ដើម្បីទាក់ទាញទេសចរណ៍បរទេសនោះ ប្រទេសថៃ និងវៀតណាមដែលនៅជិត កម្ពុជាបានកំពុងតែអនុវត្តគោលនយោបាយលើកលែងទិដ្ឋាការដល់អ្នកទេសចរបរទេស ប៉ុន្តែកម្ពុជាហាក់មិនទាន់ពីផែនការនេះទេ ។ គោលនយោបាយលើកលែងទិដ្ឋាការសម្រាប់អ្នកទេសចរបរទេសចូលមកកម្ពុជានេះត្រូវបានលើកឡើងដោយក្រុមអ្នកមគ្គុទេសទេសចរណ៍ និងអ្នកជំនាញទេសចរណ៍មួយចំនួនរួចហើយនៅលើបណ្តាញសង្គម និងនៅលើទំព័រព័ត៌មាននានាកន្លងមក ដោយសារតែភ្ញៀវទេសចរដែលមកកម្ពុជានៅមានចំនួនតិចនៅឡើយ…
ដើម្បីទាក់ទាញទេសចរណ៍បរទេសនោះ ប្រទេសថៃ និងវៀតណាមដែលនៅជិត កម្ពុជាបានកំពុងតែអនុវត្តគោលនយោបាយលើកលែងទិដ្ឋាការដល់អ្នកទេសចរបរទេស ប៉ុន្តែកម្ពុជាហាក់មិនទាន់ពីផែនការនេះទេ ។
គោលនយោបាយលើកលែងទិដ្ឋាការសម្រាប់អ្នកទេសចរបរទេសចូលមកកម្ពុជានេះត្រូវបានលើកឡើងដោយក្រុមអ្នកមគ្គុទេសទេសចរណ៍ និងអ្នកជំនាញទេសចរណ៍មួយចំនួនរួចហើយនៅលើបណ្តាញសង្គម និងនៅលើទំព័រព័ត៌មាននានាកន្លងមក ដោយសារតែភ្ញៀវទេសចរដែលមកកម្ពុជានៅមានចំនួនតិចនៅឡើយ ដែលនាំអោយអ្នកដែលប្រកបរបរនេះនៅតែពិបាក ក្រោយពេលដែលវិស័យនេះធ្លាក់សឹងដល់សូន្យនៅក្នុងសម័យកូវីដ១៩ រាលដាលខ្លាំង ។
នៅក្នុងអំឡុង៧ខែ ដើមឆ្នាំភ្ញៀវទេសចរបរទេសដែលចូលមកកម្ពុជាជារួមមាន ជាង៣លាននាក់កើនឡើង៣០៨ ភាគរយឯណោះ ប៉ុន្តែទោះបីជាយ៉ាងណាក៏ដោយនៅឆ្នាំនេះ កម្ពុជាគ្រោងទាក់ទាញឲ្យដល់៥លាននាក់ ។ នេះជាតួរលេខសរុបខណៈដែលនៅសៀមរាបឯណោះវិញ ពិសេសអ្នកដែលចូលទៅទស្សនាអង្គរ គឺមានតិចមែនទែន ។ គ្រឹះស្ថានអង្គរបានអះអាងថា រហូតដល់ខែសីហា អ្នកទេសចរបរទេសចូលទស្សនាតំបន់រមណីដ្ឋានអង្គរមានត្រឹមតែជិត ០,៥លាននាក់ប៉ុណ្ណោះ ខណៈដែលកាលពីមុនវិបត្តិពោល គឺនៅក្នុងឆ្នាំ២០១៩ មានរហូតដល់ទៅជាង២,២ លាននាក់ ។
ដូច្នេះ កម្ពុជាត្រូវមានយុទ្ឋសាស្ត្រប្រកបដោយប្រសិទ្ធភាព ដើម្បីទាក់ទាញទេសចរណ៍បរទេសមកកាន់ប្រទេសកម្ពុជាថែមទៀត ។
ការលើកលែងទិដ្ឋាការអាចជាគំនិតដ៏ល្អមួយ ដើម្បីទាក់ទាញភ្ញៀវទេសចរបរទេស ។ ដូចយើងដឹងស្រាប់ហើយថា ប្រទេសថៃ និងវៀតណាមបានលើកលែងទិដ្ឋាការពាក់ព័ន្ធនឹងផែនការរៀបចំវេទិការាជរដ្ឋាភិបាល-ផ្នែកឯកជន សម្តេចធិបតី ហ៊ុន ម៉ាណែត បានលើកឡើងរួចហើយថា វេទិកានេះនឹងរៀបចំឡើងនៅខែវិច្ឆិកាខាងមុខ ។
សម្តេចធិបតីបានបញ្ជាក់យ៉ាងច្បាស់នៅពេលដែលបើកកិច្ចប្រជុំគណរដ្ឋមន្ត្រីលើកដំបូងថា រដ្ឋាភិបាលនឹងស្តាប់នូវមតិយោបល់ និងសំណូមពរផ្សេងៗ ក៏ដូចជាការដាក់ចេញនូវវិធានការមុតស្រួច និងជាក់ស្តែងមួយចំនួន ដើម្បីបន្តជំរុញគាំទ្រវិស័យឯកជន ដែលជាកម្លាំងចលករនៃកំណើនសេដ្ឋកិច្ចជាតិ ។
