ខេត្តព្រះសីហនុ ៖ ហេតុការណ៍ដ៏រន្ធត់មួយ កើតឡើងកាលពីវេលាម៉ោង០៨ និង៣០នាទីព្រឹកថ្ងៃទី១៥ ខែកញ្ញា ឆ្នាំ២០២៣ នេះ ខណៈប្រជានេសាទបានរាយការណ៍ថា មានសាឡង់ដឹកខ្សាច់មួយគ្រឿងបានលិចនៅក្នុងសមុទ្រ…
ខេត្តព្រះសីហនុ ៖ ហេតុការណ៍ដ៏រន្ធត់មួយ កើតឡើងកាលពីវេលាម៉ោង០៨ និង៣០នាទីព្រឹកថ្ងៃទី១៥ ខែកញ្ញា ឆ្នាំ២០២៣ នេះ ខណៈប្រជានេសាទបានរាយការណ៍ថា មានសាឡង់ដឹកខ្សាច់មួយគ្រឿងបានលិចនៅក្នុងសមុទ្រ ។
ភ្លាមៗ ទទួលបញ្ជាពីឯកឧត្តមឧត្ដមសេនីយ៍ឯក ទូច ពលៈ ប្រធាននាយកដ្ឋាននគរបាលការពារព្រំដែនទឹក និងជាអគ្គលេខាធិការរង នៃគណៈកម្មាធិការជាតិសន្តិសុខលម្ហសមុទ្រ បានចាត់តាំងកម្លាំងអង្គភាពបង្ក្រាបបទល្មើសលើផ្ទៃសមុទ្រ និងវរសេនាតូចលេខ២៤០ ប្រចាំខេត្តព្រះសីហនុ ចេញអន្តរាគមន៍ជួយសង្គ្រោះសាឡង់ដឹកខ្សាច់ ដែលបានលិចនិងមានអ្នកបើកបរនៅលើសាឡង់មានមនុស្សចំនួន០២នាក់ ដែលបានលិចនៅចំណុចនិយាមការលេខ 10°45’70.92”N 103°32’22.60”E ខាងលិចកោះដូង ស្ថិតនៅភូមិ៤ ឃុំអូរត្រេះ ស្រុកស្ទឹងហាវ ខេត្តព្រះសីហនុ ។
បើតាមការឲ្យដឹងពីមន្ត្រីនគរបាលបង្ក្រាបបទល្មើសផ្ទៃសមុទ្រដែលបានចុះជួយករណីខាងលើបានឲ្យដឹងថា មូលហេតុដែលសាឡង់លិចដោយសារមានភ្លៀងធ្លាក់ខ្លាំង ខ្យល់បោកបក់ខ្លាំង និងរលកធំៗ បានវាយឱ្យលិចនៅវេលាម៉ោង០៨ និង១៥នាទីព្រឹក ភិនភាគសាឡង់មានបណ្ដោយប្រវែង៥៧ម៉ែត្រ ទទឹង១០.៤ម៉ែត្រ ពណ៌ទឹកប៉ិច លេខសាឡង់: AG-21190 មានផ្ទុកខ្សាច់ចំនួន ៦០០ម៉ែត្រគីប របស់ក្រុមហ៊ុនGreen Power ។
ជនរងគ្រោះទាំង២នាក់ ម្នាក់ឈ្មោះឡេ ហ៊ួយថាន់ ភេទប្រុស អាយុ៤៨ឆ្នាំ ស្រុកកំណើត ក្រុងហ្គាំងធឺ ខេត្តគៀងយ៉ាង ប្រទេសវៀតណាម ជាតៃកុងសាឡង់ និងម្នាក់ទៀតឈ្មោះ ឡេ តាន់ហាយ ភេទប្រុស អាយុ៥១ឆ្នាំ ស្រុកកំណើត ក្រុងហ្គាំងធឺ ខេត្តគៀងយ៉ាង ប្រទេសវៀតណាម ។
បច្ចុប្បន្នជនរងគ្រោះទាំង២នាក់នេះ សមត្ថកិច្ចបានជួយសង្គ្រោះយកមកដល់អង្គភាពបង្ក្រាបបទល្មើសលើផ្ទៃសមុទ្រ ដោយសុវត្ថិភាពហើយ ។
ចែករំលែកព័តមាននេះ