Joao Palhinha កីឡាករស៊យបំផុត នៅទីផ្សារដោះដូរកីឡាកររដូវក្តៅឆ្នាំនេះ
អង់គ្លេស ៖ ខ្សែបម្រើការពារ Joao Palhinha ត្រូវបានចាត់ទុកជាកីឡាករបាល់ទាត់ស៊យជាងគេបំផុត
អង់គ្លេស ៖ ខ្សែបម្រើការពារ Joao Palhinha ត្រូវបានចាត់ទុកជាកីឡាករបាល់ទាត់ស៊យជាងគេបំផុត នៅក្នុងទីផ្សារដោះដូរកីឡាកររដូវក្តៅឆ្នាំនេះ បន្ទាប់ពីដំណើរការផ្ទេរពីក្លិប Fulham ទៅចូលរួមជាមួយនឹងក្លិប Bayern Munich បរាជ័យនៅនាទីចុងក្រោយ នៃថ្ងៃបិទទីផ្សារដោះដូរកីឡាករ ឬ Deadline Day។
យោងតាមរបាយការណ៍ពីប្រព័ន្ធផ្សព្វផ្សាយធំរបស់ចក្រអង់គ្លេស ក៏ដូចជាអាល្លឺម៉ង់ បានរាយការណ៍ថា កីឡាករអន្តរជាតិព័រទុយហ្គាល់វ័យ២៨ឆ្នាំរូបនេះ បានហោះទៅកាន់ប្រទេសអាល្លឺម៉ង់ ដើម្បីធ្វើការពិនិត្យសុខភាព និងថតជាមួយឯកសណ្ឋានរបស់ក្រុម Bayern Munich រួចរាល់ ដើម្បីត្រៀមប្រកាសជាសមាជិកថ្មី នៃក្រុមនៅលីគកំពូលអាល្លឺម៉ង់មួយនេះ បន្ទាប់ពីកីឡាកររូបនេះ ទទួលបានការអនុញ្ញាតពីក្លិប Fulham សម្រាប់ការហោះទៅកាន់ប្រទេសអាល្លឺម៉ង់។
យ៉ាងណាមិញ ការផ្ទេរត្រូវបានបរាជ័យ បន្ទាប់ពីក្លិប Fulham មិនអាចស្វែងរកកីឡាករមកជំនួសតំណែងរបស់ Joao Palhinha បានទាន់ពេលវេលា ពោលគឺប៉ុន្មាននាទីប៉ុណ្ណោះ មុនពេលទីផ្សារដោះដូរកីឡាករ នៅក្នុងប្រទេសអាល្លឺម៉ង់បិទផ្សារ កាលពីថ្ងៃទី១ ខែកញ្ញា ឆ្នាំ២០២៣ កន្លងទៅ ដូច្នេះហើយ Fulham បានតស៊ូយ៉ាងលំបាកក្នុងការរក្សាកីឡាករវ័យ២៨ឆ្នាំរូបនេះ បើទោះបីជាខ្សែបម្រើការពាររូបនេះ គឺជាកីឡាករ មានតម្លៃផ្ទេរខ្ពស់បំផុតរបស់ក្លិបនៅលីគកំពូលមួយនេះ ពោលគឺ ៦៥លានអឺរ៉ូ នៅក្នុងព្រមព្រៀងជាមួយក្លិប Bayern Munich យ៉ាងណាក៏ដោយ។
គួររំលឹកថា ក្លិប Fulham បានចុះហត្ថលេខាលើនាំយកខ្សែបម្រើការពារ Palhinha ពីក្លិប Sporting Lisbon នៅលីគកំពូលព័រទុយហ្គាល់ កាលពីរដូវក្តៅមុន នៅក្នុងតម្លៃ ១៧លានផោន កីឡាករូបនេះ នៅសល់កុងត្រារយៈពេល៤ឆ្នាំ បូករួមទាំងជម្រើស ១២ខែបន្ថែមទៀតជាមួយ Fulham ៕ (ប្រភពពី Sky Sports)
ចែករំលែកព័តមាននេះ