រាជធានីភ្នំពេញ ៖ កាលពីព្រឹកថ្ងៃទី០៦ ខែសីហា ឆ្នាំ២០២៥ មានបុរសអ្នករត់ម៉ូតូកង់បីម្នាក់ អោបឯកសារ ដើរចេញផុតពីរបងសាលាដំបូងរាជធានីភ្នំពេញ ដែលស្ថិតនៅចំណុចផ្លូវលោកតាក្រហមក ភូមិព្រែកលៀប…
រាជធានីភ្នំពេញ ៖ កាលពីព្រឹកថ្ងៃទី០៦ ខែសីហា ឆ្នាំ២០២៥ មានបុរសអ្នករត់ម៉ូតូកង់បីម្នាក់ អោបឯកសារ ដើរចេញផុតពីរបងសាលាដំបូងរាជធានីភ្នំពេញ ដែលស្ថិតនៅចំណុចផ្លូវលោកតាក្រហមក ភូមិព្រែកលៀប សង្កាត់ព្រែកលៀប ខណ្ឌជ្រោយចង្វារ ត្រូវបានកម្លាំងសមត្តកិច្ចការិយាល័យនគរបាលព្រហ្មទណ្ឌកម្រិតស្រាលមួយក្រុម ធ្វើការឃាត់ខ្លួនតាមដីកាបង្គាប់ឲ្យចាប់ខ្លួនរបស់ចៅក្រមសួរ រួចនាំចូលទៅក្នុងរថយន្តដឹកយកទៅកាន់ស្នងការដ្ឋាននគរបាលរាជធានីភ្នំពេញ ។
អ្នករត់ម៉ូតូកង់បីរូបនោះមានឈ្មោះ ឆោម រតនៈ ភេទប្រុស អាយុ៣២ ឆ្នាំ មានទីលំនៅផ្ទះលេខ៤ ផ្លូវ HC បុរីហុកឆេង ភូមិម័ល សង្កាត់ដង្កោ ខណ្ឌដង្កោ រាជធានីភ្នំពេញ ។
ការឃាត់ខ្លួនជនសង្ស័យខាងលើនេះ ត្រូវបានសមត្ថកិច្ចបង្ហើបឲ្យដឹងថា ជាការអនុវត្តតាមដីកាបង្គាប់ឲ្យចាប់ខ្លួនរបស់ចៅក្រមស៊ើបសួរសាលាដំបូងរាជធានីភ្នំពេញ ដែលជនសង្ស័យជាប់ពាក់ពន្ធពីបទ រំលោភលើទំនុកចិត្ត ពិសេសដោយអភិបាល ឬបុគ្គលផ្សេងទៀត ប្រព្រឹត្តនៅរាជធានីភ្នំពេញ កាលពីអំឡុងឆ្នាំ២០២២ បទល្មើសព្រហ្មទណ្ឌ ដែលមានចែងឲ្យផ្តន្ទាទោសតាមមាត្រា ៣៩៣ នៃក្រមព្រហ្មទណ្ឌ ។
ក្រោយឃាត់ខ្លួនជនសង្ស័យអស់រយៈពេលជាច្រើនម៉ោង លុះដល់រសៀលថ្ងៃដដែល សមត្ថកិច្ចក៏បាននាំជនសង្ស័យ យកទៅប្រគល់ជូនចៅក្រមស៊ើបសួរ ដើម្បីបន្តនីតិវិធីឃុំខ្លួន ឬមិនឃុំខ្លួន រង់ចាំជំនុំជម្រះលើអង្គសេចក្តី ៕
ចែករំលែកព័តមាននេះ