ប្រជាជនកម្ពុជានឹងមានប្រាក់ចំណូលជាមធ្យមយ៉ាងតិច១៣៨៤៦ដុល្លារ ក្នុងមួយឆ្នាំ ត្រឹមឆ្នាំ២០៥០ ជាឆ្នាំដែលរដ្ឋាភិបាលសម្រេចប្រែក្លាយប្រទេសកម្ពុជាអោយទៅជាប្រទេសមានចំណូលខ្ពស់ ។ ទោះបីជាវានៅពេលយូរទៀតក្តី ប៉ុន្តែវាជាគោលនយោបាយប្រកបដោយមហិច្ឆតាដែលយើងគួរតែគាំទ្រ ដើម្បីសម្រេចសុបិនដ៏ធំនេះ ។ បច្ចុប្បន្នប្រទេសកម្ពុជា…
ប្រជាជនកម្ពុជានឹងមានប្រាក់ចំណូលជាមធ្យមយ៉ាងតិច១៣៨៤៦ដុល្លារ ក្នុងមួយឆ្នាំ ត្រឹមឆ្នាំ២០៥០ ជាឆ្នាំដែលរដ្ឋាភិបាលសម្រេចប្រែក្លាយប្រទេសកម្ពុជាអោយទៅជាប្រទេសមានចំណូលខ្ពស់ ។ ទោះបីជាវានៅពេលយូរទៀតក្តី ប៉ុន្តែវាជាគោលនយោបាយប្រកបដោយមហិច្ឆតាដែលយើងគួរតែគាំទ្រ ដើម្បីសម្រេចសុបិនដ៏ធំនេះ ។
![](https://kohsantepheapdaily.com.kh/wp-content/uploads/2023/09/2cad8fa47bbef282badbb8de5374b894.jpg)
បច្ចុប្បន្នប្រទេសកម្ពុជា គឺជាប្រទេសដែលមានចំណូលមធ្យមកម្រិតទាប ហើយកម្ពុជាមានគោលបំណងក្លាយជាប្រទេសមានចំណូលមធ្យមកម្រិតខ្ពស់ នៅត្រឹមឆ្នាំ២០៣០ និងមានចំណូលកម្រិតខ្ពស់នៅឆ្នាំ២០៥០ ។
![](https://kohsantepheapdaily.com.kh/wp-content/uploads/2023/09/ae85b24d373ed64aa28ea8cbceee6697-1.jpg)
តាមអង្គការធនាគារពិភពលោកប្រទេសដែលមានចំណូលមធ្យមកម្រិតទាប សំដៅទៅលើប្រទេសដែលប្រជាជនម្នាក់មានចំណូលជាមធ្យមចន្លោះ១១៣០ ដុល្លារ ដល់៤៤៦៥ដុល្លារក្នុងមួយឆ្នាំ ។ ចំណែកចំណូលមធ្យមកម្រិតខ្ពស់ គឺមានន័យថា មានចំណូលចន្លោះពី៤៤៦៦ដុល្លារ ដល់១៣៨៤៥ ដុល្លារក្នុងមួយឆ្នាំ ។ ប្រទេសមានចំណូលខ្ពស់ ឬប្រទេសអ្នកមាននៅពេលដែលពលរដ្ឋម្នាក់មានចំណូលយ៉ាងតិច១៣៨៤៦ ដុល្លារ ក្នុងមួយឆ្នាំ ឬអាចនិយាយយ៉ាងសាមញ្ញថា ជាង១១៥០ ដុល្លារក្នុងមួយខែ ។ ប្រទេសកម្ពុជានឹងក្លាយជាប្រទេសអ្នកមាននៅឆ្នាំ២០៥០ ដោយផ្អែកលើគោលនយោបាយរបស់រដ្ឋាភិបាលដែលដឹកនាំដោយ សម្តេចធិបតី ហ៊ុន ម៉ាណែត ។
![](https://kohsantepheapdaily.com.kh/wp-content/uploads/2023/09/b315d6ebed6c216320eb58ee6d4171d1-1.jpg)
លើសពីរដ្ឋាភិបាលអាណត្តិមុន រដ្ឋាភិបាលអាណត្តិទី៧ បានដាក់ចេញនូវយុទ្ធសាស្ត្របច្ចកោណនៅក្នុងការដឹកនាំប្រទេស ។ យុទ្ធសាស្ត្របច្ចកោណ គឺដើម្បីជំរុញកំណើនសេដ្ឋកិច្ចបង្កើតការងារធានាសមធម៌ បង្កើនប្រសិទ្ធភាព និងរក្សាចីរភាព ។ នេះបើតាមការប្រកាសឱ្យដឹងរបស់នាយករដ្ឋមន្ត្រីថ្មីរបស់កម្ពុជា ។ សម្តេច ធិបតី ហ៊ុន ម៉ាណែត នាយករដ្ឋមន្ត្រីអាណត្តិទី៧ បានប្រកាសពីយុទ្ធសាស្ត្របច្ចកោណ ។ យុទ្ធសាស្ត្រចុតុកោណសំដៅលើទឹក ផ្លូវ ភ្លើង មនុស្ស ។ ចំណែកយុទ្ធសាស្ត្របញ្ចកោណ-ដំណាក់កាលទី១នេះ គឺមនុស្ស, ផ្លូវ, ទឹក, ភ្លើង និងបច្ចេកវិទ្យា ។
