ADផ្ទាំងផ្សព្វផ្សាយពាណិជ្ជកម្ម

អាមេរិក និងអង់គ្លេសព្រមា.នរុស្ស៊ីនៅក្រុមប្រឹក្សាសន្តិសុខថាមិនត្រូវទិញអាវុធពីកូរ៉េខាងជើងទេ

1 ឆ្នាំ មុន

១៣ ខែ កញ្ញា ឆ្នាំ ២០២៣ ម៉ោង ០៥:២៨

អស់ពីព្រមានកូរ៉េខាងជើងថាប្រយ័ត្នទទួលរងផលវិបាកធ្ងន់ធ្ងរបើហ៊ានលក់អាវុធទៅឱ្យប្រទេសរុស្ស៊ី ឥឡូវនេះ ប្រទេសអាមេរិក និងអង់គ្លេសងាកទៅព្រមានរុស្ស៊ីវិញម្ដងថាប្រយ័ត្នទទួលផលវិបាកធ្ងន់ធ្ងរបើហ៊ានទិញអាវុធពីកូរ៉េខាងជើង។ សេចក្ដីព្រមាននេះធ្វើឡើងចំពេលដែលថ្នាក់ដឹកនាំកូរ៉េខាងជើង និងរុស្ស៊ីជួបគ្នានៅទីក្រុងវ៉្លាឌីវ៉ូស្តុក (Vladivostok)។ នៅឯក្រុមប្រឹក្សាសន្តិសុខអង្គការសហប្រជាជាតិ ភាគទាំងសងខាងជជែកគ្នាពេញអង្គប្រជុំ អមដោយការសកសម្ដីគ្នាយ៉ាងល្វីងជូរចត់។

ឯកអគ្គរាជទូតអង់គ្លេសប្រចាំអង្គការសហប្រជាជាតិថ្លែងថាប្រទេសរុស្ស៊ីជាអ្នកផ្ដួចផ្ដើមការកោះប្រជុំក្រុមប្រឹក្សាសន្តិសុខចំពេលដែលលោកគីមជុងអ៊ុនធ្វើដំណើរឆ្លងកាត់ព្រំដែនចូលទៅក្នុងទឹកដីរុស្ស៊ីដើម្បីជួបលោកពូទីន។ ឯកអគ្គរាជទូតរូបនេះយល់ថាមានភស្តុតាងជាក់ស្ដែងដែលមិនអាចប្រកែកបានដែលបង្ហាញថាមានការចរចាគ្នាយ៉ាងផុលផុសទៅលើកិច្ចព្រមព្រៀងធំៗមួយចំនួនពាក់ព័ន្ធនឹងការលក់អាវុធរបស់កូរ៉េខាងជើងទៅឱ្យប្រទេសរុស្ស៊ីដើម្បីយកទៅធ្វើសង្គ្រាមនៅអ៊ុយក្រែន។

ឯកអគ្គរាជទូតរូបនេះសូមជំរុញឱ្យរដ្ឋជាសមាជិកទាំងអស់រម្លឹកប្រទេសរុស្ស៊ីថាត្រូវតែគោរពទៅតាមកាតព្វកិច្ចរបស់ខ្លួនដែលធ្លាប់សន្យានៅចំពោះមុខក្រុមប្រឹក្សាសន្តិសុខ។ រដ្ឋជាសមាជិកត្រូវនិយាយរម្លឹកប្រទេសរុស្ស៊ីថាការទិញអាវុធនេះផ្ទុយពីគោលការណ៍នៃការដាក់ទណ្ឌកម្មទៅលើកូរ៉េខាងជើង។ រុស្ស៊ីខ្លួនឯងជាភាគីហត្ថលេខីម្នាក់នៅក្នុងការដាក់ទណ្ឌកម្មនេះ។

នៅក្នុងកិច្ចប្រជុំនោះ អ្នកតំណាងប្រទេសរុស្ស៊ីបាននិយាយរិះគន់បកទៅប្រទេសអាមេរិកវិញថាអាមេរិកជាអ្នកផ្ដល់គ្រាប់បែកចង្កោមទៅឱ្យប្រទេសអ៊ុយក្រែន។ ឯកអគ្គរដ្ឋទូតរូបនេះថ្លែងថាការសម្រេចចិត្តផ្ដល់គ្រាប់បែកប្រភេទនេះជាគំនិតឥតវិចារណញាណ។ វ៉ាស៊ីនតោន និងក្រុមសម្ព័ន្ធមិត្តរបស់ខ្លួនបង្ហាញការព្រួយបារម្ភយ៉ាងខ្លាំងនៅពេលប្រទេសរុស្ស៊ី និងកូរ៉េខាងជើងពង្រីកទំនាក់ទំនងកាន់តែជិតស្និទ្ធផ្នែកយោធា។ ម៉្យាងទៀត ប្រទេសទាំង២សុទ្ធតែមានអាវុធនុយក្លេអ៊ែរដូចគ្នា។

នេះជាជំនួបកំពូលលើកទី២រវាងលោកគីម និងលោកពូទីន។ ប្រទេសទាំង២បាននិយាយបដិសេធជាហូរហែចំពោះពាក្យចចាមអារ៉ាមពាក់ព័ន្ធនឹងការទិញអាវុធ។ ទន្ទឹមនឹងការសង្ស័យ និងព្រួយបារម្ភអំពីរឿងរុស្ស៊ី និងកូរ៉េខាងជើង, រដ្ឋាភិបាលរបស់លោកបៃដិនក៏ត្រៀមអនុម័តផ្ដល់គ្រាប់មីស៊ីលរយៈចម្ងាយឆ្ងាយទៅឱ្យប្រទេសអ៊ុយក្រែន អមជាមួយការផ្ដល់គ្រាប់បែកចង្កោម។ ដូច្នេះ រដ្ឋាភិបាលទីក្រុងកៀវអាចវាយលុកទ្រង់ទ្រាយធំ និងបង្កការខូចខាតគួរឱ្យកត់សម្គាល់ទៅលើកងទ័ពរុស្ស៊ី៕

ប្រភព៖ TV World
https://tvpworld.com/72679292/us-uk-warn-russia-at-unsc-meeting-over-arms-deal-with-north-korea