កីឡដ្ឋានប្រកួត World Cup តម្លៃជិត១ពាន់លានដុល្លារ បច្ចុប្បន្នត្រូវបានគេទុកចោល
ប្រេស៊ីល ៖ កីឡដ្ឋានបាល់ទាត់ដ៏ធំសម្បើមមួយ ដែលធ្លាប់ទទួលរៀបចំការប្រកួតព្រឹត្តិការណ៍ World
ប្រេស៊ីល ៖ កីឡដ្ឋានបាល់ទាត់ដ៏ធំសម្បើមមួយ ដែលធ្លាប់ទទួលរៀបចំការប្រកួតព្រឹត្តិការណ៍ World Cup បច្ចុប្បន្នត្រូវបានគេទុកចោល ដោយប្រែទៅជាកន្លែងទុកឡានក្រុងទៅវិញ។ កីឡដ្ឋាននោះមានឈ្មោះថា Mane Garrincha មានមូលដ្ឋាននៅរដ្ឋធានីសហព័ន្ធប្រេស៊ីលី (Brasília) ប្រទេសប្រេស៊ីល ដែលមានសមត្ថភាពផ្ទុកអ្នកទស្សនាបានប្រមាណ ៧២,០០០នាក់ ធ្លាប់រៀបចំការប្រកួត World Cup ចំនួន ៧ ប្រកួត ដែលប្រេស៊ីលខ្លួនឯងជាម្ចាស់ផ្ទះ កាលពី៩ឆ្នាំមុន។
កីឡដ្ឋាននេះ រាប់បញ្ចូលទាំងការទទួលជ័យជម្នះក្នុងវគ្គចែកពូលរបស់ប្រេស៊ីល លើកាមេរូន និងការបរាជ័យដណ្តើមចំណាត់ថ្នាក់លេខ៣ លើហូឡង់ ក៏ដូចជាការទទួលជ័យជម្នះរបស់បារាំងលើនីហ្សេរីយ៉ា នៅវគ្គ១៦ក្រុមចុងក្រោយ និងនៅក្នុងវគ្គ៨ក្រុមចុងក្រោយរបស់អាហ្សង់ទីនលើបែលហ្ស៊ិក។
ព្រឹត្តិការណ៍ World Cup ឆ្នាំ ២០១៤ គឺជាឆ្នាំ ដែលម្ចាស់ផ្ទះប្រេស៊ីល រងភាពអាម៉ាស់ជាទីបំផុត ដោយចាញ់អាល្លឺម៉ង់ដោយលទ្ធផល ៧-១ នៅវគ្គពាក់កណ្តាលផ្តាច់ព្រ័ត្រ ហើយអាល្លឺម៉ង់បន្តផ្តួលអាហ្សង់ទីន ដើម្បីគ្រងតំណែងជើងឯក។
យ៉ាងណាមិញ សព្វថ្ងៃនេះ កីឡដ្ឋាន Mane Garrincha ទទួលរៀបចំការប្រកួតបាល់ទាត់តិចតួចបំផុត ហើយជំនួសវិញ ដោយប្រើប្រាស់សម្រាប់ព្រឹត្តិការណ៍ ឬកម្មវិធីកម្សាន្តផ្សេងៗ ដូចជាព្រឹត្តិការណ៍ចាក់សាក់ និងពិព័រណ៍អាហារជប៉ុនជាដើម ខណៈដែលចំណតរថយន្ត ត្រូវបានប្រែក្លាយទៅជាកន្លែងទុកឡានក្រុងបណ្តោះអាសន្ន ដោយរដ្ឋាភិបាលក្នុងតំបន់។
កីឡដ្ឋាន Mane Garrincha សាងសង់ឡើងក្នុងឆ្នាំ ១៩៧៤ និងត្រូវបានជួសជុលស្ថាបនាឡើងវិញក្នុងឆ្នាំ ២០១០ និងឆ្នាំ ២០១៣ ដើម្បីជំនួសកៅអីចាស់ដែលមានត្រឹម ៤៥,០០០កៅអីប៉ុណ្ណោះ គម្រោងនៃកីឡដ្ឋាននេះ ត្រូវបានបញ្ចប់ដោយចំណាយថវិកាសរុប ៩០០លានដុល្លារអាមេរិក និងធ្លាប់ជាកីឡដ្ឋានបាល់ទាត់ថ្លៃបំផុតទី២ នៅក្នុងប្រវត្តិសាស្ត្រ នៅពីក្រោយកីឡដ្ឋានជាតិ Wembley របស់ចក្រភពអង់គ្លេស។
បើទោះបីជាត្រូវបានគេទុកចោល ដោយមិនទទួលការប្រកួតបាល់ទាត់ក៏ពិតមែន ប៉ុន្តែរដ្ឋាភិបាលនៅតែត្រូវចំណាយប្រាក់ប្រមាណ១៦៤,០០០ដុល្លារនៅក្នុង១ខែ សម្រាប់ការងារថែទាំកីឡដ្ឋានមួយនេះ។ ចាប់តាំងពីរៀបចំការប្រកួតកីឡាអូឡាំពិកទីក្រុងរីអូ (Rio) ក្នុងឆ្នាំ ២០១៦ កីឡដ្ឋាន Mane Garrincha ត្រូវបានទុកចោលយ៉ាងស្ងាត់ជ្រងំរហូតមកទល់សព្វថ្ងៃ៕ (ប្រភពពី BBC)
ចែករំលែកព័តមាននេះ