ខេត្តស្វាយរៀង ៖ អំណោយជាថវិការបស់សប្បុរសជនដែលផ្តល់ជូនតាមរយៈសារព័ត៌មានកោះសន្តិភាពត្រូវបានពាំនាំទៅប្រគល់ដល់ដៃលោកយាយតូច សុន កាលពីវេលាម៉ោង៨ព្រឹក ថ្ងៃទី១៥ ឧសភា នៅខាងមុខខ្ទមលោកយាយដែលស្ថិតក្នុងភូមិថ្នា ឃុំគោកព្រីង ស្រុកស្វាយជ្រំ ព្រមទាំងមានវត្តមានលោកមេភូមិ អនុភូមិ និងប្រជាពលរដ្ឋជាច្រើននាក់បានចូលរួមជាសាក្សីផងដែរ ។ អំណោយជាថវិកាទាំងនេះបានមកពីសន្តានចិត្តអាណិតអាសូររបស់សប្បុរសជនជាច្រើនរូបដែលក្នុងនោះរួមមាន ១-ឯកឧត្តមបណ្ឌិតអ៊ុក រ៉ាប៊ុន និងលោកជំទាវគឹម រ៉ាវី ៤០ម៉ឺនរៀល ២-លោកឧកញ៉ាស្រី ងួន និងលោកជំទាវឧកញ៉ាស្រី វុទ្ធី ៤០ម៉ឺនរៀល និង៣-ការិយាល័យមេធាវីសិទ្ធិសក្តិ ៦ម៉ឺនរៀល ។
លោកចាន់ សារ៉ាន់ មេភូមិថ្នា បានឱ្យដឹងថា លោកយាយតូច សុន ជាស្ត្រីមេម៉ាយគ្មានកូនចៅ ឬសាច់ញាតិទាល់តែសោះ ចំណែកជីវភាពរស់នៅរបស់គាត់ គឺក្រីក្រណាស់ លោកយាយមានអាយុ៧៦ឆ្នាំ ដែលជាបច្ឆិមវ័យទៅហើយ ថែមទាំងមានជំងឺរ៉ាំរ៉ៃក្នុងខ្លួន៣ឆ្នាំមកទៀតផង ដែលក្នុងរយៈពេលមានជំងឺលោកយាយរស់ដោយសារគេអាណិតអាសូរ ឱ្យបាយសម្លម្នាក់បន្តិចៗ ពេលខ្លះលោកយាយក៏ត្រូវអត់បាយមួយព្រឹក ឬមួយល្ងាចក៏មាន ព្រោះលោកយាយគ្មានលុយទិញហូប ហើយអ្នកភូមិជាប់រវល់ការងារភ្លេច
ឱ្យ ។ បន្ទាប់ពីទទួលបានអំណោយពីសប្បុរសជនតាមរយៈសារព័ត៌មានកោះសន្តិភាពកាលពីថ្ងៃទី៨ ឧសភា មក លោកយាយក៏មានអាហារហូបទៀងពេល និងបានហៅពេទ្យមកចាក់ថ្នាំ ដាក់សេរ៉ូមឱ្យបានចំនួន៤-៥ដងធ្វើឱ្យលោកយាយមានកម្លាំងអាចដើរបានជិតៗ និងអាចដាំបាយធ្វើម្ហូបបានដោយខ្លួនឯងបាន ។
នៅពេលបានទទួលអំណោយសប្បុរសជនជាលើកទី២នេះ លោកយាយតូច សុន បានសម្តែងនូវក្តីរំភើបរីករាយឥតឧបមា និងបានលើកម្រាមដៃដប់បួងសួងដល់វត្ថុស័ក្តិសិទ្ធិឱ្យតាមជួយថែរក្សាការពារដល់សប្បុរសជនជាទីគោរពទាំងអស់ និងក្រុមគ្រួសារដែលបានផ្តល់អំណោយជាថវិកាផ្ទាល់ខ្លួនមកជួយសង្គ្រោះជីវិតលោកយាយ និងជូនពរឱ្យសប្បុរសជនទាំងអស់ជួបតែសេចក្តីសុខ សេចក្តីចម្រើនឈ្នះអស់មារសត្រូវប្រកបរបរទទួលទានចេះតែកាក់កបទៅៗជារៀងរហូត ។
លោកយាយមិនបានស្គាល់មុខម្ចាស់ទាន ក៏ដោយ ប៉ុន្តែមានទេវតាលោកដឹងឮ ហើយលោកយាយ នឹងចងចាំគុណនេះរហូត ទោះជាស្លាប់ទៅក៏មិនភ្លេចដែរ ។ លោកយាយបន្តថា បានទទួលប្រាក់អំណោយមក នៅថ្ងៃព្រហស្បតិ៍ក្រោយនេះ លោកយាយនឹងជួលម៉ូតូឌុបជិះទៅមន្ទីរពេទ្យខេត្ត ដើម្បីឱ្យគ្រូពេទ្យព្យាបាលជំងឺរបស់លោកយាយ ៕
ចែករំលែកព័តមាននេះ