ប្រជាពលរដ្ឋជាច្រើនគ្រួសារ រស់នៅក្នុងភូមិឧបសម្ព័ន្ធ របស់ភូមិឃុំព្នាយ ស្រុកសំរោងទង ខេត្តកំពង់ស្ពឺ បាននាំគ្នាទៅធ្វើការតវ៉ាជាមួយអាជ្ញាធរឃុំ និងជំនាញ ក្នុងនោះផងដែរ ពលរដ្ឋក៏បានស្នើសុំឲ្យអាជ្ញាធរឃុំ ក៏ដូចជាស្រុក
ខេត្តកំពង់ស្ពឺ ៖ ប្រជាពលរដ្ឋជាច្រើនគ្រួសារ រស់នៅក្នុងភូមិឧបសម្ព័ន្ធ របស់ភូមិឃុំព្នាយ ស្រុកសំរោងទង ខេត្តកំពង់ស្ពឺ បាននាំគ្នាទៅធ្វើការតវ៉ាជាមួយអាជ្ញាធរឃុំ និងជំនាញ ក្នុងនោះផងដែរ ពលរដ្ឋក៏បានស្នើសុំឲ្យអាជ្ញាធរឃុំ ក៏ដូចជាស្រុក ជួយរក្សាដីរួមភូមិ ដែលលោកមេភូមិ និងប្រពន្ធរបស់គាត់ឃុ.បឃិ.តគ្នាជាមួយបក្សពួករបស់គាត់ ដែលមានមន្ត្រីអួតថា ខ្លួនជាទីប្រឹក្សាក្រសួង លក់ទៅឲ្យឈ្មួញ ក្នុងគោលបំណងយកមកចែកគ្នា។
ប្រភពពីប្រជាពលរដ្ឋ បានបង្ហើបឱ្យដឹងថា កាលដែលមកជួបជុំគ្នានៅព្រឹកថ្ងៃទី១០ ខែកញ្ញា ឆ្នាំ២០២៣នេះ ពលរដ្ឋទាំងអស់បានលើកឡើងថា ការមកជួបជុំនាពេលនេះ គឺមិនបានរារាំងក្នុងការអភិវឌ្ឍន៍ហេដ្ឋារចនាសម្ព័ន្ធនោះទេ តែរឿងលក់ដីរួមនេះ គឺប្រពន្ធលោកមេភូមិ និងលោកមេភូមិតែម្ដង ជាតួឯកក្នុងរឿងនេះ។ ក្នុងនោះក៏មានទាំងបក្សពួករបស់គាត់ ធ្វើការនៅឃុំព្នាយផងដែរ ក្នុងចេតនាយកលុយចែកគ្នា ដោយមិនមានការអភិវឌ្ឍន៍ហេដ្ឋារចនាសម្ព័ន្ធឡើយ ហើយអ្វីដែលពលរដ្ឋបានដឹង គឺប្រពន្ធលោកមេភូមិ ក្រោយពេលដែលទទួលបានលុយកក់លើកទី១ គាត់បាននិយាយថា ពេលទទួលកក់លើកទី២ គាត់នឹងទៅទាក់ទងក្រុមហ៊ុនឡាន ដើម្បីទិញឡានជិះ ហើយកាលដែលនិយាយរបៀបនេះ គឺធ្វើឲ្យប្រជាពលរដ្ឋទាំងអស់ មិនសុខចិត្ត ហើយស្នើសុំឲ្យរក្សាដីនេះជាដីរួមដដែល។
ប្រភពដដែលបន្តថា ការតវ៉ានេះ គឺចង់ស្នើសុំឲ្យថ្នាក់ដឹកនាំគ្រប់លំដាប់ថ្នាក់ មេត្តាជួយពិនិត្យនិងអន្តរាគមន៍ ដើម្បីរក្សាដីនេះទុកជាប្រយោជន៍រួមរបស់ប្រជាពលរដ្ឋដូចដើមផងដែរ។
