រាជធានីភ្នំពេញ ៖ ឧត្តមសេនីយ៍ទោ ជួន ណារិន្ទ អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ នៅរសៀលថ្ងៃទី១២ ខែកញ្ញា ឆ្នាំ២០២៣នេះ បានណែនាំដល់កម្លាំងនគរបាលនៅតាមបណ្តាមូលដ្ឋានក្នុងរាជធានីភ្នំពេញ ត្រូវខិតខំប្រឹងប្រែងការពារសន្តិសុខ រក្សាសណ្តាប់ធ្នាប់ នាំមកសុខសុវត្ថិភាព និងផ្តល់ភាពកក់ក្តៅ ជូនប្រជាពលរដ្ឋ ជាពិសេសនោះត្រូវបម្រើប្រជាពលរដ្ឋដោយស្មោះត្រង់ ហើយត្រូវកាត់បន្ថយភាពអសកម្មនានា ដែលនាំឱ្យប្រជាពលរដ្ឋថ្នាំងថ្នាក់ចិត្ត នេះបើយោងតាមហ្វេសប៊ុកផ្លូវការរបស់ស្នងការដ្ឋាននគរបាលរាជធានីភ្នំពេញ ។
លោកស្នងការ ជួន ណារិន្ទ បានណែនាំបែបនេះ ក្រោយពីទទួលព័ត៌មានចុះផ្សាយតាមបណ្តាអង្គភាពព័ត៌មានមួយចំនួន នូវកិច្ចសម្ភាសន៍របស់ប្រជាពលរដ្ឋ ស្តីពីការព្រួយបារម្ភអំពើចោរកម្ម តែងកើតមានក្នុងមូលដ្ឋាន នៅសង្កាត់ព្រែកថ្មី ខណ្ឌច្បារអំពៅ ហើយសមត្ថកិច្ចមូលដ្ឋានគ្មានចំណាត់ការជូយអន្តរាគមន៍ដល់ប្រជាពលរដ្ឋរងគ្រោះនោះ ទើបនៅរសៀលថ្ងៃអង្គារ៍នេះ ឧត្តមសេនីយ៍ទោ ជួន ណារិន្ទ អគ្គស្នងការងនគរបាលជាតិ និងជាស្នងការនគរបាលរាជធានីភ្នំពេញ ក៏បានបញ្ជាទៅលោកវរសេនីយ៍ឯក ម៉ៅ សឿត អធិការនគរបាលខណ្ឌច្បារអំពៅ ដើម្បីចុះស្រាវជ្រាវជាបន្ទាន់ និងរាយការណ៍ជូនមកលោកស្នងការវិញ ។
ក្នុងសម្ភាសន៍ជាមួយសារព័ត៌មាន ស្ត្រីម្នាក់ឈ្មោះ នាង ស៊ីណាត រស់នៅភូមិព្រែកថ្មី សង្កាត់ព្រែកថ្មី ខណ្ឌច្បារអំពៅ បានលើកឡើងថា រូបគាត់បានបាត់ម៉ូតូ០១គ្រឿង ម៉ាកហុងដាសេ១២៥ ពណ៍ខ្មៅ ពាក់ផ្លាកលេខ ភ្នំពេញ 1CL-1347 កាលពីម៉ោង១៥និង៣០នាទីថ្ងៃទី២៩ ខែសីហា ឆ្នាំ២០២៣ ដោយគ្មានចំណាត់ការទាន់ពេលវេលារបស់សមត្ថកិច្ចមូលដ្ឋាន ក្នុងការបង្ក្រាបជនសង្ស័យ ហើយសមត្ថកិច្ចមិនអើពើផងនោះទៀត ។
បន្ទាប់ពីទទួលបានបទបញ្ជាភ្លាម លោកអធិការនគរបាលខណ្ឌច្បារអំពៅ ក៏បានបំភ្លឺជូនជុំវិញករណីខាងលើនេះ ដោយបានបញ្ជាក់ថា ជនសង្ស័យ ដែលបានធ្វើសកម្មភាពលួចយកម៉ូតូស្ត្រីរងគ្រោះឈ្មោះ នាង ស៊ីណាត ត្រូវបានកម្លាំងអធិការដ្ឋាននគរបាលខណ្ឌច្បារអំពៅ សហការជាមួយកម្លាំងអធិការដ្ឋាននគរបាលស្រុកកៀនស្វាយ ខេត្តកណ្តាល ក្រោមការដឹកនាំបញ្ជាផ្ទាល់ពីគណៈបញ្ជាការឯកភាពខណ្ឌច្បារអំពៅ ធ្វើការបង្ក្រាបបានជនសង្ស័យចំនួន០២នាក់ កាលពីថ្ងៃទី៣១ ខែសីហា ឆ្នាំ២០២៣ និងបានដកហូតម៉ូតូ០១គ្រឿង របស់ស្ត្រីរងគ្រោះមកវិញ ។
ជនសង្ស័យ ដែលត្រូវឃាត់ខ្លួនរួមមាន ៖ ទី១-ឈ្មោះ ពុទ្ធ ធារ៉ា ភេទប្រុស អាយុ ១៧ឆ្មាំ ជនជាតិ ខ្មែរគ្មានមុខរបរពិតប្រាកដ និងទី២-ឈ្មោះ ស៊ុន ស៊ីម៉ា ភេទ ប្រុស អាយុ ៣៦ឆ្នាំគ្មាន មុខរបរពិត ។ ជនសង្ស័យទាំង០២នាក់នេះ ស្នាក់នៅភូមិព្រែកថ្មី សង្កាត់ព្រែកថ្មី ខណ្ឌច្បារអំពៅ ។
ប៉ុន្តែម៉ូតូ០១គ្រឿង ដែលបានដកហូតមកវិញនោះ ត្រូវបានជនសង្ស័យយកទៅស៊ីគ្រឿងអស់មួយចំនួន ត្រូវបានលោកអធិការនគរបាលខណ្ឌច្បារអំពៅ ចំណាយប្រាក់ផ្ទាល់ខ្លួនចំនួន ១៥០ដុល្លារ ជួសជុលម៉ូតូឲ្យល្អឡើងវិញហើយ នៅថ្ងៃទី០២ ខែកញ្ញា ឆ្នាំ២០២៣ សមត្ថកិច្ច ក៏បានប្រគល់ឱ្យម្ចាស់ដើម ។
ទន្ទឹមនោះ ស្ត្រីម្ចាស់ម៉ូតូក៏បានសម្តែងក្តីរីករាយ និងថ្លែងអំណរគុណដល់អាជ្ញាធរ កងកម្លាំងសមត្ថកិច្ចពាក់ព័ន្ធទាំងអស់ ដែលបានខិតខំប្រឹងប្រែងបម្រើប្រជាពលរដ្ឋក្នុងមូលដ្ឋាន ៕
ចែករំលែកព័តមាននេះ