រដ្ឋាភិបាលថៃបានសន្យាបង្កើនវិធានការសន្តិសុខដើម្បីធានាសុវត្ថិភាពសម្រាប់ភ្ញៀវទេសចរចិន ខណៈគោលនយោបាយលើកលែងទិដ្ឋាការនឹងចូលជាធរមាននៅសប្តាហ៍ក្រោយ។ នេះបើយោងតាមការចុះផ្សាយរបស់សារព័ត៌មាន VNEXPRESS នៅថ្ងៃទី១៨ ខែកញ្ញា ឆ្នាំ២០២៣។
នៅក្នុងការបង្ហោះហ្វេសប៊ុកកាលពីសប្តាហ៍មុន ស្ថានទូតចិនបាននិយាយថា រដ្ឋាភិបាលរបស់ខ្លួនសប្បាយចិត្តចំពោះចំណាត់ការរបស់ប្រទេសថៃក្នុងការផ្តល់ការលើកលែងទិដ្ឋាការសម្រាប់អ្នកទេសចរចិន និងគាំទ្រគម្រោងនេះ។ ទោះជាយ៉ាងណា ពួកគេបានអំពាវនាវឲ្យរដ្ឋាភិបាលថៃបង្កើនវិធានការការពារសុវត្ថិភាពសម្រាប់ភ្ញៀវទេសចរចិន។
អ្នកទេសចរចិនអាចចូលប្រទេសថៃដោយគ្មានទិដ្ឋាការចាប់ពីថ្ងៃទី២៥ ខែកញ្ញាដល់ថ្ងៃទី២៩ ខែកុម្ភៈឆ្នាំក្រោយបន្ទាប់ពីការសម្រេចចិត្តរបស់រដ្ឋាភិបាលថ្មីកាលពីសប្តាហ៍មុន។
របាយការណ៍កាលពីថ្មីៗនៅលើប្រព័ន្ធផ្សព្វផ្សាយសង្គមដែលអះអាងថាជនជាតិចិនមួយចំនួនត្រូវបានចាប់ជំរិតពេលកំពុងធ្វើដំណើរក្នុងប្រទេសថៃ ដែលធ្វើឱ្យពួកគេមានការព្រួយបារម្ភអំពីសុវត្ថិភាពរបស់ពួកគេ នេះបើតាមការលើកឡើងរបស់លោកស្រី Kanchana Patarachoke អ្នកនាំពាក្យក្រសួងការបរទេសថៃ ដែលត្រូវបានដកស្រង់ដោយកាសែតបាងកកប៉ុស្តិ៍។
លោកស្រី Patarachoke បន្ថែមថា ប្រទេសថៃនឹងខិតខំប្រឹងប្រែងឱ្យអស់ពីលទ្ធភាពដើម្បីធានាសុវត្ថិភាពរបស់ជនជាតិចិន ក៏ដូចជាភ្ញៀវទេសចរមកពីគ្រប់ប្រទេសផ្សេងទៀតផងដែរ។
ក្នុងរយៈពេលប្រាំបីខែដំបូងនៃឆ្នាំនេះ ប្រទេសថៃបានស្វាគមន៍ជនជាតិចិនប្រមាណ ២លាននាក់ ដែលជិតពាក់កណ្តាលនៃគោលដៅចំនួន ៥ លាននាក់ក្នុងឆ្នាំនេះ។ មុនពេលជំងឺរាតត្បាត ភ្ញៀវទេសចរចិនគឺជាទីផ្សារដ៏ធំបំផុតនៃឧស្សាហកម្មទេសចរណ៍របស់ប្រទេសថៃ។ ក្នុងឆ្នាំ២០១៩ ភ្ញៀវទេសចរចិនជាង ១១លាននាក់បានមកទេសចរណ៍ប្រទេសថៃ ដែលស្មើនឹងជាងមួយភាគបួននៃចំនួនភ្ញៀវបរទេសសរុបរបស់ខ្លួន៕
ចែករំលែកព័តមាននេះ