ប្រភពដដែលបន្តទៀតថា បានជាលោកមេភូមិ និងបក្សពួក ហ៊ានឃុ.បឃិ.តគ្នាលក់ដីរួមភូមិ ជាប្រព័ន្ធនេះ ដោយសារតែមានបុរសម្នាក់ គឺលោក ជួប វណ្ណៈ ដែលត្រូវគេស្គាល់ថា គឺជាទីប្រឹក្សាក្រសួងដែនដី ហើយក៏ជាអ្នករត់ការឯកសារ ដើម្បីលក់ដីនេះទៅឲ្យក្រុមឈ្មួញផងដែរ។ លុះនៅរសៀលថ្ងៃដដែល អាជ្ញាធរបានបញ្ចុះបញ្ចូល និងគំរា.មថា នឹងប្ដឹងចំពោះអ្នកណាដែលហ៊ានតវ៉ាក្នុងរឿងលក់ដីរួមនេះ ហើយអ្នកខ្លះនៅពេលដែលទទួលរងនូវសំពាធបែបនេះ ក៏ព្រម ឯអ្នកខ្លះទៀតក៏នៅតែមិនព្រម។
គួរបញ្ជាក់ថា មិនអាចសុំការពន្យល់បកស្រាយពីលោកមេភូមិ និងលោកមេឃុំ បានឡើយ ដោយសារប្រព័ន្ធទូរស័ព្ទមិនអាចទំនាក់ទំនងបាន។
សូមរំលឹកថា មេភូមិក្រាំងស្នួល ដែលជាតួអង្គសំខាន់មួយ បន្ទាប់ពីប្រពន្ធរបស់គាត់ បាននិយាយថា រឿងលក់ដីរួមភូមិនេះ គាត់មិនមែនលក់យកលុយតែម្នាក់ឯងនោះទេ ព្រោះថា ពេលបានលុយមក គឺចែកគ្នា តាមតិច តាមច្រើន។ ប៉ុន្តែលោក សំ សន បានព្រលយពាក្យថា «អ្នកកាសែតចង់ផ្សាយអីផ្សាយទៅ គាត់មិនខ្វល់ឡើយ ព្រោះអ្នកកាសែតមុនៗដែលគ្មានអ្នកណាស្គាល់សោះ មកសុំលុយតែម្នាក់៥ម៉ឺន ១០ម៉ឺនរៀល ក៏ទៅវិញបាត់អស់ទៅ»។
រឿងរ៉ាវខាងលើនេះ បានដឹងដល់អ្នកយកព័ត៌មានយើង នារសៀលថ្ងៃទី២៤ ខែសីហា ឆ្នាំ២០២៣ ក្រោយមានពលរដ្ឋមួយរូបរស់នៅភូមិក្រាំងស្នួល ឃុំព្នាយសំរោងទង ខេត្តកំពង់ស្ពឺ បានរាយការណ៍ឲ្យអ្នកយកព័ត៌មានយើងដឹងថា «ដីរួមភូមិមួយកន្លែង ទំហំជាង៣០០០ម៉ែត្រការ៉េ ត្រូវបានអាជ្ញាធរមូលដ្ឋានដែលមានប្រពន្ធមេភូមិ ជាមេខ្យល់ បានដើរកៀរគរប្រជាពលរដ្ឋឲ្យគាំទ្រខ្លួនក្នុងការលក់ដីរួមនេះ ហើយប្រជាពលរដ្ឋជាច្រើននាក់ទៀតដែលមិនបានដឹងពីរឿងលក់ដីនេះឡើយ»។
ប្រភពប្រភពដដែលរាយការណ៍បន្តថា «ដីដែលមានទំហំខាងលើ ត្រូវបានប្រពន្ធមេភូមិក្រាំងស្នួល ចេញមុខទទួលលុយកក់ពីឈ្មួញនាល្ងាចថ្ងៃទី២៣ ខែសីហា ឆ្នាំ២០២៣ ចំនួន៨ពាន់ដុល្លារ។ បើនិយាយទៅដីនេះ ក៏ជាដីដែលមានទំនាស់ផងដែរ មិនមែនដីរួមទាំងអស់នោះទេ។តែដោយសារអាងអំណាចប្ដីជាមេភូមិ ហើយក៏មានអ្នកចាំជួយពីក្រោយខ្នងទៀតផងនោះ ទើបប្រពន្ធលោកមេភូមិរូបនេះ រឹតតែបានដៃខ្លាំងឡើងៗ។ ហើយនៅពេលមានអ្នកសួរថា ហេតុអ្វីបានជាមេភូមិលក់ដីនេះ? លោក សំ សន មេភូមិក្រាំងស្នួល បាននិយាយថា «ដីនេះ ត្រូវបានឈ្មួញទិញយកអស់ហើយក្នុងតម្លៃ១ម៉ែត្រការ៉េ តម្លៃជិត៣០ដុល្លារ»។
មានការលើកឡើងផងដែរថា រឿងលក់ដីនេះ បើគ្មានការបើកភ្លើងខៀវពីជំនាញពាក់ព័ន្ធទេ ម្ល៉េះសមមេភូមិ មេឃុំ មិនហ៊ាននោះទេ ជាពិសេសគឺប្រពន្ធមេភូមិតែម្ដង ដែលជាអ្នកចេញមុខខ្លាំងជាងគេ។ ហើយការលក់ដីរួមភូមិនេះ ក៏ត្រូវបានប្រភពមួយបង្ហើបថា «អស់លោកអាជ្ញាធរឃុ.បឃិ.តគ្នាជាប្រព័ន្ធលក់បានលុយរាប់ម៉ឺនដុល្លារ ដោយមានប្រពន្ធមេភូមិធ្វើជាអ្នកតំណាងពលរដ្ឋ ហើយសំអាងថា ថ្នាក់លើបានឯកភាពគ្នាអស់ហើយ ព្រោះមានទីប្រឹក្សាក្រសួងរៀបចំដែនដី នគររូបនីយកម្ម មួយរូប ជាអ្នករត់ការ និងកាន់ឯកសារធ្វើប្លង់ ស្របពេលដែលអាជ្ញាធរស្រុក បានបដិសេធថា «អត់ដឹងរឿងនេះទេ»។
គេឆ្ងល់ថា ហេតុអ្វីបានជាមានទីប្រឹក្សាក្រសួងចុះទៅដើរតួជាអ្នកសម្របសម្រួលក្នុងរឿងលក់ដីរួមភូមិនេះទៅវិញ? ហើយការអះអាងរបស់លោកមេភូមិ ដែរថា ថ្នាក់លើដែលមានទីប្រឹក្សាក្រសួងជាអ្នករត់ការ និងកាន់ឯកសារធ្វើប្លង់នេះ តើអាចធ្លាក់មកពីលើវិញ ដោយរបៀបណា? បើឯកសារថ្នាក់ក្រោម មិនទាន់រៀបចំបានគ្រប់ជ្រុងជ្រោយផងនោះ?
ពាក់ព័ន្ធនឹងករណីខាងលើនេះដែរ មន្ត្រីឃុំមួយរូប បានលើកឡើងដែរថា «បើលក់ហើយ យកលុយមកកសាងហេដ្ឋារចនាសម្ព័ន្ធក្នុងភូមិជាការល្អ តែបើយកមកចែកគ្នា ចុះបើចែកមិនស្មើហើយមាននរណាម្នាក់ប្ដឹងនោះ ប្រាកដជាវីវរធំហើយ។ ដោយឡែករឿងធ្វើប្លង់ត្រូវរៀបចំពីក្រោមទៅលើ ហើយបើស្រុកមិនដឹងផង ចុះបើស្រុកបដិសេធមិនចុះហត្ថលេខា ខាងមន្ទីរក៏មិនហ៊ានដែរ។ រឿងនេះមិនមែនស្រួលដូចអស់លោកលើកឡើងរឿងធ្វើប្លង់ចេញពីក្រសួងនោះទេ រឿងនេះ និយាយមកខុសពីការពិតទាំងស្រុង»។
