ក្រុមហ៊ុនអចលនទ្រព្យចិនដ៏ធំមួយទៀត ដាក់ពាក្យសុំការពារក្ស័យធននៅអាមេរិក
ប្រទេសចិន ៖ ក្រុមហ៊ុនអភិវឌ្ឍន៍អចលនទ្រព្យឈានមុខគេមួយទៀត របស់ប្រទេសចិន Sunac បាន
ប្រទេសចិន ៖ ក្រុមហ៊ុនអភិវឌ្ឍន៍អចលនទ្រព្យឈានមុខគេមួយទៀត របស់ប្រទេសចិន Sunac បានដាក់ពាក្យការពារក្ស័យធន នៅសហរដ្ឋអាមេរិកភ្លាមៗ បន្ទាប់ពីបានទទួលការយល់ព្រមពីម្ចាស់បំណុលខ្លួន ដើម្បីការរៀបចំរចនាសម្ព័ន្ធបំណុល ដែលមានតម្លៃជិត១០ពាន់លានដុល្លារ។ ក្រុមហ៊ុននេះ បានដាក់ញត្តិការពារជំពូកទី១៥ ទៅកាន់តុលាការក្ស័យធនរបស់អាមេរិក សម្រាប់សង្កាត់ភាគខាងត្បូង នៃទីក្រុងញូវយ៉ក កាលពីថ្ងៃទី១៩ ខែកញ្ញា ឆ្នាំ២០២៣ កន្លងទៅ។
តាមរយៈការដាក់ពាក្យនេះ មានន័យថា Sunac គឺជាក្រុមហ៊ុនអភិវឌ្ឍន៍អចលនទ្រព្យចិន ដែលជួបវិបត្តិធំទី២ បន្ទាប់ពី Evergrande Group ដែលក្រុមហ៊ុនអភិវឌ្ឍន៍អចលនទ្រព្យដ៏បំផុតមួយរបស់ចិន ដែលបានដាក់ពាក្យការពារក្ស័យធនជំពូកទី១៥ នៅអាមេរិក កាលពីមួយខែមុន ក្រោយប្រកាសពីការខាតបង់ចំនួន ៨១ពាន់លានដុល្លារក្នុងរយៈពេល២ឆ្នាំចុងក្រោយនេះ ខណៈក្រុមហ៊ុនដែលធ្លាប់ជាអ្នកអភិវឌ្ឍន៍អចលនទ្រព្យ ដែលលក់ដាច់បំផុតរបស់ចិនមួយនេះ បានជំពាក់បំណុលច្រើនជាង ៣០០ពាន់លានដុល្លារឯណោះ។
ការចូលក្នុងដំណើរការនេះ តុលាការក្ស័យធនអាមេរិក អាចជួយក្រុមហ៊ុន Sunac ចរចាជាមួយអ្នកផ្តល់ប្រាក់កម្ចីបរទេស ដើម្បីជួសជុលបំណុលរបស់ខ្លួន។ កាលពីដើមសប្តាហ៍នេះ ក្រុមហ៊ុនបានបញ្ជាក់ក្នុងឯកសារផ្សារហ៊ុនហុងកុងថា ខ្លួនបានទទួលការយល់ព្រមពីម្ចាស់បំណុលជាង ២,០០០ ដើម្បីរៀបចំរចនាសម្ព័ន្ធឡើងវិញនូវបំណុលចំនួន ៩.៩ពាន់លានដុល្លារ ក៏ដូចជាការទូទាត់ការប្រាក់ ដែលជំពាក់អ្នកវិនិយោគនៅក្រៅប្រទេស។ Sunac គឺជាក្រុមហ៊ុនអភិវឌ្ឍន៍អចលនទ្រព្យធំជាងគេទី១០ របស់ចិន នៅក្នុងខែសីហា ដោយការចុះកិច្ចសន្យាលក់។ ប៉ុន្តែមុនជួបបញ្ហានៅឆ្នាំ ២០២២ ក្រុមហ៊ុននេះ គឺឈរនៅលំដាប់ទី៣របស់ចិន។
លោកស្រី Sandra Chow សហប្រធានស្រាវជ្រាវអាស៊ីប៉ាស៊ីហ្វិកនៅ CreditSights ដែលជាក្រុមហ៊ុនស្រាវជ្រាវទីផ្សារឥណទានបានលើកឡើងថា Sunac គឺជាក្រុមហ៊ុនអភិវឌ្ឍន៍អចលនទ្រព្យធំដំបូងរបស់ចិន ដែលឈ្នះការយល់ព្រមបែបនេះ។ លោកស្រីបានប្រាប់សារព័ត៌មាន CNN ថា កិច្ចព្រមព្រៀងស្រដៀងគ្នានេះ ធ្លាប់ត្រូវបានសម្រេចដោយអ្នកអភិវឌ្ឍន៍តូចៗ ដែលពាក់ព័ន្ធនឹងចំនួនទឹកប្រាក់តិចជាងនេះ។
លោកស្រីបន្តថា Evergrande Group ដែលជាក្រុមហ៊ុនអភិវឌ្ឍន៍ដ៏ធំរបស់ចិន ក៏កំពុងស្វែងរកការរៀបចំរចនាសម្ព័ន្ធបំណុលនៅឯនាយសមុទ្ររបស់ខ្លួនឡើងវិញផងដែរ បើទោះបីជាវាមានសំណាងតិចជាងក្នុងការឈ្នះម្ចាស់បំណុលនៅក្រៅប្រទេស ដោយសារតែវាបានផ្តល់នូវលក្ខខណ្ឌអំណោយផលតិចជាង។
ដូចក្រុមហ៊ុនអភិវឌ្ឍន៍អចលនទ្រព្យរបស់ចិនជាច្រើនផ្សេងទៀតដែរ Sunac បាននឹងកំពុងប្រឈមមុខនឹងវិបត្តិសាច់ប្រាក់កាន់តែអាក្រក់ទៅៗ ជាមួយនឹងការធ្លាក់ចុះនៃការលក់នៅទូទាំងឧស្សាហកម្មនេះ និងបានធ្វើឱ្យអ្នកអភិវឌ្ឍន៍ជាច្រើនមិនអាចសងបំណុលរបស់ពួកគេ។ បំណុលសរុបរបស់ Sunac ឈានដល់ ១៣៧.៦ពាន់លានដុល្លារ កាលពីចុងឆ្នាំមុន ដូចគ្នានឹងការលក់បានធ្លាក់ចុះ ៥០% នៅក្នុងឆ្នាំ ២០២២ បើប្រៀបធៀបទៅនឹងឆ្នាំមុន។ នេះបើយោងតាមរបាយការណ៍ប្រចាំឆ្នាំចុងក្រោយបំផុតរបស់ក្រុមហ៊ុន៕ (ប្រភពពី CNN)
ចែករំលែកព័តមាននេះ