ព្រះអង្គម្ចាស់អារ៉ាប៊ី សាអូឌីត តបបែបណា ក្រោយរងការចោទថា ប្រើវិស័យកីឡាលុបលាងទង្វើអាក្រក់
អារ៉ាប៊ីសាអូឌីត ៖ ព្រះអង្គម្ចាស់ Mohammed bin Salman រាជទាយាទអារ៉ាប៊ីសាអូឌីតមានព្រះបន្ទូលថា
អារ៉ាប៊ីសាអូឌីត ៖ ព្រះអង្គម្ចាស់ Mohammed bin Salman រាជទាយាទអារ៉ាប៊ីសាអូឌីតមានព្រះបន្ទូលថា ព្រះអង្គមិនខ្វល់សោះឡើយ ចំពោះការចោទប្រកាន់ថា ព្រះអង្គកំពុងប្រើវិស័យកីឡា លុបលាងទង្វើអាក្រក់ទ្រង់។ ការលើកឡើងនេះ កើតឡើងបន្ទាប់ពីរងការចោទប្រកាន់ថា វិនិយោគវិស័យកីឡា និងប្រើប្រាស់ព្រឹត្តិការណ៍ធំៗ នៅក្នុងវិស័យនេះ ដើម្បីបង្កើនកេរ្តិ៍ឈ្មោះលើឆាកអន្តរជាតិរបស់ទ្រង់។
មូលនិធិវិនិយោគសាធារណៈរបស់អារ៉ាប៊ីសាអូឌីត ដែលហៅកាត់ថា PIF បានទិញយកក្លិបសារិកាព្រៃ Newcastle United កាលពីឆ្នាំមុន ព្រមទាំងបានបង្កើតការប្រកួតព្រឹត្តិការណ៍កីឡាវាយកូនគោលលំដាប់ពិភពលោក LIV Golf ផងដែរ។
ព្រះអង្គម្ចាស់ Bin Salman មានព្រះបន្ទូលទៅកាន់ Fox News ថា «ប្រសិនបើការប្រើប្រាស់វិស័យកីឡា នឹងបង្កើន GDP ប្រទេសខ្ញុំ ១% នោះយើងនឹងបន្តធ្វើវាទៀត។ ខ្ញុំមិនខ្វល់អំពីពាក្យអស់ទាំងនោះទេ ប្រទេសខ្ញុំមានកំណើន GDP ១% ដែលបានមកពីវិស័យកីឡា ហើយខ្ញុំមានបំណងចង់បាន ១.៥%។ ដូច្នេះចោទប្រកាន់តាមអ្វីដែលអ្នកចង់បានចុះ យើងនឹងទទួលបាន ១.៥% នោះ»។
អារ៉ាប៊ីសាអូឌីតរងការរិះគន់ និងចោទប្រកាន់ចំពោះការរំលោភសិទ្ធិមនុស្សដ៏ធ្ងន់ធ្ងរ បន្ទាប់ពីបុរសចំនួន៨១នាក់ ត្រូវបានប្រហារជីវិតត្រឹមតែ១ថ្ងៃ កាលពីឆ្នាំមុន។ ព្រះរាជាណាចក្រឈូងសមុទ្រមួយនេះ ក៏រងការចោទប្រកាន់អំពី ការរំលោភសិទ្ធិនារី ឧក្រិដ្ឋកម្មនៃការស្រឡាញ់ភេទដូចគ្នា ការរឹតបន្តឹងសេរីភាពនៃការបញ្ចេញមតិ និងសង្គ្រាមនៅក្នុងប្រទេសយេមែន (Yemen) ។
ការស្លាប់លោក Jamal Khashoggi ក្នុងឆ្នាំ ២០១៨ អ្នកកាសែតឯករាជ្យរបស់អារ៉ាប៊ីសាអូឌីត ដែលមានមូលដ្ឋាននៅសហរដ្ឋអាមេរិក ដែលជាអ្នករិះគន់ដ៏លេចធ្លោលើរដ្ឋាភិបាលអារ៉ាប៊ីសាអូឌីត ជាពិសេសព្រះអង្គម្ចាស់ Bin Salman ។ អ្នកកាសែតរូបនេះ ត្រូវបានឃាតករសម្លាប់នៅក្នុងស្ថានកុងស៊ុលអារ៉ាប៊ីសាអូឌីត ប្រចាំទីក្រុងអ៊ីស្តង់ប៊ុល ប្រទេសតួកគី។
អ្នកធ្វើយុទ្ធនាការសិទ្ធិមនុស្សបានលើកឡើងថា វិស័យកីឡា ត្រូវបានរដ្ឋាភិបាលអារ៉ាប៊ីសាអូឌីត ប្រើប្រាស់ដើម្បីបង្វែរទង្វើអាក្រក់របស់ពួកគេ ដែលមានជាយូរមកហើយ។ ការទិញអាជីវកម្មមានកេរ្តិ៍ឈ្មោះខ្ពស់ដូចជា ក្លិប Newcastle ឬ LIV Golf គឺជាការចូលរួមក្នុងវិស័យកីឡា ដែលបំផ្លាញកំណត់ត្រាសិទ្ធិមនុស្សដ៏គួរឱ្យរន្ធត់របស់ប្រទេសនេះ។ បច្ចុប្បន្ន ទឹកប្រាក់ដ៏មហាសាលរបស់អារ៉ាប៊ីសាអូឌីតដែលចំណាយ កំពុងជន់លិចក្នុងកីឡាបាល់ទាត់ និងកីឡាផ្សេងៗទៀត ដោយបានបង្កើតចំណងជើងល្អៗភាគច្រើន ប៉ុន្តែនៅពីក្រោយរឿងអាស្រូវ នៃប្រតិបត្តិការទាំងនោះ អាជ្ញាធររបស់អារ៉ាប៊ីសាអូឌីត កំពុងមមាញឹកក្នុងការបង្ក្រាបសិទ្ធិមនុស្ស។
សូមជម្រាបថា មូលនិធិវិនិយោគសាធារណៈរបស់អារ៉ាប៊ីសាអូឌីត គឺស្ថិតក្នុងចំណោមមូលនិធិទ្រព្យសម្បត្តិអធិបតេយ្យដ៏ធំបំផុតនៅលើពិភពលោក ដែលបច្ចប្បន្ននេះ មានទ្រព្យសម្បត្តិសរុបរហូតដល់ ៧៧៦ពាន់លានដុល្លារអាមេរិក៕ (ប្រភពពី BBC)
ចែករំលែកព័តមាននេះ