ខេត្តស្វាយរៀង ៖ យុវជនចាក់ធុងបាស់ម្នាក់ត្រូវគេលួចវាយមួយព្រនង់ចំក្បាលបណ្តាលឱ្យបែកហូរឈាមស្រោចពេញផ្ទៃមុខ ខណៈពេលកំពុងដេកនៅក្នុងអង្រឹង។ ហេតុការណ៍នេះកើតឡើងកាលពីវេលាម៉ោង៩ និង៣០នាទីយប់ ថ្ងៃទី១៣ ឧសភា នៅក្បែររោងការមួយស្ថិតក្នុងភូមិសំឡីខាងជើង ឃុំសំឡី ស្រុកកំពង់រោទ៍
ខេត្តស្វាយរៀង ៖ យុវជនចាក់ធុងបាស់ម្នាក់ត្រូវគេលួចវាយមួយព្រនង់ចំក្បាលបណ្តាលឱ្យបែកហូរឈាមស្រោចពេញផ្ទៃមុខ ខណៈពេលកំពុងដេកនៅក្នុងអង្រឹង។ ហេតុការណ៍នេះកើតឡើងកាលពីវេលាម៉ោង៩ និង៣០នាទីយប់ ថ្ងៃទី១៣ ឧសភា នៅក្បែររោងការមួយស្ថិតក្នុងភូមិសំឡីខាងជើង ឃុំសំឡី ស្រុកកំពង់រោទ៍។
យុវជនរងគ្រោះឈ្មោះភិន ភក្តី អាយុ១៨ឆ្នាំ មានទីលំនៅក្នុងភូមិគោករវៀង សង្កាត់ព្រៃអង្គញ់ ក្រុងបាវិត ជាអ្នកដើរចាក់ធុងបាស់តាមរោងការ។ ចំណែកជនបង្កឈ្មោះហេង សុខី ភេទប្រុស អាយុ២៧ឆ្នាំ មានទីលំនៅក្នុងភូមិសំឡីខាងជើង។ សមត្ថកិច្ចឱ្យដឹងថាខណៈម្ចាស់ដើមការ និងភ្ញៀវកំពុងរាំវង់កំសាន្ត ហេង សុខី បានដើរទៅប្រាប់ភិន ភក្តី ឱ្យចាក់បទញាក់វិញ។ ដោយសារតែសំដីទ្រគោះបោះបោកដាច់សាច់ពេកទើបជនរងគ្រោះមិនព្រមចាក់តាមទេជាហេតុធ្វើឱ្យហេង សុខី ខឹងក៏អុកឡុកមិនឱ្យចាក់ធុងបាស់បន្តទេ។
សមត្ថកិច្ចបន្តទៀតថា ដោយសារមានការអុកឡុករោងការបែបនេះម្ចាស់ដើមការបានទៅប្រាប់ស្ត្រីជាប្រពន្ធរបស់ហេង សុខី ឱ្យហៅប្តីទៅផ្ទះវិញ។ ពេលប្រពន្ធមកដល់ហេង សុខី ដេញប្រពន្ធទៅផ្ទះមុនដោយរូបគេនៅផឹកបន្តិចទៀតទើបទៅតាមក្រោយ រួចដើរចូលតុអង្គុយផឹកបន្ត។ ស្របពេលនោះភិន ភក្តី បើកបាស់ឱ្យភ្ញៀវរាំបន្តទៀត គឺចាក់បទរាំវង់ដដែល ។ រហូតដល់ម៉ោងជាង១រំលងអធ្រាត្រ ខណៈងងុយដេកពេក ភិន ភក្តី ឱ្យអ្នកជំនួសចូលចាក់ម្តង ឯរូបគេដើរទៅដេកក្នុងអង្រឹងក្បែរម៉ាស៊ីនភ្លើងក្រោយរោងការ។
ប្រភពដដែលបន្តថា ពេលជនរងគ្រោះដេកលង់លក់នោះហេង សុខី យកព្រនង់ប៉ុនកំភួនជើងវាយក្បាលបណ្តាលឱ្យបែក និងប្រកាច់ធ្លាក់ពីលើអង្រឹង ព្រមទាំងស្រែកហៅឱ្យគេជួយ ។ ភ្លាមនោះជនបង្ករត់គេចខ្លួនបាត់ ។ ជនរងគ្រោះត្រូវគេនាំយកទៅសង្គ្រោះភ្លាមៗនៅមន្ទីរពេទ្យបង្អែកជីភូ។ លុះព្រឹកស្អែកឡើងថ្ងៃទី១៤ ឧសភា សមត្ថកិច្ចឃាត់ខ្លួនជនជាប់ចោទនៅវេលាម៉ោង១០នៅផ្ទះរបស់គេហើយកសាងសំណុំរឿងបញ្ជូនទៅកាន់ស្នងការដ្ឋាននគរបាលខេត្តដើម្បីចាត់ការបន្ត។ ជនរងគ្រោះកំពុងស្ថិតនៅក្នុងសភាពធ្ងន់ធ្ងរនៅឡើយ ហើយគ្រូពេទ្យកំពុងជួយសង្គ្រោះ ៕
ចែករំលែកព័តមាននេះ