ខេត្តព្រះសីហនុ ៖ លោក ស កក្កដា អភិបាលក្រុងព្រះសីហនុបានឱ្យដឹងថា ដើម្បីរៀបចំសោភ័ណភាពសណ្ដាប់ធ្នាប់សាធារណៈក្នុងក្រុងព្រះសីហនុ, រដ្ឋបាលក្រុងបានជូនដំណឹងស្តីពីការរៀបចំសណ្តាប់ធ្នាប់របៀបរៀបរយ តាមបណ្ដោយផ្លូវលេខ៨០០ ស្ថិតក្នុងភូមិសាស្ត្រសង្កាត់លេខ២…
ខេត្តព្រះសីហនុ ៖ លោក ស កក្កដា អភិបាលក្រុងព្រះសីហនុបានឱ្យដឹងថា ដើម្បីរៀបចំសោភ័ណភាពសណ្ដាប់ធ្នាប់សាធារណៈក្នុងក្រុងព្រះសីហនុ, រដ្ឋបាលក្រុងបានជូនដំណឹងស្តីពីការរៀបចំសណ្តាប់ធ្នាប់របៀបរៀបរយ តាមបណ្ដោយផ្លូវលេខ៨០០ ស្ថិតក្នុងភូមិសាស្ត្រសង្កាត់លេខ២ និងសង្កាត់លេខ៤ ក្រុង ខេត្តព្រះសីហនុ ដែលមានទីលំនៅតាមបណ្ដោយផ្លូវលេខ៨០០ បានជ្រាបថា៖ កន្លងមក រដ្ឋបាលក្រុងព្រះសីហនុ សង្កេតឃើញមានប្រជាពលរដ្ឋមួយចំនួនដែលមានទីលំនៅតាមបណ្ដោយផ្លូវលេខ៨០០ បានសាងសង់ផ្ទះ សំយ៉ាប របង ស្លាកសញ្ញា និងដាក់តាំងលក់ដូរសម្ភារផ្សេងៗ រំលោភលើដីចំណីផ្លូវសាធារណៈរបស់រដ្ឋ។
ដើម្បីលើកកម្ពស់សោភ័ណភាព សណ្តាប់ធ្នាប់ទីក្រុងឱ្យកាន់តែមានភាពល្អប្រសើរ រដ្ឋបាលក្រុងព្រះសីហនុនឹងចាប់ផ្ដើមធ្វើការវាស់វែងកំណត់ចំណីផ្លូវលេខ៨០០ ឱ្យស្របទៅតាមប្លង់ប្រព័ន្ធសុរិយោដី ចាប់ពីថ្ងៃទី២០ ខែកញ្ញា ឆ្នាំ២០២៣ ទន្ទឹមនឹងនេះ រដ្ឋបាលក្រុងព្រះសីហនុ សូមធ្វើការណែនាំដល់ប្រជាពលរដ្ឋដែលមានទីលំនៅតាមបណ្តោយផ្លូវនេះ ត្រូវរុះរើសំណង់មិនរៀបរយ និងជញ្ជូនសម្ភាររបស់ខ្លួន ចេញពីចំណីផ្លូវសាធារណៈរបស់រដ្ឋ ក្នុងរយៈពេល១៥ថ្ងៃ បន្ទាប់ពីធ្វើការវាស់វែង និងកំណត់ព្រំចំណីផ្លូវរួច។
ផុតកាលកំណត់ រដ្ឋបាលក្រុងព្រះសីហនុ នឹងចាត់វិធានការរុះរើ ដោយមិនទទួលខុសត្រូវលើការខូចខាត និងបាត់បង់សម្ភារឡើយ។ អាស្រ័យដូចនេះ រដ្ឋបាលក្រុងសង្ឃឹម និងជឿជាក់ថាប្រជាពលរដ្ឋ ដែលរស់នៅតាមបណ្ដោយផ្លូវលេខ៨០០ ក្នុងភូមិសាស្ត្រសង្កាត់លេខ ២ និងសង្កាត់លេខ ៤ ចូលរួមសហការក្នុងការរៀបចំសោភ័ណភាពសណ្ដាប់ធ្នាប់របៀបរៀបរយសាធារណៈក្នុងក្រុង។
ចែករំលែកព័តមាននេះ