រាជធានីភ្នំពេញ ៖ អនុប្រធានទី១ អាជ្ញាធរមីន បានដឹកនាំកិច្ចប្រជុំអន្តរក្រសួងសម្រាប់ត្រៀមរៀបចំសន្និសីទសកល ស្តីពីជំនួយដល់ជនរងគ្រោះដោយសារមីនប្រឆាំងមនុស្ស និងសំណល់ជាតិផ្ទុះពីសង្គ្រាម និងសិទ្ធិជនពិការ លើកទី៣ ដែលកម្ពុជា…
រាជធានីភ្នំពេញ ៖ អនុប្រធានទី១ អាជ្ញាធរមីន បានដឹកនាំកិច្ចប្រជុំអន្តរក្រសួងសម្រាប់ត្រៀមរៀបចំសន្និសីទសកល ស្តីពីជំនួយដល់ជនរងគ្រោះដោយសារមីនប្រឆាំងមនុស្ស និងសំណល់ជាតិផ្ទុះពីសង្គ្រាម និងសិទ្ធិជនពិការ លើកទី៣ ដែលកម្ពុជា ក្នុងការធ្វើជាម្ចាស់ផ្ទះ នឹងប្រព្រឹត្តិទៅចាប់ពីថ្ងៃទី១៧-១៩ ខែតុលា ឆ្នាំ២០២៣ ។
ទេសរដ្ឋមន្ត្រី និងជាអនុប្រធានទី១ អាជ្ញាធរមីន ឯកឧត្តម លី ធុជ ដឹកនាំកិច្ចប្រជុំអន្តរក្រសួងនេះ ធ្វើឡើងនាថ្ងៃទី២១ ខែកញ្ញា ឆ្នាំ២០២៣ នៅទីស្នាក់ការអាជ្ញាធរមីន ។
ឯកឧត្តម លី ធុជ បានបញ្ជាក់ក្នុងអង្គប្រជុំថា ការទទួលធ្វើជាម្ចាស់ផ្ទះ នៃសន្និសីទសកលនេះ អាជ្ញាធរមីន ដែលជាសេនាធិការឲ្យរាជរដ្ឋាភិបាល បានទទួលការអនុញ្ញាតពីសម្តេចតេជោ ហ៊ុន សែន អតីតនាយករដ្ឋមន្ត្រីកម្ពុជា និងក្រោមកិច្ចសហការជាមួយអង្គភាពគាំទ្រការអនុវត្ត អនុសញ្ញាអន្តរជាតិ ស្តីពីការហាមការប្រើប្រាស់ ការរក្សាទុក ការផលិត និងការផ្ទេរគ្រាប់មីនប្រឆាំងមនុស្ស និងការបំផ្លាញគ្រាប់មីន អនុសញ្ញាអូតាវ៉ា (ISU-APMBC) ដែលមានគណៈប្រតិភូមកពីជាង ៤០ ប្រទេសចូលរួម។
ឯកឧត្តម បានគូសបញ្ជាក់បន្ថែមថា ក្នុងនាម សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី និងជាប្រធានអាជ្ញាធរមីន និងក្នុងនាមប្រជាជនកម្ពុជា លោកមានមោទនភាព ដែលប្រទេសកម្ពុជា បានក្លាយជាប្រទេសទី១ នៅតំបន់អាស៊ី និងជាទី៣ នៅលើពិភពលោក ទទួលធ្វើជាម្ចាស់ផ្ទះរៀបចំសន្និសីទសកលនេះ ក្រោមក្របខណ្ឌអនុសញ្ញាអន្តអនុសញ្ញាអូតាវ៉ា ដែលកម្ពុជាបានក្លាយជារដ្ឋភាគីកាលពីឆ្នាំ២០០០ ។
ក្នុងឱកាសនោះឯកឧត្តម លី ធុជ ក៏បានស្នើសុំឲ្យគ្រប់ភាគីពាក់ព័ន្ធទាំងអស់ បន្តសហការគ្នាឲ្យកាន់តែជិតស្និទ្ធ យកចិត្តទុកដាក់ខ្ពស់ក្នុងការរៀបចំឲ្យគ្រប់ជ្រុងជ្រោយ និងទទួលបដិសណ្ឋារកិច្ចឲ្យបានកក់ក្តៅ ចំពោះគណៈប្រតិភូដែលនឹងត្រូវអញ្ជើញចូលរួមក្នុងសន្និសីទសកល រយៈពេល ៣ថ្ងៃនេះ ដើម្បីជាកិត្តិយស និងឧត្តមប្រយោជន៍សម្រាប់ប្រទេស និងប្រជាជនកម្ពុជាទាំងមូល៕
ចែករំលែកព័តមាននេះ