ADផ្ទាំងផ្សព្វផ្សាយពាណិជ្ជកម្ម

លោកថាក់ស៊ីនចូលបន្ទប់វះ.កា.ត់កាលពីសប្ដាហ៍មុន, ហើយចាប់ផ្ដើមជាសះមុ.ខ.រ.បួ.សជាបណ្ដើរៗ

1 ឆ្នាំ មុន

២០ ខែ កញ្ញា ឆ្នាំ ២០២៣ ម៉ោង ០៤:៥៧

លោកថាក់ស៊ីនត្រូវគេបញ្ជូនទៅបន្ទប់វះកាត់កាលពីសប្ដាហ៍មុន។ ពេលនេះ មុខរបួសរបស់លោកចាប់ផ្ដើមជាសះស្បើយឡើងវិញជាបណ្ដើរៗហើយ។ នេះបើយោងតាមការបង្ហើបឱ្យដឹងពីកូនស្រីរបស់លោក។ លោកស្រីមិនទាន់ដឹងថាឪពុករបស់ខ្លួនត្រូវសម្រាកព្យាបាលនៅក្នុងមន្ទីរពេទ្យរហូតដល់ពេលណាទេ។ ទន្ទឹមនឹងនោះ, មន្ត្រីពន្ធនាគារបង្ហើបឱ្យដឹងថាលោកថាក់ស៊ីនអាចស្នើសុំនៅក្រៅឃុំនាខែកុម្ភៈ ឆ្នាំ២០២៤។

កូនស្រីលោកថាក់ស៊ីនថ្លែងថាសម្ពាធឈាមរបស់លោកថាក់ស៊ីនពេលខ្លះធម្មតា និងពេលខ្លះហក់ឡើងខ្ពស់ខុសពីធម្មតា។ លោកស្រីសូមមិនធ្វើអត្ថាធិប្បាយលម្អិតពេកទេ ដោយទុកលទ្ធភាពឱ្យអ្នកសារព័ត៌មានសាកសួរគ្រូពេទ្យដែលព្យាបាលជំងឺលោកថាក់ស៊ីន។ គ្រូពេទ្យបញ្ជាក់ថាលោកថាក់ស៊ីនពិតជាបានចូលបន្ទប់វះកាត់ពិតប្រាកដមែន។ ការវះកាត់នេះធ្វើឡើងក្រោមហេតុផលច្រើនយ៉ាង។ ប៉ុន្តែស្ថានភាពជំងឺរបស់លោកថាក់ស៊ីនឥឡូវនេះបានវិលមករកសភាពប្រក្រតីវិញហើយ។

កាលពីថ្ងៃចន្ទ, ក្រុមសកម្មជននយោបាយខ្លះចង់ដឹងបញ្ហាសុខភាពរបស់លោកថាក់ស៊ីន។ ពួកគេចង់ដឹងនេះមិនមែននៅក្នុងន័យល្អប៉ុន្មានទេ។ អ្នកខ្លះធ្វើជាឆ្ងល់ថាតើលោកថាក់ស៊ីនពិតជាមានជំងឺ ឬមានបញ្ហាសុខភាពមែនឬទេ? អ្នកខ្លះថ្លែងថាលោកថាក់ស៊ីនតាំងពីវិលត្រឡប់ចូលប្រទេសថៃវិញ លោកចំណាយពេលជាប់ពន្ធនាគារតែប៉ុន្មានម៉ោងប៉ុណ្ណោះ។ បន្ទាប់មក, លោកសម្រាកព្យាបាលនៅក្នុងមន្ទីរពេទ្យនៃអគ្គស្នងការដ្ឋាននគរបាលជាតិថៃអស់រយៈពេលជិត១ខែចុងក្រោយនេះ។

កូនស្រីលោកថាក់ស៊ីនថ្លែងថាគ្រួសាររបស់លោកស្រីកំពុងគិតគូរដាក់ពាក្យស្នើសុំឱ្យលោកថាក់ស៊ីនបាននៅក្រៅឃុំ។ កាលពីថ្ងៃចន្ទ, នាយកដ្ឋានពន្ធនាគារបង្ហើបឱ្យដឹងថាលោកថាក់ស៊ីនអាចមានសិទ្ធិស្នើសុំនៅក្រៅឃុំលុះត្រាតែអនុវត្តទោសនៅក្នុងពន្ធនាគារបានយ៉ាងតិច៦ខែសិន។ និយាយម៉្យាងទៀតថាលោកអាចស្នើសុំនៅក្រៅឃុំចាប់ពីខែកុម្ភៈ ឆ្នាំ២០២៤។ នាយកដ្ឋាននឹងសម្រេចថាត្រូវអនុញ្ញាតឱ្យលោកថាក់ស៊ីនទទួលសេវាព្យាបាលពីគ្រូពេទ្យដែលនៅខាងក្រៅពន្ធនាគារដែរឬទេ។

សូមរម្លឹកថាលោកថាក់ស៊ីនវិលត្រឡប់ទៅប្រទេសថៃវិញកាលពីថ្ងៃទី២២ ខែសីហា ឆ្នាំ២០២៣បន្ទាប់ពីលោករស់នៅនិរទេសខ្លួនរយៈពេល១៥ឆ្នាំ។ លោកបានបង្ហាញខ្លួននៅក្នុងតុលាការកំពូលដើម្បីស្ដាប់សេចក្ដីសម្រេចរបស់តុលាការដែលតម្រូវឱ្យលោកជាប់ពន្ធនាគារ៨ឆ្នាំ។ នៅយប់ដដែលនោះ គេបានបញ្ជូនលោកទៅសង្គ្រោះបន្ទាន់នៅមន្ទីរពេទ្យនៃអគ្គស្នងការដ្ឋាននគរបាលជាតិថៃ បន្ទាប់ពីលោកមានបញ្ហាសុខភាព។ ថ្ងៃទី១ ខែកញ្ញា ព្រះមហាក្សត្រសព្វព្រះរាជហឫទ័យបន្ធូរបន្ថយទោសលោកថាក់ស៊ីនមកនៅត្រឹមជាប់ពន្ធនាគាររយៈពេល១ឆ្នាំ៕

ប្រភព៖ Bangkok Post
https://www.bangkokpost.com/thailand/politics/2649558/thaksin-had-surgery-last-week-now-recovering-says-daughter