ប្រមុខរដ្ឋាភិបាលបានលើកឡើងថា យុទ្ធសាស្ត្រចតុកោណទាំង៤ដំណាក់កាលរបស់សម្តេចតេជោ ហ៊ុន សែន សម្រេចបានសមិទ្ធផលធំៗលើគ្រប់វិស័យទាំងនយោបាយ សង្គម និងសេដ្ឋកិច្ច ដែលនាំឱ្យកម្ពុជាសម្រេចបាននូវការផ្លាស់ប្តូរមុខមាត់ថ្មី ។ ពេលនេះដំណើរការកសាងប្រទេសបានឈានដល់ដំណាក់កាលថ្មីមួយនៅក្នុងបរិការណ៍នៃពិភពលោកដែលកាន់តែប្រែប្រួលលំបាក និងមិនប្រាកដប្រជា ។ កម្ពុជាត្រូវប្រឈមនឹងបញ្ហាថ្មីយុទ្ធសាស្ត្របច្ចកោណបានសម្លឹងសម្រាប់រយៈពេល២៥ឆ្នាំទៅមុខ ឆ្ពោះចក្ខុវិស័យកម្ពុជាឆ្នាំ២០៥០ ។
នៅក្នុងអាណត្តិទី៧នេះ ជាយុទ្ធសាស្ត្របញ្ចកោណ-ដំណាក់កាលទី១ ។
![](https://kohsantepheapdaily.com.kh/wp-content/uploads/2023/09/2312162a739a18fea8536a9b16b2ee06.jpg)
សម្តេចធិបតី នាយករដ្ឋមន្ត្រីបញ្ជាក់ថា យុទ្ធសាស្ត្របញ្ចកោណ-ដំណាក់កាលទី១ ផ្អែកលើភាពចាំបាច់ ជាក់ស្តែងមួយចំនួនដូចជា ការបន្តពង្រឹង និងពង្រីកសមិទ្ធផលនានាពីអាណត្តិកន្លងមក, ការបន្តកែទម្រង់ស្ថាប័ន និងអភិបាលកិច្ចសម្រេចឱ្យបានរដ្ឋបាលសាធារណៈមួយដែលមានសមត្ថភាពខ្ពស់ខ្លាំងវៃឆ្លាត និងស្អាតស្អំ, ការបន្តកសាង និងពង្រឹងមូលដ្ឋានគ្រឹះសម្រាប់ជំរុញ ការអភិវឌ្ឍសេដ្ឋកិច្ច និងសង្គមដោយផ្តោតសំខាន់លើការកសាងមូលដ្ឋានមនុស្សរាំងមាំ, ការបន្តបង្កើនការធ្វើពិពិធកម្មសេដ្ឋកិច្ច ភាពប្រកួតប្រជែងរបស់កម្ពុជា និងការកសាងភាពធន់ទៅនឹងការប្រែប្រួលនៃកត្តាសង្គម-សេដ្ឋកិច្ច និងបរិស្ថានធម្មជាតិ រួមទាំងភាពចាំបាច់ក្នុងការដាក់ចេញនូវរបៀបវារៈគោលនយោបាយសង្គម-សេដ្ឋកិច្ចគ្រប់ជ្រុងជ្រោយមួយ ដើម្បីសម្រេចឱ្យបាននូវចក្ខុវិស័យកម្ពុជាឆ្នាំ២០៥០ ។
![](https://kohsantepheapdaily.com.kh/wp-content/uploads/2023/09/7d9080f37c850343439be123a9006852.jpeg)
សម្តេចធិបតី បានលើកឡើងបន្តថា យុទ្ធសាស្ត្រនេះមានបេសកកម្មជា ប្រវត្តិសាស្ត្រចម្បងពីរ គឺទីមួយរក្សាសុខសន្តិភាព និងទីពីរកសាង និងពង្រឹងមូលដ្ឋានគ្រឹះសម្រាប់ជំរុញសន្ទុះនៃការអភិវឌ្ឍប្រទេសជាតិទៅមុខទៀត ពិសេសការសម្រេចជាប្រទេសមានប្រាក់ចំណូលមធ្យមកម្រិតខ្ពស់នៅឆ្នាំ២០៣០ និងក្លាយជាប្រទេសមានចំណូលខ្ពស់ក្នុងឆ្នាំ២០៥០ ។ ទោះបីជាពេលវេលានៅយូរទៀតក្តី គោលនយោបាយទាំងនេះកំពុងឆ្លុះបញ្ចាំង ថាកម្ពុជា ធ្វើដំណើរលើផ្លូវដ៏ត្រឹមត្រូវឆ្ពោះទៅអនាគតដ៏ល្អប្រសើរនេះ ។
ជាមួយនេះការប្តេជ្ញាចិត្តផ្នែកនយោបាយ និងការួមគ្នាជាធ្លុងមួយរបស់ប្រជាជន និងរដ្ឋភិបាលកម្ពុជាមុខជានឹងសម្រេចសុបិនប្រកបដោយមហិច្ឆតានេះ ហើយ កម្ពុជានឹងមានមុខមាត់ថ្មី គឺជាប្រទេសអ្នកមាន ។ ដូច្នេះ បើចង់មានត្រូវប្រឹងធ្វើការទាំងអស់គ្នា ៕
![](https://kohsantepheapdaily.com.kh/wp-content/uploads/2023/09/6b1627f5128d37050172f662bb4e63ee.jpg)
ចែករំលែកព័តមាននេះ