អាជ្ញាធរជាតិអប្សរា បានយកចិត្តទុកដាក់ថែរក្សាជួសជុល អភិរក្សប្រាង្គប្រាសាទ តាមមធ្យោបាយបណ្ដុះបណ្ដាលអ្នកបន្តវេនឱ្យយល់ដឹងពីជំនាញបច្ចេកទេស ដើម្បីរួមគ្នាអភិរក្ស។ ក្នុងនោះមានកូនខ្មែរមួយចំនួន បានស្ម័គ្រចិត្តធ្វើជាអ្នកជួសជុលប្រាសាទឥដ្ឋ ព្រោះតែ
ខេត្តសៀមរាប ៖ អាជ្ញាធរជាតិអប្សរា បានយកចិត្តទុកដាក់ថែរក្សាជួសជុល អភិរក្សប្រាង្គប្រាសាទ តាមមធ្យោបាយបណ្ដុះបណ្ដាលអ្នកបន្តវេនឱ្យយល់ដឹងពីជំនាញបច្ចេកទេស ដើម្បីរួមគ្នាអភិរក្ស។ ក្នុងនោះមានកូនខ្មែរមួយចំនួន បានស្ម័គ្រចិត្តធ្វើជាអ្នកជួសជុលប្រាសាទឥដ្ឋ ព្រោះតែពួកគេមានក្តីស្រឡាញ់ និងចង់ថែរក្សាកេរដំណែលដូនតាខ្មែរឱ្យនៅគង់វង្ស។
លោក ជួន វង្ស អាយុ៣០ឆ្នាំ ជាអ្នកភូមិឪឡោក ឃុំបាគង នៃស្រុកប្រាសាទបាគង គឺជាអ្នកចូលរួមជួសជុលប្រាសាទម្នាក់ ក្នុងចំណោមអ្នករួមការងារជាច្រើនទៀត។ លោកមានប្រសាសន៍ថា លោកបានធ្វើជាអ្នកជួសជុលប្រាសាទឥដ្ឋនេះចំនួន៤ឆ្នាំមកហើយ។ លោក វង្ស បានឱ្យដឹងបន្តទៀតថា ដោយសារការរស់នៅក្បែរប្រាសាទតាំងពីតូច និងការស្រឡាញ់កេរដំណែលដូនតាខ្មែរផងនោះ ក៏ជំរុញឱ្យលោកចូលបម្រើការងារជាអ្នកជួសជុលប្រាសាទឥដ្ឋ ព្រោះតែចិត្តចង់ចូលរួមថែរក្សាកេរដូនតាសម្រាប់ក្មេងជំនាន់ក្រោយបន្តទៀត។
ចំណែកលោក សែន ស៊ុង អាយុជាង៣០ឆ្នាំ គឺជាអ្នកជួសជុលប្រាសាទឥដ្ឋរយៈពេលជាង១០ឆ្នាំ ក៏បានមានប្រសាសន៍ដែរថា ប្រាសាទបុរាណដែលដូនតាខ្មែរយើងបានកសាង គឺអស្ចារ្យគ្មានពីរនៅលើលោក។ ការចូលរួមជួសជុលប្រាសាទបុរាណ គឺជាសំណាងរបស់លោក ព្រោះតែប្រាសាទបុរាណដ៏មានតម្លៃ អាយុកាលខ្ទង់ពាន់ឆ្នាំ ដោយសាងពីឥដ្ឋ និងពីថ្មធំៗស្កឹមស្កៃ និងមិនមានមនុស្សច្រើនទេ ដែលបានចូលរួមថែរក្សាសម្បត្តិដូនតាដោយផ្ទាល់ដូច្នេះឡើយ។
លោក ជួន វង្ស និង លោក សែន ស៊ុង ក៏បានផ្តាំផ្ញើដល់កូនខ្មែរគ្រប់រូប សូមចូលរួមថែរក្សាប្រាសាទបុរាណ ដែលជាកេរដំណែលដូនតា កុំធ្វើសកម្មភាពណាមួយដែលនាំឱ្យបាត់បង់តម្លៃប្រាសាទ និងសូមកុំគូសវាសលើថ្ម ឬឥដ្ឋ ដែលនាំឱ្យខូចខាតដល់ប្រាសាទ ព្រោះប្រាសាទ បុរាណ គឺជារបស់យើងទាំងអស់គ្នា៕
ចែករំលែកព័តមាននេះ