អា​រ៉ា​ប៊ី​សា​អូឌីត ៖ ខ្សែប្រយុទ្ធ​ប្រេ​ស៊ី​ល Neymar Jr. គឺជា​កំពូល​កីឡា​ការ​បាល់ទាត់​លំដាប់​ពិភពលោក​ចុង​ក្រោយ​គេ ដែល​បាន​ទៅ​ប្រកប​អាជីព​នៅ​លី​គ​កំពូល​អា​រ៉ា​ប៊ី​សា​អូឌីត (Saudi Pro League) ពោល​គឺជា​មួយ​ក្លិប Al-Hilal ហើយ​កីឡាករ​វ័យ​៣១​ឆ្នាំ​រូប​នេះ ទទួល​បាន​ថ្លៃ​នឿយហត់​ជាង ៣០០​លាន​ដុល្លារ​លើ​កុងត្រា​រយៈពេល​២​ឆ្នាំ​។ ជាមួយនឹង​ថ្លៃ​ពលកម្ម​ដ៏​ច្រើន​សន្ធឹកសន្ធាប់​នេះ ក្រុម​អ្នកជំនាញ​រចនា​ម៉ូត​ផ្ទះ​ដ៏​ល្បី បាន​បង្កើត​គំរូ​ភូមិ​គ្រិះ ឬ Concept ដែល​ប្រៀប​ដូច​ទៅ​នឹង​វិមាន​ដ៏​មហាសាល​មួយ ដែល​ស័ក្តិសម​នឹង​កំពូល​កីឡាករ​រូប​នេះ​។

យោង​តាម​គេហទំព័រ Mansionisti ដែល​មាន​អ្នក​តាមដាន​រហូត ១.៣​លាន​នាក់​នៅ​លើ​បណ្តាញ​សង្គម Instagram បាន​ស្នើ​ក្រុមការងារ​ពួក​គេ​ប្រើប្រាស់​បច្ចេកវិទ្យា AI ដើម្បី​បង្កើត Concept វិមាន​ដ៏​ប្រណីត​បំផុត​សម្រាប់ Neymar តាម​រចនាបថ​អា​រ៉ាប់​ជាមួយនឹង​តម្លៃ​ដ៏​គួរ​ឱ្យ​ភ្ញាក់ផ្អើល ១៩៥​លាន​ដុល្លារ ។

វិមាន​នោះ​កម្ពស់​៥​ជាន់ គ្របដណ្ដប់​ដោយ​ពណ៌​ទឹកមាស​ដ៏​ចែងចាំង ជាមួយ​លក្ខណៈ​ពិសេស នៃ​ទឹកជ្រោះ​ធ្លាក់​ចុះ​ចេញពី​ផ្នែក​ខាង​មុខ​វិមាន​។ អ្វី​ដែល​ពិសេស​ជាង​នេះ​ទៅ​ទៀត គឺ​អគារ​ចំណតរថយន្ត​ដែល​មាន​ទំហំ​ធំ​ទូលាយ ជាមួយនឹង​រថយន្ត​តម្លៃ​រាប់​លាន​ដុល្លារ​ជា​ច្រើន​គ្រឿង​ផង​ដែរ​។ នៅ​ពេល​ដើរ​ចូល​ខាងក្នុង​តាម​ច្រកចូល​ខាង​មុខ យើង​នឹង​ឃើញ​ពិ​ដាន​ដំបូល ច្រក​ទ្វារ និង​កម្រាល​ថ្ម​ម៉ា​ប​រៀបចំ​យ៉ាង​ល្អ​ឥត​ខ្ចោះ តាម​រចនាបថ​អា​រ៉ាប់ ហើយនឹង​ជណ្តើរ​ថ្នើ​រ​ជើង​ដ៏​ធំ​សម្បើម​មើលទៅ​ត្រជាក់​ភ្នែក​បំផុត​។

តារាង​បាល់ទាត់​ខ្នាត​តូច​ក៏​មាននៅ​ក្នុង​វិមាន​ផង​ដែរ​។ បន្ថែម​លើស​ពី​នេះ​ទៅ​ទៀត អាង​ហែល​ទឹក​ថ្ម​ម៉ា​ប​ដ៏​ធំ និង​បន្ទប់ទឹក​ដ៏​ប្រណីត​រចនា​ឡើង​តាម​បែប Hammam របស់​ប្រទេស​តួ​ក​គី បូក​រួម​ជាមួយនឹង​កន្លែង​ពិសេស​ៗ​ជា​ច្រើន​ផ្សេង​ទៀត​។ សរុប​មក Concept នៃ​វិមាន​ដ៏​អស្ចារ្យ​នេះ បង្កើត​ឡើង​ប្រណីតភាព​ខ្លាំង​លើស​ពី​ការ​រំពឹង​ទុក ដែល​ប្រៀប​ដូច​ជា​រាជវាំង​។

កន្លង​មក មាន​ពាក្យ​ចចាមអារ៉ាម​ជា​ច្រើន​បាន​ចុះ​ផ្សាយ​ថា Neymar កំពុង​ស្វែងរក​ផ្ទះ​មាន ២៥​បន្ទប់​គេង ដែល​មាន​សូ​ណា​ចំនួន ៣ អាង​ហែល​ទឹក ១ ទទឹង ១០ ម៉ែត្រ និង​បណ្តោយ ៤០​ម៉ែត្រ ជា​ពិសេស​ទីធ្លា​ធំ​ងាយស្រួល​ដាក់​រថយន្ត​ទំនើប​ៗ​ជា​ច្រើន​គ្រឿង​របស់​កីឡាករ​រូប​នេះ ដូច្នេះ​ហើយ​ទើប Concept វិមាន​ដ៏​ប្រណីត​មួយ​នេះ លេច​ចេញ​រូបរាង​ឡើង​៕ (​ប្រភព​ពី Supercar Blondie)