សម្តេចធិបតី បានប្រគល់ភារកិច្ចនេះ ជូនលោក អូន ព័ន្ធមុនីរ័ត្ន, ឧបនាយករដ្ឋមន្ត្រី និងជារដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ហើយក៏ជាប្រធានគណៈកម្មាធិការគោលនយោបាយសេដ្ឋកិច្ច និងហិរញ្ញវត្ថុ សម្របសម្រួលជាមួយក្រសួង-ស្ថាប័ន, វិស័យឯកជន ព្រមទាំងភាគី ពាក់ព័ន្ធដទៃទៀត ដើម្បីរៀបចំវេទិកានេះ។
វេទិការាជរដ្ឋាភិបាល-ផ្នែកឯកជន ត្រូវបានរាជរដ្ឋាភិបាលកម្ពុជារៀបចំឡើងក្នុង រយៈពេល១ឆ្នាំម្តង ជាយន្តការសន្ទនាមួយដែលមានថ្នាក់ដឹកនាំកម្ពុជា និងដោយមានការចូលរួមពីរដ្ឋមន្ត្រី គ្រប់ក្រសួង ស្ថាប័ន អភិបាលគ្រប់រាជធានី-ខេត្ត តំណាងផ្នែកឯកជនគ្រប់វិស័យ ឯកអគ្គរដ្ឋទូត ប្រចាំកម្ពុជា និងតំណាងស្ថាប័នអន្តរជាតិមួយចំនួន ។
វេទិកានេះនឹងផ្តល់ឱកាសឱ្យផ្នែកឯកជន លើកឡើងនូវបញ្ហាប្រឈម និងសំណូមពរជូនរាជរដ្ឋាភិបាលពិនិត្យ និងចាត់វិធានការសមស្រប ដើម្បីដោះស្រាយ ហើយរាល់ការសម្រេច នៅក្នុងវេទិកានេះត្រូវបានចាត់ទុកជាការសម្រេចរបស់គណៈរដ្ឋមន្ត្រី ដូច្នេះវិស័យឯកជន ជាពិសេស គឺអ្នកដែលរកស៊ីនៅក្នុងវិស័យនេះនឹងអាចលើកឡើងបញ្ហាលើកលែងទិដ្ឋាការនេះនៅក្នុងវេទិការនេះ ខណៈដែលវិស័យទេសចរណ៍នៅក្នុងប្រទេសត្រូវបានគេលើកឡើងថា ស្ងាត់ខ្លាំងបើធៀបនឹងប្រទេសជិតខាង ខណៈដែលពេលនេះប្រទេសជិតខាងកំពុង តែដាក់ ចេញនូវគោលនយោបាយលើកលែងទិដ្ឋាការនេះថែមទៀត ។
នៅពេលនេះថៃ ដែលជាទីផ្សារទេសចរដ៏ធំជាងគេនៅអាស៊ានបានដាក់ចេញ ហើយ ការលើកលែងទិដ្ឋាការសម្រាប់ភ្ញៀវទេសចរជនជាតិចិន ដោយចាប់ពីថ្ងៃទី ២៥ ខែកញ្ញា ឆ្នាំ២០២៣ រហូតដល់ ថ្ងៃទី២៩ ខែកុម្ភៈ ឆ្នាំ២០២៤ ។ដើម្បីលើកកម្ពស់ផែនការនេះរដ្ឋាភិបាលថៃបានលើកទឹកចិត្តអោយរៀបចំពិធីស្វាគមន៍ដល់អ្នកទេសចរដែលចូលមកលេងប្រទេសថៃ នៅថ្ងៃនេះជាមួយនឹងភូងផ្កាម្លិះ និងខោជើងដំរីម្នាក់មួយ ចំពោះភ្ញៀវមួយចំនួនដែលមានជើងហោះហើរដំបូងពីចិន នៅតាមព្រលានយន្ត ហោះ អន្តរជាតិដូចជាសុវណ្ណភូមិ ដនមឿង ឈៀងម៉ៃ និងភូកេតជាដើម។ ក្រៅពីនោះ សមត្ថកិច្ចប៉ូលិសអន្តោប្រវេសន៍ថៃក៏បានពង្រឹងល្បឿននៃការងារនៅតាម បញ្ជវាយត្រាចូលប្រទេសដោយធានាថា នៅក្នុងអ្នកដំណើរមកដល់ម្នាក់នឹងចំណាយពេលប្រមាណជាត្រឹម១នាទីប៉ុណ្ណោះ ។
