អាមេរិកបានសម្រេចផ្តល់ជំនួយ១៨លានដុល្លារឡើងវិញដល់ប្រទេសកម្ពុជា។ នេះគឺជាសញ្ញាដ៏វិជ្ជមានមួយដែលថា ប្រទេសមហាអំណាចពិភពលោក និងប្រទេសកម្ពុជា កំពុងប្រឹងត្រួសត្រាយផ្លូវ ដើម្បីធ្វើអោយប្រសើរឡើងវិញក្នុងទំនាក់ទំនងទ្វេភាគី។
អាមេរិកបានសម្រេចផ្តល់ជំនួយ១៨លានដុល្លារឡើងវិញដល់ប្រទេសកម្ពុជា។ នេះគឺជាសញ្ញាដ៏វិជ្ជមានមួយដែលថា ប្រទេសមហាអំណាចពិភពលោក និងប្រទេសកម្ពុជា កំពុងប្រឹងត្រួសត្រាយផ្លូវ ដើម្បីធ្វើអោយប្រសើរឡើងវិញក្នុងទំនាក់ទំនងទ្វេភាគី។
ទំនាក់ទំនងរវាងកម្ពុជា និងអាមេរិក ឡើងចុះៗតាមទំនោរនៃមេដឹកនាំ និងចរន្តនៃសាកលលោក ប៉ុន្តែក្រោមរដ្ឋបាលថ្មី និងគោលនយោបាយច្បាស់លាស់ សង្ឃឹមថា អាមេរិក នឹងយល់ពីកម្ពុជា ហើយអាចនឹងលើកកម្ពស់កម្រិត នៃទំនាក់ទំនងរវាងប្រទេសទាំងពីរ អោយដល់កម្រិតមួយថ្មី ។
ទំនាក់ទំនងល្អរវាងកម្ពុជា និងអាមេរិក ក៏ជាផ្នែកដ៏សំខាន់មួយដែលនឹងជួយដល់សេដ្ឋកិច្ចកម្ពុជា ខណៈអាមេរិក គឺជាទីផ្សារធំជាងគេ នៃការនាំចេញផលិតផលសម្លៀកបំពាក់ និងស្បែកជើង។
នៅក្រោយការបោះឆ្នោតអាណត្តិទី៧ កន្លងទៅថ្មីៗនេះ សហរដ្ឋអាមេរិក បានប្រកាសផ្អាកជំនួយដែលមានតម្លៃប្រមាណជា ១៨ លានដុល្លារ ដែលជួយកម្ពុជាតាមរយៈទីភ្នាក់ងារអាមេរិក សម្រាប់ការអភិវឌ្ឍអន្តរជាតិ ប៉ុន្តែក្រោយជំនួបរវាងសម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ដែលបានចូលកាន់តំណែង ក្រោយការបោះឆ្នោតនេះ ជាមួយនឹងលោកស្រី វ៉ិចតូរីយ៉ា នូលែន អនុរដ្ឋមន្ត្រីការបរទេសស្ដីទីអាមេរិក នៅមុនពេលថ្លែងទៅកាន់មហាសន្និបាតអង្គការសហប្រជាជាតិលើកទី៧៨ នៅទីក្រុងញូវយ៉ក កាលពីថ្ងៃទី២២ ខែកញ្ញា សហរដ្ឋអាមេរិក បានសម្រេចចិត្តផ្តល់ជំនួយនេះឡើងវិញ ។
ដោយឡែកនៅក្នុងជំនួបជាមួយនឹងសហគមន៍ជនជាតិខ្មែរ នៅសហរដ្ឋអាមេរិក និងកាណាដា ក្នុងទីក្រុងញូវយ៉ក ដែលត្រូវនឹងពេលព្រឹកព្រលឹមម៉ោងនៅកម្ពុជា ថ្ងៃទី២៤ ខែកញ្ញា សម្តេចធិបតី ហ៊ុន ម៉ាណែត ក៏បានបញ្ជាក់ប្រកបដោយមោទនភាព នៃការពង្រឹង និងពង្រីកនៃទំនាក់ទំនងរវាងមហាអំណាចនេះ ជាមួយនឹងកម្ពុជាផងដែរ ។
តាមប្រសាសន៍នៅក្នុងកម្មវិធីនោះ សម្តេចធិបតី បានបង្ហាញនូវសេចក្តីសង្ឃឹមនៃការធ្វើឲ្យរីកចម្រើននៃចំណងការទូតរបស់ប្រទេសទាំងពីរ ដោយនៅក្នុងនោះ សម្តេចមិនបានបង្ហើបលំអិត នៃខ្លឹមសារ នៃការពិភាក្សារទាំងអស់ទេ ប៉ុន្តែសម្តេចបានបញ្ជាក់យ៉ាងច្បាស់ៗ ទាក់ទងនឹងចំណុចរសើបនៃទំនាក់ទំនងរវាងប្រទេសទាំងពីរ ពាក់ព័ន្ធនឹងសមុទ្ររាម ។
សម្តេចធិបតី បានប្រាប់ថ្នាក់ដឹកនាំការទូតអាមេរិកច្បាស់ៗអំពីបញ្ហានេះ និងក៏បានបញ្ជាក់យ៉ាងមោះមុត និងច្បាស់លាស់ អំពីគោលនយោបាយកម្ពុជា នៅក្នុងពេលថ្លែងទៅកាន់ មហាសន្និបាតអង្គការសហប្រជាជាតិលើកទី៧៨ផងដែរ ។
