ADផ្ទាំងផ្សព្វផ្សាយពាណិជ្ជកម្ម

ឥណ្ឌា និងកាណាដាឈ្លោះគ្នាបែកផ្សែង និងត្រៀមកាត់បន្ថយបុគ្គលិកស្ថានទូតគ្នាទៅវិញទៅមក

1 ឆ្នាំ មុន

២២ ខែ កញ្ញា ឆ្នាំ ២០២៣ ម៉ោង ០៣:១៣

ញូដេលី៖ រដ្ឋាភិបាលឥណ្ឌាថ្លែងថាខ្លួនចង់កាត់បន្ថយចំនួនបុគ្គលិកស្ថានទូតកាណាដាប្រចាំប្រទេសឥណ្ឌា និងសម្រេចចិត្តថាលែងផ្ដល់ទិដ្ឋាការតទៅទៀតសម្រាប់កាណាដា។ ការថ្លែងដូចនេះនៅពេលប្រទេសទាំង២កំពុងតែឈ្លោះគ្នាបែកផ្សែងពាក់ព័ន្ធនឹងការធ្វើឃាតមេនិកាយស៊ីក (Sikh)នៅលើទឹកដីកាណាដា និងជាមេចលនាប្រឆាំងនឹងរដ្ឋាភិបាលទីក្រុងញូដេលី។ នាយករដ្ឋមន្ត្រីកាណាដា លោកទ្រូដូ ស្នើសុំឱ្យប្រទេសឥណ្ឌាយកចិត្តទុកដាក់ខ្ពស់ចំពោះការសង្ស័យថាទីភ្នាក់ងារសម្ងាត់ឥណ្ឌានៅពីក្រោយសំណុំរឿងធ្វើឃាតកាលពីខែមិថុនាក្បែរទីក្រុងវេនឃូវើ (Vancouver)។…

ញូដេលី៖ រដ្ឋាភិបាលឥណ្ឌាថ្លែងថាខ្លួនចង់កាត់បន្ថយចំនួនបុគ្គលិកស្ថានទូតកាណាដាប្រចាំប្រទេសឥណ្ឌា និងសម្រេចចិត្តថាលែងផ្ដល់ទិដ្ឋាការតទៅទៀតសម្រាប់កាណាដា។ ការថ្លែងដូចនេះនៅពេលប្រទេសទាំង២កំពុងតែឈ្លោះគ្នាបែកផ្សែងពាក់ព័ន្ធនឹងការធ្វើឃាតមេនិកាយស៊ីក (Sikh)នៅលើទឹកដីកាណាដា និងជាមេចលនាប្រឆាំងនឹងរដ្ឋាភិបាលទីក្រុងញូដេលី។

នាយករដ្ឋមន្ត្រីកាណាដា លោកទ្រូដូ ស្នើសុំឱ្យប្រទេសឥណ្ឌាយកចិត្តទុកដាក់ខ្ពស់ចំពោះការសង្ស័យថាទីភ្នាក់ងារសម្ងាត់ឥណ្ឌានៅពីក្រោយសំណុំរឿងធ្វើឃាតកាលពីខែមិថុនាក្បែរទីក្រុងវេនឃូវើ (Vancouver)។ ប្រទេសទាំង២បណ្ដេញអ្នកការទូតគ្នាទៅវិញទៅមក, ខណៈដែលរដ្ឋាភិបាលទីក្រុងញូដេលីប្រកែកដាច់ខាតថាខ្លួនគ្មានជាប់ពាក់ព័ន្ធនឹងការធ្វើឃាតនេះទេ។ រដ្ឋាភិបាលឥណ្ឌាចាត់ទុកថានោះជាការចោទប្រកាន់ដែលឥតសមហេតុផល។

តាមពិត ប្រទេសទាំង២មានបញ្ហារកាំរកូសតាំងពីមុននេះទៅទៀត។ ដល់ពេលផ្ទុះសំណុំរឿងធ្វើឃាតនេះឡើង, វារឹតតែធ្វើឱ្យទំនាក់ទំនងធ្លាក់ចុះកាន់តែខ្លាំង។ មេនិកាយស៊ីក និងក្រុមរបស់គាត់និយាយរិះគន់រដ្ឋាភិបាលឥណ្ឌា ហើយត្រូវរដ្ឋាភិបាលឥណ្ឌាចាត់ទុកជាក្រុមភេរវកម្ម និងក្រុមឃាតករ។ ឥណ្ឌាធ្លាប់បានស្នើសុំឱ្យកាណាដាចាត់ការទៅលើក្រុមនេះថែមទៀតផង។

