សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានពន្យល់ពីការធ្វើដំណើរក្រៅប្រទេសរបស់សម្តេចថា មិនមែន ដើម្បីតែពាក់អាវធំ និងថតរូបទេ ប៉ុន្តែគឺដើម្បីបង្ហាញអំពី
សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានពន្យល់ពីការធ្វើដំណើរក្រៅប្រទេសរបស់សម្ដេចថា មិនមែន ដើម្បីតែពាក់អាវធំ និងថតរូបទេ ប៉ុន្តែគឺដើម្បីបង្ហាញអំពីគោលនយោបាយរបស់រដ្ឋាភិបាល អាណត្តិថ្មីនេះ។
នៅចំពោះមុខអ្នកគាំទ្រជាពលរដ្ឋកម្ពុជា ជាង២៥០០នាក់ ដែលរស់នៅអាមេរិក និងកាណាដា សម្ដេចធិបតី បានមានប្រសាសន៍ថា «ក្នុងរយៈពេលមួយខែកន្លងមក សម្តេចធិបតី បានធ្វើដំណើរចេញក្រៅប្រទេសទៅប្រជុំកំពូលអាស៊ាន នៅឥណ្ឌូនេស៊ី ទៅទស្សនកិច្ចផ្លូវការនៅប្រទេសចិន ទៅចូលរួមពិព័រណ៍ចិន-អាស៊ាន និងចុងក្រោយមកកាន់ទីក្រុងញ៉ូវយ៉ក ប្រទេសអាមេរិក ដើម្បីចូលរួមមហាសន្និបាតអង្គការសហប្រជាជាតិ។
សម្តេចបានចោទសួរថា «តើនេះគឺដើម្បីគ្រាន់តែពាក់អាវធំបង្ហាញមុខ ដើម្បីថតរូប?»។ សម្តេចបានឆ្លើយនឹងសំណួរនេះថា «គឺមិនដូច្នេះទេ»។ សម្តេចធ្វើដំណើរក្រៅប្រទេសនេះ គឺមានការងារ៣ដែលត្រូវធ្វើក្នុងពេលដំណាលគ្នា គឺការងារនយោបាយ ការងារការទូត និងការងារសេដ្ឋកិច្ច។
អ្វីដែលគួរអោយកត់សម្គាល់នៅអាមេរិក សម្តេចធិបតីបានជួបពិភាក្សាការងារជាមួយលោកស្រី វ៉ិចតូរីយ៉ា នូលែន (Victoria Nuland) អនុរដ្ឋមន្ត្រីការបរទេស ស្តីទីអាមេរិក ហើយជាលទ្ធផលនោះ គឺអាមេរិក បានចាប់ផ្តើមផ្តល់ជំនួយ១៨លានដុល្លារឡើងវិញដល់កម្ពុជា។ នេះជាចំណុចរបត់ដ៏វិជ្ជមានមួយ សម្រាប់ទំនាក់ទំនងរវាងកម្ពុជា និងអាមេរិក។
នៅមហាសន្និបាតសហប្រជាជាតិ សម្តេចធិបតី ក៏បានពន្យល់យ៉ាងច្បាស់លើបញ្ហាដ៏រសើបទាក់ទងនឹងមូលដ្ឋានទ័ពជើងទឹកសមុទ្ររាម ដោយគូសបញ្ជាក់ជាថ្មីថា កម្ពុជាមិនអនុញ្ញាតអោយមានវត្តមាន យោធាបរទេសនៅកម្ពុជាឡើយ ដូចទៅនឹងអ្វីដែលបានចែងក្នុងរដ្ឋធម្មនុញ្ញកម្ពុជា៕
ចែករំលែកព័តមាននេះ