ខេត្តត្បូងឃ្មុំ ៖ នៅក្នុងរដូវវស្សាទឹកទន្លេបានហក់ឡើងជាបន្តបន្ទាប់ និងហូរកួចត្របាញ់ទៀតផង ដែលជាហេតុធ្វើឲ្យបាក់ច្រាំងទន្លេនៅចំណុចក្រោយផ្ទះរបស់លោកតាឈ្មោះស្រួល អាយុ៧០ឆ្នាំ ជាខ្មែរ-ឥស្លាម ស្ថិតនៅភូមិវិហារក្រោម ឃុំបឹងព្រួល ស្រុកត្បូងឃ្មុំ…
ខេត្តត្បូងឃ្មុំ ៖ នៅក្នុងរដូវវស្សាទឹកទន្លេបានហក់ឡើងជាបន្តបន្ទាប់ និងហូរកួចត្របាញ់ទៀតផង ដែលជាហេតុធ្វើឲ្យបាក់ច្រាំងទន្លេនៅចំណុចក្រោយផ្ទះរបស់លោកតាឈ្មោះស្រួល អាយុ៧០ឆ្នាំ ជាខ្មែរ-ឥស្លាម ស្ថិតនៅភូមិវិហារក្រោម ឃុំបឹងព្រួល ស្រុកត្បូងឃ្មុំ ។ ការបាក់ច្រាំងទន្លេនេះ បានកើតឡើង កាលពីម៉ោង០១យប់រំលងអធ្រាត្រ ឈានចូលព្រឹកថ្ងៃទី២០ កញ្ញា ឆ្នាំ២០២៣ បានធ្វើឲ្យសមាជិកក្រុមគ្រួសារផ្ទះមួយនេះ នាំគ្នារុះរើផ្ទះដោយមានកិច្ចសហការជាមួយអាជ្ញាធរមូលដ្ឋានជួយអន្តរាគមន៍ផងដែរ ។
លោកស៊្រី ម៉ៅ មេឃុំបឹងព្រួលបានប្រាប់តាមទូរសព្ទឱ្យដឹងថា ចំណុចទីតាំងដែលច្រាំងទន្លេបាក់នេះ ជាជ្រោយឡូយជាងគេ ស្របពេលដែលទឹកទន្លេហក់ឡើងមក ជាហេតុធ្វើឲ្យបាក់ដែលមានបណ្ដោយប្រវែងប្រមាណ២០ម៉ែត្រ គឺកាន់តែកៀកលំនៅឋានរបស់ប្រជាពលរដ្ឋរូបនេះ ។
នៅព្រឹកមិញនេះដែរ រូបលោកបានចុះទៅពិនិត្យដោយផ្ទាល់ភ្នែក ឱ្យប្រជាការពាររបស់ឃុំសហការជាមួយនឹងកងកម្លាំងនគរបាល ដើម្បីជួយអន្តរាគមន៍រុះរើលំនៅឋានចេញដើម្បីបង្ការកុំឲ្យមានហេតុការគ្រោះថ្នាក់ណាមួយកើតឡើង ។
លោកមេឃុំបឹងព្រួលមានប្រសាសន៍បន្តឲ្យដឹងទៀតថា គិតរហូតវេលាមកដល់ម៉ោងជិត៣ រសៀលថ្ងៃទី២០ កញ្ញា គឺសមាជិកម្ចាស់ផ្ទះរបស់ឈ្មោះស្រូល បាននាំគ្នារុះរើផ្ទះបានប្រមាណជាង៣០ភាគរយហើយ គឺជាប្រភេទផ្ទះឈើពីខ្នងក្បឿង។ ដោយម្ចាស់ផ្ទះសហការជាមួយកម្លាំងប្រជាការពារព្រមទាំងសមត្ថកិច្ចបានបន្តនាំគ្នារុះរើ មកដាក់នៅកន្លែងដីទំនេរមួយដុំហើយម្ចាស់ផ្ទះនិងរកទីតាំងថ្មីនៅឆ្ងាយពីច្រើនទន្លេដើម្បីសាងសង់ផ្ទះហ្នឹងមានសុវត្ថិភាព ។
សូមបញ្ជាក់ថា កាលពីឆ្នាំ២០២២កន្លងទៅ នៅទីតាំងដដែលនេះ ច្រាំងទន្លេបានបាក់មកកល់និងដល់ផ្ទះរបស់បងប្អូនខ្មែរឥស្លាមឈ្មោះសុះ បានរុះរើយកទៅសាងសង់នៅកន្លែងផ្សេង។ ហើយទីតាំងដែលបាក់ច្រាំងនេះប្រសិនបើថ្នាក់លើមានការគិតគូររៀបចំបើកខ្សាច់ដាក់ទប់ច្រាំងទន្លេដូចនៅចំណុចកំកំពុងឫស្សី ឃុំជីរោទិ៍ទី១នោះ គឺមិនមានបាក់បន្តទៀតទេ ។
លោកមេឃុំបឹងព្រួលបញ្ជាក់ថា ប្រសិនបើគ្រោះធម្មជាតិបាក់ច្រាំងបន្តចូលមកទៀតចម្ងាយ៥០ម៉ែត្រនោះនឹងធ្វើឲ្យប៉ះពាល់លំនៅដ្ឋានប្រជាពលរដ្ឋជាច្រើនខ្នងមិនខាន ។ តែបើពិនិត្យមើលស្ថានភាពជាក់ស្ដែងច្រើនទន្លេមិនអាចបាក់ជ្រៅបន្តទៀតឡើយ ។ អាជ្ញាធរមូលដ្ឋានតែងតែគិតគូរជួយដល់ប្រជាពលរដ្ឋរងគ្រោះដោយបាក់ច្រាំងទន្លេ ដូចជាករណីនេះជាដើមគឺរាយការជូនទៅថ្នាក់លើដើម្បីយកអំណោយចាយជូនដល់គ្រួសាររងគ្រោះដោយធម្មជាតិផ្ទះរបស់ឈ្មោះស្រូល។
ចំណែកលោកសយ ទូច អភិបាលស្រុកក្រូចឆ្មារវិញប្រាប់ឲ្យដឹងដែរថា នៅតាមដងទន្លេក្នុងស្រុកក្រូចឆ្មារមិនទាន់មានផ្ទះរបស់ប្រជាពលរដ្ឋណាមួយ ត្រូវយារយីដោយការបាក់ច្រាំងទន្លេនៅឡើយទេ ។
ចែករំលែកព័តមាននេះ