ទាក់ទងនឹងផែនការនេះ សមត្ថកិច្ចប៉ូលិសអន្តោប្រវេសន៍ថៃនៅអាកាសយានដ្ឋានអន្តរជាតិ សុវណ្ណភូមិ បានអះអាងថា ខ្លួនបានត្រៀមបុគ្គលិករួចរាល់សម្រាប់ប្រចាំការនៅតាមបញ្ជសរុប១៣៨ ដើម្បីធានាខ្លួនអាចមានសមត្ថភាពទ្រទ្រង់ការមកដល់អ្នកដំណើរសរុប ៧.១៤០ នាក់ នៅក្នុងមួយម៉ោង ពោលគឺធានាថា នៅក្នុងអ្នកដំណើរម្នាក់អាចឆ្លងកាត់បញ្ជនោះត្រឹមតែ១នាទីតែប៉ុណ្ណោះ។
លោកស្រី ស៊ូដាវ៉ាន់ វ៉ាងស៊ុផាគីកុសល រដ្ឋមន្ត្រីទេសចរណ៍ និងកីឡារបស់ថៃ បានឲ្យដឹងថា រដ្ឋាភិបាលនិងធ្វើការជាមួយនឹងវិស័យឯកជនបន្ថែមទៀត ដើម្បីធានាលើកកម្ពស់ និងលើកទឹកចិត្តដល់អ្នកទេសចរជនជាតិចិន ។
ក្រៅពីនោះ លោក ស៊ូរីយ៉ា ជនរុងរឿងគិត រដ្ឋមន្ត្រីក្រសួងដឹកជញ្ជូនថៃ បាននិយាយថា គម្រោងនេះនឹងជួយលើកកំពស់ចលករនៃកម្លាំងសេដ្ឋកិច្ចថៃ ។ លោកបានបង្ហាញនូវសេចក្តីរំពឹងថា អ្នកទេសចរចិនជាច្រើននឹងសម្រុកមកលេងនៅថៃពីថ្ងៃទី២៩ ខែកញ្ញា រហូតដល់ថ្ងៃទី០៦ ខែតុលា ដែលជាថ្ងៃឈប់សម្រាករបស់ពួកគេ ។ នៅក្នុងអំឡុងពេលនោះជើងហោះហើរដោយផ្ទាល់ពីចិន នឹងកើនឡើងពី៧២ ជើងទៅ៩៦ជើង នៅក្នុងមួយថ្ងៃ ហើយភ្ញៀវទេសចរចិនអាចនឹងកើនឡើងពី៩.៦៨០ នាក់ ទៅ១៨.៦៥៦ នាក់នៅក្នុងមួយថ្ងៃ ។ ដូចនេះគោលដៅទាក់ទាញភ្ញៀវទេសចរចិនឲ្យបាន៥លាននាក់ នៅក្នុងឆ្នាំនេះ អាចនឹងសម្រេចបាន ។
ដោយឡែកវៀតណាមវិញបានប្រកាស បានដាក់ចេញនូវគោលនយោបាយលើកលែងទិដ្ឋាការដល់អ្នកទេសចរបរទេស តាំងតែពីថ្ងៃទី១៥ ខែសីហា មកម្លេះ ។ តាមគោលនយោបាយនេះ អ្នកទេសចរមកពី២៥ ប្រទេស ដោយនៅក្នុងនោះមានកម្ពុជា ឡាវ ថៃ ជប៉ុន និងបណ្តាប្រទេសមកពីអឺរ៉ុប និងអាស៊ីមួយចំនួនទៀត ប៉ុន្តែមិនបានលើកលែងចំពោះ អ្នកទេសចរចិនឡើយ ។
ទោះបីជាមិនមានចិននៅក្នុងបញ្ជី ប៉ុន្តែមន្ត្រីវៀតណាមបានលើកឡើងនៅលើសារព័ត៌មានថា គោលនយោបាយទិដ្ឋាការថ្មីរបស់វៀតណាមត្រូវបានទទួល និងវាយតម្លៃជាវិជ្ជមានពីភ្ញៀវទេសចរបរទេស ជាពិសេសជនជាតិចិនដែរ ហើយក៏ជាឱកាសសម្រាប់វិស័យទេសចរណ៍វៀតណាមក្នុងការបង្កើនសមត្ថភាពប្រកួតប្រជែងរបស់ខ្លួនបើធៀបនឹងប្រទេសជិតខាង ។
សារព័ត៌មានបានឲ្យដឹងថា ភ្ញៀវទេសចរចិននៅពេលនេះអាចស្នើសុំទិដ្ឋាការចូលវៀតណាម តាមប្រព័ន្ធអេឡិចត្រូនិកបាន ។
ប្រភពដដែលបានបន្តថា ជាមួយនឹងគោលនយោបាយនេះនៅក្នុងរយៈត្រឹមតែ ពីថ្ងៃទី១៥ ដល់៣០ ខែសីហា វៀតណាមបានទទួលភ្ញៀវទេសចរចម្រុះសរុប ជាង ៣៣ម៉ឺននាក់ ដោយភាគច្រើនមកពីកូរ៉េខាងត្បូង ជប៉ុន និងអង់គ្លេស ៕ ដោយៈ ហេង ចេស្តារ
ចែករំលែកព័តមាននេះ