ជម្រើសជាតិអេស្ប៉ាញជួបបញ្ហាធំ ក្រោយក្រុមកីឡាការិនីបដិសេធការកោះហៅ
អេស្ប៉ាញ ៖ ក្រុមកីឡាការិនីអេស្ប៉ាញបានរំលឹកឡើងវិញថា ពួកគេបានសម្រេចចិត្តធ្វើពហិការមិន
អេស្ប៉ាញ ៖ ក្រុមកីឡាការិនីអេស្ប៉ាញបានរំលឹកឡើងវិញថា ពួកគេបានសម្រេចចិត្តធ្វើពហិការមិនចូលរួមជាមួយក្រុមជម្រើសជាតិ បើទោះបីជាត្រូវបានកោះហៅចូលក្នុងក្រុមយ៉ាងណាក៏ដោយ។ នេះបើយោងតាមប្រភពពី BBC ចេញផ្សាយកាលពីថ្ងៃទី១៨ ខែកញ្ញា ឆ្នាំ២០២៣ កន្លងទៅ។
សមាជិកចំនួន១៥នាក់ នៃក្រុមជម្រើសជាតិនារីអេស្ប៉ាញ ដែលបានឈ្នះពានរង្វាន់ World Cup កាលពីខែមុន ត្រូវបានកោះហៅចូលក្រុមត្រៀមហ្វឹកហាត់ សម្រាប់ការប្រកួតពានរង្វាន់ UEFA Women’s Nations League រដូវកាល ២០២៣-២៤ ដែលនឹងចាប់ផ្តើមដំណាក់កាលដំបូង នៅថ្ងៃទី២១ ខែកញ្ញា ឆាប់ៗខាងមុខនេះ។
កីឡាការីនីមួយក្រុម ដែលមានគ្នារហូតដល់ ៨១នាក់ បានធ្វើពហិការមិនចូលរួមក្រុមជម្រើសជាតិ បន្ទាប់ពីរឿងអាស្រូវរបស់លោក Luis Rubiales អតីតប្រធានសហព័ន្ធ កីឡាបាល់ទាត់អេស្ប៉ាញ ដែលបានថើបមាត់កីឡាការិនី Jenni Hermoso អំឡុងពេលពិធីបំពាក់មេដាយមាសម្ចាស់ជើងឯក World Cup នារី កាលពីខែមុន។
រឿងរ៉ាវនេះ បានបង្កភាពចម្រូងចម្រាសក្នុងប្រទេសអេស្ប៉ាញ ក៏ដូចជាពិភពបាល់ទាត់ទាំងមូល ហើយជាលទ្ធផល លោក Luis Rubiales បានលាលែងពីតំណែងកាលពីថ្ងៃទី១០ ខែកញ្ញា កន្លងទៅ បន្ទាប់ពីត្រូវបានតុលាការអេស្ប៉ាញ និងសហព័ន្ធបាល់ទាត់ពិភពលោក FIFA បើកការស៊ើបអង្កេតលើការប្រព្រឹត្តខុសធ្ងន់ធ្ងរនេះ។
កាលពីសប្តាហ៍មុន កីឡាការិនី ៣៩នាក់ រួមទាំងកីឡាការិនី ២១នាក់នៅក្នុងចំណោម ២៣នាក់ ដែលបានជួយអេស្ប៉ាញឈ្នះជើងឯក World Cup បាននិយាយថា កូដកម្មរបស់ពួកគេនឹងបន្តរហូតដល់មានការផ្លាស់ប្តូរបន្ថែមទៀត ព្រោះពួកគេនៅមិនទាន់មានអារម្មណ៍ថា សុវត្ថិភាពនៅឡើយ។
គួរបញ្ជាក់ថា នេះជាការកោះហៅសមាភាពក្រុមចុងក្រោយដោយលោកស្រី Montse Tome ដែលគ្រូបង្វឹកថ្មីជំនួសលោក Jorge Vilda ដែលជាមិត្តជិតស្និទ្ធរបស់លោក Luis Rubiales ដែលត្រូវបានបណ្តេញចេញពីតំណែងកាលពីដើមខែនេះ ខណៈ លោកស្រី Montse Tome បានក្លាយជាស្ត្រីដំបូងគេ ដែលកាន់តំណែងជាគ្រូបង្វឹកក្រុមជម្រើសជាតិនារីរបស់អេស្ប៉ាញ។
កាលពីថ្ងៃទី១៨ ខែកញ្ញា កន្លងទៅថ្មីៗនេះ សហព័ន្ធបាល់ទាត់អេស្ប៉ាញបានជំរុញឱ្យកីឡាការិនីដែលធ្វើកូដកម្មវិលចូលក្រុមជម្រើសជាតិវិញ ដោយស្ថាប័ននេះ បានលើកឡើងថា កីឡាការិនីមានកាតព្វកិច្ចក្នុងការលេង ប្រសិនបើត្រូវបានកោះហៅ៕ (ប្រភពពី BBC)
ចែករំលែកព័តមាននេះ