ក្នុងឋានៈជានាយករដ្ឋមន្ត្រីថ្មីនៃកម្ពុជា សម្តេចធីបតី ហ៊ុន ម៉ាណែត បានអះអាងសារជាថ្មីអំពី គោលនយោបាយការបរទេសរបស់រាជរដ្ឋាភិបាលថា កម្ពុជានឹងបន្តស្ថិតនៅលើមាគ៌ាបច្ចុប្បន្ន នៃគោលនយោបាយការបរទេសឯករាជ្យ និងអព្យាក្រឹត ដោយផ្អែកលើនីតិរដ្ឋ ការគោរពគ្នាទៅវិញទៅមកដោយស្មើភាពគ្នា និងប្រកាន់ខ្ជាប់នូវគោលការណ៍នៃធម្មនុញ្ញអង្គការ សហប្រជាជាតិ ដើម្បីលើកកម្ពស់ផលប្រយោជន៍ជាតិ ពង្រឹងមិត្តភាពដែលមានស្រាប់ និងកសាងចំណងមិត្តភាពបន្ថែមទៀត។
សម្តេចធិបតី បានបន្ថែមថា កម្ពុជានៅតែប្រកាន់ជំហរប្រឆាំងនឹងការគំរា.មកំហែ.ង ឬការប្រើ ប្រាស់កម្លាំងក្នុងទំនាក់ទំនងអន្តរជាតិ ការជ្រៀតជ្រែកកិច្ចការផ្ទៃក្នុង និងការឈ្លានពានប្រឆាំង នឹងប្រទេសឯករាជ្យដទៃទៀត។
នៅក្នុងនោះពាក់ព័ន្ធនឹងចំណុចដែលរសើប សម្តេចធិបតីសង្កត់ធ្ងន់ថា កម្ពុជាមិនអនុញ្ញាតឱ្យមូលដ្ឋានយោធាបរទេសណាមួយតាំងនៅលើទឹកដីរបស់ខ្លួន ដូចដែលមានចែងយ៉ាងច្បាស់ក្នុងរដ្ឋធម្មនុញ្ញរបស់កម្ពុជា។ កម្ពុជានឹងមិនអនុញ្ញាតឱ្យប្រទេសណាមួយ ឬក្រុមណាមួយ ប្រើ ប្រាស់ទឹកដីរបស់ខ្លួនប្រឆាំងនឹងប្រទេសមួយផ្សេងទៀតឡើយ។
សម្ដេចធិបតី ហ៊ុន ម៉ាណែត បានមានប្រសាសន៍ថា កម្ពុជានឹងខិតខំបន្ថែមទៀត ដើម្បីពង្រឹង និងពង្រីកកិច្ចសហប្រតិបត្តិការល្អជាមួយប្រទេសជុំវិញពិភពលោក តាមរយៈក្របខណ្ឌទ្វេភាគី តំបន់ និងអន្តរជាតិ ដើម្បីរួមចំណែកដល់សន្តិភាព សន្តិសុខ ស្ថិរភាព ការអភិវឌ្ឍប្រកបដោយ ចីរភាព និងវិបុលភាពរបស់ពិភពលោក។
កម្ពុជា និងអាមេរិក បានបង្កើតទំនាក់ទំនងការទូតនឹងគ្នានៅថ្ងៃទី២៩ ខែមិថុនា ឆ្នាំ១៩៥០ ហើយក្រោយមកអាមេរិកបានបើកស្ថានទូតនៅក្នុងថ្ងៃទី២៥ ខែមិថុនា ឆ្នាំ១៩៥២ ហើយក៏រអាក់រអួលចាប់ពីទសវត្សរ៍នៃឆ្នាំ១៩៦០ ជាបន្តបន្ទាប់ រហូតដល់ផ្ទុះរដ្ឋប្រ.ហារ ហើយអាមេរិកគាំទ្ររដ្ឋាភិបាល និងប្រកាសប្រទេសជាសាធារណៈរដ្ឋ នៅក្នុងឆ្នាំ១៩៧០ ដល់ឆ្នាំ១៩៧៥ ក៏កាត់ផ្តាច់ការទូត រហូតដល់ឆ្នាំ១៩៩១ ទើបអាមេរិកបានស្តារទំនាក់ទំនងការទូតកម្ពុជាឡើង វិញ រួមទាំងការបញ្ចប់ការដាក់ទណ្ឌកម្មសេដ្ឋកិច្ច ហើយបន្តផ្តល់ជំនួយអភិវឌ្ឃន៍ឡើងវិញ ។
ចាប់តាំងពីពេលនោះមកដល់ពេលនេះ ក្រោមគោលនយោបាយអព្យាក្រិត្យមិនចូល បក្សសម្ព័ន្ធ ដូចដែលសម្តេចធិបតីបានរៀបរាប់ខាងលើ ទំនាក់ទំនងរបស់ប្រទេសទាំងពីរ នៅតែបន្ត ប៉ុន្តែពេលខ្លះក៏អាប់អួ ពេលខ្លះប្រសើរ ប៉ុន្តែទោះបីជាយ៉ាងណាក៏ដោយ ក្រោមមគ្គុទេសភាព នៃការដឹកនាំរបស់សម្តេចដែលទទួលការអប់រំពីសហរដ្ឋអាមេរិក សង្ឃឹមថា ទំនាក់ទំនងរវាង ប្រទេសទាំងពីរនឹងអាចមានស្ថេរភាព ហើយអាចនឹងវិវត្តន៍ឈាន ទៅចំណុចរបត់មួយថ្មី ។ ដោយ ៖ ហេង ចេស្តារ
ចែករំលែកព័តមាននេះ