ពណ៌ទឹកសមុទ្រ របស់ថៅកែប្រេងបានដឹកមា្ចស់វា និងកម្មករទៅបុកគូទំនាស់ បណ្តាលឱ្យរបួស បន្ទាប់មកក៏កើតជាអំពើហិង្សាប្រវាយប្រតប់គ្នាយ៉ាងសាហាវព្រៃផ្សៃ ដែលខ្លះមានប្រើកាំបិត ដែកស្រួច ពូថៅ និងដំបងវាយកាប់ចាក់គ្នាទៀតផង។
កម្មករម្នាក់ឈ្មោះអ៊ូង ចាន់រ៉ា បានឱ្យសមត្ថកិច្ចដឹងថា ខ្លួនឃើញរថយន្ត១គ្រឿង ទៅបុករថយន្ត១គ្រឿងទៀត រួចមានមនុស្សអាយុប្រហែលខ្ទង់២០ឆ្នាំ បានវាយតប់គ្នាយ៉ាងស៊ីសាច់ហុតឈាម ។ បុរសឈ្មោះនួន ចាន់នី ដែលអះអាងថា ជាឪពុកជនរងគ្រោះម្នាក់ខាងក្រុមអ្នកដើរទិញអេតចាយបានប្រាប់កោះសន្តិភាពថា កូនគាត់ពុំនឹកស្មានថានៅរស់ទេ បន្ទាប់ពីភាគីម្ខាងបានកាប់នឹងពូថៅ បណ្តាលឱ្យរបួសធ្ងន់ជាច្រើនកន្លែងត្រង់ក្បាល។ ភាគីខាងដើរទិញអេតចាយ និងនគរបាលថា ភាគីខាងថៅកែស្ថានីយប្រេងឥន្ធនៈបានជិះរថយន្តទៅបង្កជម្លោះបង្ហូរឈាមនេះ។ តែខាងបងប្អូនថៅកែស្ថានីយប្រេងថា ខណៈពេលថៅកែស្ថានីយប្រេងបើកទ្វាររថយន្តចុះ ក៏ត្រូវភាគីម្ខាងវាយបណ្តាលឱ្យរបួសធ្ងន់។ បន្ទាប់មកជម្លោះដើម្បីការពារខ្លួនក៏ផ្ទុះឡើង បណ្តាលឱ្យរងរបួសទាំងសងខាង។ សមត្ថកិច្ចកងរាជអាវុធហត្ថបានបញ្ឈប់ជម្លោះនោះ និងបានយកកម្លាំង ព្រមទាំងរថយន្តពេទ្យមកដឹកជនរងគ្រោះទៅមន្ទីរពេទ្យ និងគ្លីនិកនានាទាំងកណ្តាលរាត្រី។
ចំពោះជនរងគ្រោះខាងភាគីថៅកែស្ថានីយប្រេងឥន្ធនៈមាន ១-ឈ្មោះកែវ លីយេន ភេទប្រុស អាយុ២៩ឆ្នាំ នៅភូមិ៤ សង្កាត់ព្រះពន្លា ជាថៅកែស្ថានីយប្រេងរងរបួសធ្ងន់ត្រង់ក្បាលហូរឈាម។ ២-ឈ្មោះផុន សុភ័ណ ភេទប្រុស អាយុ២២ឆ្នាំ ជាកម្មករ រងរបួសត្រង់ក្បាលខាងឆ្វេង និងក្រៅពីនោះរងរបួសបន្តិចបន្តួច។
ឯជនរងគ្រោះខាងភាគីដើរទិញអេតចាយមាន ១-ឈ្មោះស៊ិន ម៉ាត់អែល ភេទប្រុស អាយុ២៩ឆ្នាំ រងរបួសបាក់ក្តោងច្រមុះធ្ងន់, ២-ឈ្មោះនី នីវ ភេទប្រុស អាយុ២៥ឆ្នាំ រងរបួសធ្ងន់ត្រង់ថ្ងាស់ និងលើដងខ្លួនដោយសាររថយន្តភាគីម្ខាងបើកទៅបុក និង៣-ឈ្មោះនី កាយយ៉ា ភេទប្រុស អាយុ១៩ឆ្នាំ រងរបួសធ្ងន់ផុងលលាដ៏ក្បាល ត្រូវដេរ៧ថ្នេរ របួសក្បាលខាងក្រោយ២កន្លែង មាត់១កន្លែង និងស្មា១កន្លែង។ ក្នុងករណីខាងលើនេះ សមត្ថកិច្ចបានឃាត់ខ្លួនជនដៃដល់នៃភាគីទាំង២ និងធ្វើការស៊ើបអង្កេតស្រាវជ្រាវរកមូលហេតុដែលបណ្តាលឱ្យមានការប្រទូស្តរ៉ាយគ្នានេះ៕
ចែករំលែកព័តមាននេះ