ក្មេងស្រីម្នាក់ ជិះម៉ូតូជ្រែពេញផ្លូវ រួចថតបង្ហោះហ្វេសប៊ុក ត្រូវសមត្ថកិច្ចនាំមកអប់រំ
- ព្រៃវែង
ខេត្តព្រៃវែង ៖ កម្លាំងនគរបាលស្រុកកំពង់ត្របែក កាលពីរសៀលថ្ងៃទី២១ កញ្ញា បាននាំខ្លួនក្មេងស្រី
ខេត្តព្រៃវែង ៖ កម្លាំងនគរបាលស្រុកកំពង់ត្របែក កាលពីរសៀលថ្ងៃទី២១ កញ្ញា បាននាំខ្លួនក្មេងស្រីម្នាក់យកមកធ្វើការអប់រំណែនាំ នៅអធិការដ្ឋាននគរ បាលស្រុក ក្រោយពីស្រាវជ្រាវរកឃើញថា ក្មេងស្រីរូបនោះបានជិះម៉ូតូជ្រែពេញផ្លូវ និងបានថតរូបបង្ហោះលើបណ្ដាញសង្គមហ្វេសប៊ុក ធ្វើឲ្យប៉ះដល់សណ្តាប់ធ្នាប់សង្គម។
លោកវរសេនីយ៍ឯក សួន សំអឿន អធិការនគរបាលស្រុកកំពង់ត្របែកបានឲ្យដឹងថា កាលពីព្រឹកថ្ងៃទី ២២ កញ្ញា សមត្ថកិច្ចបានប្រទះឃើញឃ្លីបវីដេអូមួយនៅក្នុងបណ្ដាញសង្គមហ្វេសប៊ុក បង្ហាញអំពីសកម្មភាពក្មេងស្រីម្នាក់ បានជិះម៉ូតូជ្រែពេញផ្លូវ នៅលើកំណាត់ផ្លូវជាតិលេខ១ ដែលសកម្មភាពនេះវាធ្វើឲ្យប៉ះពាល់ខ្លាំងដល់សណ្ដាប់ធ្នាប់សង្គម និងអាចបង្កឲ្យមានគ្រោះថ្នាក់ផងដែរ។
លោកអធិការបានបន្តទៀតថា ក្រោយប្រទះឃើញឃ្លីបវីដេអូនេះភ្លាម កម្លាំងសមត្ថកិច្ចស្រុកកំពុងត្របែក បានចុះស្រាវជ្រាវភ្លាម រហូតរកឃើញអត្តសញ្ញាណក្មេងស្រី និងឈានទៅដល់នាំខ្លួនយកមកធ្វើការអប់រំនៅអធិការដ្ឋាននគរបាលស្រុក នៅរសៀលថ្ងៃទី២២ កញ្ញាតែម្ដង។
នៅចំពោះមុខសមត្ថកិច្ច ក្មេងស្រីរូបនេះបានសារភាពថា រូបនាងពិតជាបានធ្វើសកម្មភាពជិះម៉ូតូជ្រែពេញផ្លូវមែន ដោយមានមិត្តភក្កិជិះម៉ូតូតាមថតពីក្រោយ ហើយបានបង្ហោះរូបភាពនេះចូលទៅក្នុងបណ្ដាញសង្គមហ្វេសប៊ុក កាលពីថ្ងៃទី២០ កញ្ញា លុះស្អែកឡើងក៏ត្រូវសមត្ថកិច្ចនាំខ្លួនមកអប់រំតែម្ដង។
ក្រោយពីក្មេងស្រីរូបនេះបានសារភាពទទួលស្គាល់កំហុស និងបានសន្យាឈប់ប្រព្រឹត្តខុសតទៅទៀត នៅរសៀលថ្ងៃដដែលនេះ សមត្ថកិច្ចស្រុកកំពង់ត្របែក ក៏បានហៅឪពុកម្ដាយក្មេងស្រីមកកាន់អធិការដ្ឋាននគរបាលស្រុក ដើម្បីធ្វើកិច្ចសន្យាធានាយកកូនស្រីត្រឡប់ទៅផ្ទះវិញ នៅល្ងាចថ្ងៃដដែលនេះផងដែរ ៕
ចែករំលែកព័តមាននេះ