រាជធានីភ្នំពេញ ៖ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានផ្ដាំទៅអ្នកវិភាគមួយចំនួន ដោយសុំឲ្យមានស្មារតីជាតិនិយមខ្លះផង កុំបានតែវាយប្រហារខុសការពិត ។…
រាជធានីភ្នំពេញ ៖ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានផ្ដាំទៅអ្នកវិភាគមួយចំនួន ដោយសុំឲ្យមានស្មារតីជាតិនិយមខ្លះផង កុំបានតែវាយប្រហារខុសការពិត ។
ការអះអាងរបស់សម្ដេចធិបតី ហ៊ុន ម៉ាណែត បែបនេះធ្វើឡើង បន្ទាប់ពីមានអ្នកខ្លះលើកឡើងថា ទំនាក់ទំនងជាមួយប្រទេសចិន នឹងធ្វើឲ្យកម្ពុជា ថ្ងៃណាមួយបាត់បងអធិបតេយ្យភាព។ ពាក់ព័ន្ធការលើកឡើងនេះដែរ សម្ដេចធិបតី នាយករដ្ឋមន្ត្រី ហ៊ុន ម៉ាណែត បានតបវិញយ៉ាងខ្លីថា “កម្ពុជាចេះគិតហើយ” ។
ថ្លែងពិធីជួបសំណេះសំណាលជាមួយបងប្អូន កម្មករនិយោជិក ជិត២ម៉ឺននាក់ នៅក្នុងស្រុកបាទី ខេត្តតាកែវ នាព្រឹកថ្ងៃទី១៩ កញ្ញានេះ សម្ដេចធិបតី ហ៊ុន ម៉ាណែត បានបញ្ជាក់ថា ៖ «អ្នកខ្លះ គេមកព្រមានខ្ញុំ គេថាទំនាក់ទំនងជាមួយចិន នឹងធ្វើឲ្យថ្ងៃណាមួយ កម្ពុជាបាត់បង់អធិបតេយ្យភាព ខ្ញុំថា កម្ពុជាចេះគិតហើយ ខ្ញុំមានកូន កូនរបស់ខ្ញុំ នឹងបង្កើតកូន ខ្ញុំនឹងមានចៅ.. ចៅទួត ចៅលួតចៅលា រាប់សិបឆ្នាំតទៅមុខទៀត ខ្ញុំមិនចង់ឲ្យកូនខ្មែរខ្ញុំ ថ្ងៃណាមួយត្រូវបាត់អត្តសញ្ញាណ ឬមួយគេជាជនជាតិខ្មែរ នៅក្រោមរណប បរទេសណាមួយទេ មិនអាចធ្វើបានទេ សម្ដេចតេជោ និងថ្នាក់ដឹកនាំយើង ក៏ដូចគ្នា មិនឲ្យបាត់អធិបតេយ្យភាព ឯករាជ្យភាព» ទេ។
សម្តេចធិបតី ហ៊ុន ម៉ាណែត ប្រមុខរាជរដ្ឋាភិបាល ក៏បានគូសបញ្ជាក់ថា ៖ «ផ្ដាំទៅអ្នកវិភាគមួយចំនួន ដោយសុំឲ្យមានស្មារតីជាតិនិយមខ្លះផង វាយប្រហារចំណុចខ្សោយរដ្ឋាភិបាល ក៏វាយចុះ ប៉ុន្តែគួរគិតពីអ្វី ដែលផ្ដល់ផលប្រយោជន៍ឲ្យប្រជាជនផ្ទាល់ និងចេះលើកសរសើរ ខ្លះផង» ។
សម្ដេចធិបតីបន្តថា កម្ពុជាចូលប្រជុំជាមួយមិត្តបរទេស ក្នុងស្មារតីគោរពអធិបតេយ្យ និងគោរពផលប្រយោជន៍គ្នាទៅវិញទៅមក ស្មើមុខស្មើមាត់មិនថា ប្រទេសតូចប្រទេសធំ។ សម្ដេចថា ប្រទេសតូចកម្ពុជា នៅអង្គុយទល់មុខប្រធានាធិបតីចិន ស៊ី ជីនពីង ទល់មុខប្រធានសភាចិន ទល់មុខនាយករដ្ឋមន្ត្រីចិន ជប៉ុន និងប្រធានាធិបតីកូរ៉េ ដើម្បីស្មើភាពគ្នា ចរចាក្នុងនាមជារដ្ឋអធិបតេយ្យភាពមួយ ដែលចេញទៅការពារផលប្រយោជន៍ប្រជាពលរដ្ឋ ។
ជាមួយគ្នានោះដែរ សម្តេចធិបតី បានបន្ថែមថា សម្តេចប្រឹងទាក់ម៉ូយ មិនមែនត្រឹមតែក្នុងប្រទេសទេ គឺប្រឹងដល់ក្រៅប្រទេសទៀត ដោយក្នុងរយៈពេលប៉ុន្មានថ្ងៃ មុនទាក់ម៉ូយនៅចិន ជួបក្រុមអ្នកវិនិយោគជាច្រើន ។
សម្ដេចនាយករដ្ឋមន្ត្រី ក៏បានលើកឡើងថា ដំណើរទស្សនកិច្ចផ្លូវការទៅចិន របស់សម្ដេច គឺដើម្បីបញ្ជាក់ជំហរ នៃគោលនយោបាយរបស់កម្ពុជា ដោយប្រកាន់ជំហរនិរន្តរភាព និងសង្គតិភាព ជាមួយគោលនយោបាយរបស់បក្សប្រជាជន ដែលមានពីមុនមក ឈរលើមូលដ្ឋានអធិបតេយ្យភាព ឯករាជ្យភាព ផ្អែកលើច្បាប់ អនុវត្តដោយភាពច្នៃប្រឌិត វៃឆ្លាត និងតម្កល់ផលប្រយោជន៍ជាតិជាធំ នេះជាគោលនយោបាយការបរទេសរបស់កម្ពុជា ជាមួយគ្រប់ប្រ ទេសទាំងអស់ ៕
ចែករំលែកព័តមាននេះ