បរទេស ៖ ការ​ប្រកួត​ពានរង្វាន់ UEFA Champions League រដូវ​កាល ២០២៣-២៤ បាន​ចាប់ផ្តើម​ហើយ កាលពី​ថ្ងៃ​ទី​១៩ ខែកញ្ញា ឆ្នាំ​២០២៣ នៅ​ក្នុង​វគ្គ​ចែក​ពូ​ល ហើយ​នៅ​ក្នុង​នោះ ជំនួប​រវាង​ក្រុម​ម្ចាស់ផ្ទះ Lazio ដែល​ស្មើដោយ​លទ្ធផល ១-១ ទល់​នឹង​ក្រុម​ភ្ញៀវ Atletico Madrid ទទួល​ការ​ចាប់អារម្មណ៍​ខ្លាំង​ជាងគេ​បំផុត បន្ទាប់​ពី​អ្នកចាំទី​ក្រុម​ម្ចាស់ផ្ទះ តែ​តបាល់​បញ្ចូល​ទី​នៅ​ម៉ោង​បន្ថែម​វគ្គ​ទី​២ ដើម្បី​សង្គ្រោះ​ក្រុម​ពី​ការ​បរាជ័យ​។

ជំនួប​ពូ​ល E ដែល​ធ្វើ​ឡើង​នៅ​កីឡដ្ឋាន Olimpico ក្រោម​ក្រសែភ្នែក​អ្នក​ទស្សនា​ជាង ៤៦,០០០​នាក់ ក្រុម​ភ្ញៀវ Atletico Madrid បាន​បើក​ការ​នាំមុខ​មុន​នៅ​នាទី​២៩ ដោយ​ខ្សែបម្រើ​ប្រយុទ្ធ Pablo Barrios លទ្ធផល​នេះ រក្សា​រហូត​ដល់​ម៉ោង​បន្ថែម​តង់​ទី​២​។ ក្រុម​ម្ចាស់ផ្ទះ Lazio មានឱកាស​ទាត់​បាល់​ជ្រុង​ក្នុង​នាទី ៩០+៤ ខណៈ​ដែល​អ្នកចាំទី Ivan Provedel បាន​ឡើង​មក​ចាំតែ​តបាល់​ផង​ដែរ ប៉ុន្តែ​ត្រូវ​បាន​ខ្សែការពារ​ក្រុម AT Madrid ទាត់​ចេញ​ធ្លាក់​ដល់​ជើង​ខ្សែបម្រើ Danilo Cataldi និង​ប​ញ្ចូ​ន​បន្ត​ទៅ​មិត្ត​រួម​ក្រុម​គឺ​ខ្សែបម្រើ​ប្រយុទ្ធ Luis Alberto និង​លើក​បាល់​ចូល​ប្រអប់​គ្រោះថ្នាក់ ហើយ​អ្នកចាំទី Ivan Provedel ក៏​តែ​ត​បញ្ចូល​ទី​តែ​ម្តង​នាទី ៩០+៥ ចំ​ពេល​លោក​អាជ្ញាកណ្តាល Slavko Vincic ផ្លុំ​កញ្ចែ​បញ្ចប់​ការ​ប្រកួត​ជាមួយ​លទ្ធផល ១-១​។

អ្នកចាំទី Ivan Provedel ជនជាតិ​អ៊ី​តា​លី​វ័យ​២៩​ឆ្នាំ បាន​ក្លាយជា​អ្នកចាំទី​ទី​២ ក្នុង​ប្រវត្តិសាស្ត្រ UEFA Champions League ដែល​រក​គ្រាប់​បាល់​បញ្ចូល​ទី​មិនមែន​ជា​ការ​ទាត់​ប៉េ​ណា​ល់​ទី បន្ទាប់​ពី​អ្នកចាំទី Sinan Bolat ជនជាតិ​តួ​ក​គី ដែល​បាន​តែ​ត​បញ្ចូល​ទី​ឱ្យ​ក្រុម Standard Liège តាម​ស្មើ​ក្រុម AZ Alkmaar កាលពី​រដូវ​កាល ២០០៩-១០​។

យ៉ាងណាមិញ នេះ​មិនមែន​ជា​លើក​ទី​១ សម្រាប់​អ្នកចាំទី Ivan Provedel ឡើយ ដែល​រក​គ្រាប់​បាល់​បញ្ចូល​ទី ដោយ​អ្នកចាំទី​រូប​នេះ ក៏​ធ្លាប់តែ​តបាល់​បញ្ចូល​ទី​នៅ​នាទី​៩០+៥ ជួយ​ក្រុម Juve Stabia តាម​ស្មើ​ក្រុម Ascoli នៅ​លី​គ​ទី​២ អ៊ី​តា​លី Serie B កាលពី​រដូវ​កាល ២០១៩-២០ ផង​ដែរ​។

អ្នកចាំទី​ទាំង ៤ រូប ដែល​រក​គ្រាប់​បាល់​បញ្ចូល​ទី​ក្នុង​ប្រវត្តិសាស្ត្រ UEFA Champions League ៖
-Hans-Jörg Butt (​ប៉េ​ណា​ល់​ទី​)
-Sinan Bolat (​តែ​ត​បញ្ចូល​ទី​)
-Vincent Enyeama (​ប៉េ​ណា​ល់​ទី​)
-Ivan Provedel (​តែ​ត​បញ្ចូល​ទី​)៕