ភ្នំពេញ៖ ប្រាសាទបុរាណរបស់​កម្ពុជាយើង ដែលជាសម្បត្តិបេតិកភណ្ឌ មិនអាចកាត់ថ្លៃបាន ចំនួន ៤ហើយ ត្រូវបានដាក់បញ្ចូល​ក្នុងបញ្ជីបេតិកភណ្ឌវប្បធម៌ពិភពលោក របស់អង្គការយូណេស្កូ​​។ ក្នុងនោះ រួមមាន៖ ប្រាសាទអង្គរវត្ត ប្រាសាទ​ព្រះវិហារ ប្រាសាទសំបូរព្រៃគុក និងប្រាសាទ​កោះកេរ។​

១-រមណីយដ្ឋានប្រាសាទអង្គរ ​ត្រូវបានដាក់បញ្ចូល​ក្នុងបញ្ជីបេតិកភណ្ឌវប្បធម៌ពិភពលោក នៅទីក្រុងសាន់តាហ្វេ សហរដ្ឋអាមេរិក នៅថ្ងៃទី១៤ ខែធ្នូ ឆ្នាំ១៩៩២។​

២-រមណីយដ្ឋានប្រាសាទព្រះវិហារ ត្រូវបានដាក់បញ្ចូល​ក្នុងបញ្ជីបេតិកភណ្ឌវប្បធម៌ពិភពលោក នៅថ្ងៃទី៧ ខែកក្កដា ឆ្នាំ២០០៨ នៅទីក្រុងកេបិក ប្រទេសកាណាដា​។

៣-រមណីយដ្ឋាន​តំបន់ប្រាសាទ​សំបូរព្រៃគុក ត្រូវបានដាក់បញ្ចូល​ក្នុងបញ្ជីបេតិកភណ្ឌវប្បធម៌ពិភពលោក នៅទីក្រុង​ក្រាកូវ ប្រទេសប៉ូឡូញ កាលពីថ្ងៃទី៨ ខែកក្កដា ឆ្នាំ២០១៧​។

៤-រមណីយដ្ឋាន​ ប្រាសាទ​កោះកេរ ត្រូវបានដាក់បញ្ចូល​ក្នុងបញ្ជីបេតិកភណ្ឌវប្បធម៌ពិភពលោក នៅទីក្រុងរីយ៉ាដ ប្រទេស​អារ៉ាប៊ីសាអូឌីត នៅថ្ងៃទី១៧ ខែកញ្ញា ឆ្នាំ២០២៣​។

ក្រៅពី​ប្រាសាទបុរាណ ដែលជា​សម្បត្តិ​វប្បធម៌​រូបី ទាំង ៤នេះ កម្ពុជា ក៏បានដាក់បញ្ចូល​សម្បត្តិវប្បធម៌អរូបី ចំនួន ៦​ទៀត ចូល​ទៅក្នុងបញ្ជីបេតិកភណ្ឌពិភពលោក របស់អង្គការយូណេស្កូ​​ រួមមាន៖

១-របាំព្រះរាជទ្រព្យ ចុះក្នុងបញ្ជី​បេតិកភណ្ឌ​ពិភពលោក នៅថ្ងៃទី៧ ខែវិច្ឆិកា ឆ្នាំ២០០៣

២-​ល្ខោនស្រមោលស្បែក ឬល្ខោន​ស្បែក​ធំ ចុះក្នុងបញ្ជី​បេតិកភណ្ឌ​ពិភពលោក នៅថ្ងៃទី២៥ ខែវិច្ឆិកា ឆ្នាំ២០០៥​

៣-ល្បែងទាញព្រ័ត្រ ចុះក្នុងបញ្ជី​បេតិកភណ្ឌ​ពិភពលោក នៅថ្ងៃទី២ ខែធ្នូ ឆ្នាំ២០១៥​ ( កម្ពុជា ជាសមាជិកមួយ ក្នុងចំណោម ៤ប្រទេស ដែលមានល្បែង​ស្រដៀងគ្នានេះ រួមមាន កូរ៉េខាងត្បូង វៀតណាម និងហ្វីលីពីន )​​

៤-ចាប៉ីដងវែង ចុះក្នុងបញ្ជី​បេតិកភណ្ឌ​ពិភពលោក នៅថ្ងៃទី៣០ ខែវិច្ឆិកា ឆ្នាំ២០១៦​

៥-ល្ខោនខោលវត្តស្វាយអណ្តែត ចុះក្នុងបញ្ជី​បេតិកភណ្ឌ​ពិភពលោក នៅថ្ងៃទី២៨ ខែវិច្ឆិកា ឆ្នាំ២០១៨​។

៦-គុនល្បុក្កតោ ចុះក្នុងបញ្ជី​បេតិកភណ្ឌ​ពិភពលោក នៅថ្ងៃទី២៩ ខែវិច្ឆិកា ឆ្នាំ២០២២​៕