ឥណ្ឌាជូនដំណឹងទៅរដ្ឋាភិបាលកាណាដាថាប្រទេសទាំង២ត្រូវតែធ្វើយ៉ាងណាឱ្យបុគ្គលិកទូតមានចំនួនប្រហាក់ប្រហែលគ្នា។ ឥណ្ឌាសង្កេតឃើញថាចំនួនបុគ្គលិកទូតកាណាដាច្រើនជាងឥណ្ឌាឆ្ងាយណាស់។ ដូច្នេះ ត្រូវតែកាត់បន្ថយ។ រដ្ឋាភិបាលឥណ្ឌាថ្លែងថាខ្លួនសម្រេចចិត្តឈប់ផ្ដល់សេវាទិដ្ឋាការនៅប្រទេសកាណាដាតទៅទៀតហើយ។ ឥណ្ឌាបកស្រាយថាបញ្ហានេះដោយសារមានការគំរាមកំហែងចំពោះសន្តិសុខ។ ឥណ្ឌាថ្លែងថាបញ្ហាសន្តិសុខប៉ះពាល់ការបំពេញការងាររបស់បុគ្គលិក។

ត្រឹមតែប៉ុន្មានម៉ោងមុននេះប៉ុណ្ណោះ, កាណាដាថ្លែងថាខ្លួននឹងបញ្ចុះចំនួនបុគ្គលិកទូតរបស់ខ្លួននៅឥណ្ឌាបន្ទាប់ពីពួកគេរងការមាក់ងាយពីសំណាក់អ្នកលេងបណ្ដាញសង្គមនៅឥណ្ឌា។ ដោយយោងទៅលើស្ថានភាពបច្ចុប្បន្នដែលមានភាពតានតឹងកាន់តែខ្លាំង, យើងត្រូវតែធានាសុវត្ថិភាពសម្រាប់បុគ្គលិកទូតរបស់យើង។ ខាងលើនេះជាការជូនដំណឹងរបស់កាណាដា។

កាណាដាមិនបានធ្វើអត្ថាធិប្បាយលម្អិតថានឹងដកបុគ្គលិកទូតប៉ុន្មាននាក់ចេញពីប្រទេសឥណ្ឌាទេ។ ប៉ុន្តែការិយាល័យទំនាក់ទំនងរបស់ខ្លួននៅតែបើកដំណើរជាធម្មតា។ កាណាដាចង់ធានាសុវត្ថិភាពជូនបុគ្គលិកទូតរបស់ខ្លួនទាំងអស់។ យើងរំពឹងថាឥណ្ឌានឹងធានាសន្តិសុខជូនបុគ្គលិកទូត និងមន្ត្រីកុងស៊ុលរបស់យើង ដូចអ្វីដែលយើងផ្ដល់ជូនពួកគេនៅប្រទេសកាណាដា។

សូមរម្លឹកថាកាលពីថ្ងៃចន្ទ កាណាដាបណ្ដញអ្នកការទូតម្នាក់របស់ឥណ្ឌាដែលសង្ស័យថាជាប្រធានក្រុមស៊ើបការណ៍សម្ងាត់របស់ឥណ្ឌាប្រចាំកាណាដា។ មិនយូរប៉ុន្មាន ឥណ្ឌាក៏បណ្ដេញបុគ្គលិកទូតកាណាដាម្នាក់ដើម្បីជាការសងសឹក។ ក្រោយមក ឥណ្ឌាអំពាវនាវឱ្យជនជាតិរបស់ខ្លួន រួមទាំងសិស្ស-និស្សិតដែលកំពុងស្ថិតនៅលើទឹកដីកាណាដាសូមបង្កើនការប្រុងប្រយ័ត្នព្រោះអាចនឹងមានការប្រព្រឹត្តបទឧក្រិដ្ឋ ឬអំពើហិង្សានយោបាយ។ កាណាដាក៏សម្រេចចិត្តផ្អាកការផ្ដល់ទិដ្ឋាការតែម្ដង។

គួរកត់សម្គាល់ថាមេនិកាយស៊ីកឈ្មោះនីហ្សា (Nijjar) ត្រូវជនដៃដល់២នាក់ដែលឃ្លុំមុខជិតពាក់ម៉ាស់ជិតមុខបាញ់សម្លាប់នៅខាងក្បែរវត្តអារាម១កន្លែងនៃប្រទេសកាណាដា។ គាត់ជាមនុស្សដែលរដ្ឋាភិបាលឥណ្ឌាចង់ចាប់ខ្លួនបំផុតដោយចោទប្រកាន់ពីបទភេរវកម្ម និងរៀបគម្រោងធ្វើឃាត។ រដ្ឋាភិបាលឥណ្ឌាចោទប្រកាន់ថាកាណាដាធ្វើព្រងើយៗចំពោះការស្នើសុំរបស់ខ្លួនដើម្បីចាត់ការក្រុមនេះដែលឥណ្ឌាចាត់ទុកជាក្រុមជ្រុលនិយម។ ពួកគេគាំទ្រការបំបែកទឹកដីរបស់ឥណ្ឌានៅភាគខាងជើង៕

ប្រភព៖ Channel News Asia
https://www.channelnewsasia.com/world/india-reduction-canada-diplomats-row-sikh-murder-visa-services-3788731