លោក សំ សន មេភូមិក្រាំងស្នួល បានបញ្ជាក់ប្រាប់តាមទូរស័ព្ទផងដែរថា ប្រពន្ធរបស់លោកពិតជាបានទទួលលុយកក់កាលពីល្ងាចថ្ងៃទី២៤ ខែសីហា ឆ្នាំ២០២៣ ពិតប្រាកដមែន គឺលុយកក់លើកទី១ ដោយសារប្រជាពលរដ្ឋមិនហ៊ានទទួល ទើបប្រពន្ធលោកជាអ្នកទទួលតែម្ដងទៅក្នុងចំនួន៨ពាន់ដុល្លារ។
ដោយពលរដ្ឋចាំទទួលលុយនៅលើកទី២ លោកមេភូមិ បានប្រាប់ថា ម្សិលមិញតំណាងចំនួន៧ទៅ៨នាក់ឃើញមកដែរ ហើយលុយដែលបានពីការលក់ដីរួមភូមិនេះ បើរាប់ចំនួនគ្រួសារក្នុងភូមិ គឺមានច្រើន តែបើរាប់គ្រួសារចាស់ៗជំនាន់ឆ្នាំ១៩៨៦ គឺមានចំនួនជាង១០០គ្រួសារប៉ុណ្ណោះ។
លោកមេភូមិ បានបញ្ជាក់ផងដែរថា នៅពេលទទួលលុយលើកទី២ លោកនឹងហៅឃុំមកជួយមើល និងបែងចែក។ ហើយដីរួមភូមិលក់នេះ បើតាមលោកមេភូមិ គឺមានចំនួនជាង៣ពាន់មែត្រការ៉េ ដោយក្នុងមួយការ៉េជិត៣០ដុល្លារ ដូច្នេះការលក់ដីនេះបើសរុបទៅ គឺមានទំហំទឹកលុយជិត១០ម៉ឺនដុល្លារដែរ។
រឿងនេះពលរដ្ឋបានលើកឡើងថា ហើយបើតាមដឹង គឺគេបែងចែកឲ្យប្រជាពលរដ្ឋប្រាកដមែន តែមិនដឹងថា តើក្នុងមនុស្សគ្រួសារបានទទួលលុយប៉ុន្មាននោះទេ?។ មិនត្រឹមតែប៉ុណ្ណោះ រឿងនេះក៏ធ្វើឲ្យប្រជាពលរដ្ឋមួយចំនួន មានការងឿងឆ្ងល់ថា ហេតុអ្វីបានជាប្រពន្ធលោកមេភូមិខ្នះខ្នែង រួមទាំងលោកមេភូមិ និងអាជ្ញាធរឃុំផងដែរ គឺខ្នះខ្នែងលក់ដីនេះខ្លាំងម្ល៉េះ ឬមួយក៏លក់ដើម្បីប្រយោជន៍ផ្ទាល់ខ្លួន?
លោក ឃិន តារា មេឃុំភ្នាយ បានបញ្ជាក់ប្រាប់ថា រឿងលក់ដីនេះ មិនមែនឃុំទេ គឺប្រជាពលរដ្ឋឯកភាពគ្នាលក់ ដោយម្នាក់ៗថា ជាដីកម្មសិទ្ធិ ឯម្ខាងទៀតថាជាដីរួមភូមិ ប៉ុន្តែឥឡូវនេះ ពួកគាត់ព្រមព្រៀងគ្នាលក់ហើយ។
លោកមេឃុំបានបញ្ជាក់ទៀតថា ខាងក្រសួងដែនដីបានចុះមកដោះស្រាយគ្នាកាលពី៣ទៅ៤ ថ្ងៃមុន ដោយសម្រេចថា ភាគីខាងណាទទួលយកប៉ុន្មាន ហើយភាគីម្ខាងទៀតទទួលបានប៉ុន្មាន ក្នុងនោះពលរដ្ឋបានផ្តិតមេដៃស្នើសុំឲ្យក្រសួងចេញប័ណ្ណ ដោយពួកគាត់ព្រមព្រៀងលក់ ហើយខាងក្រសួងរៀបចំដែនដីនគររូបនីយកម្មមាន លោក ជួប វណ្ណៈ ទីប្រឹក្សាក្រសួង ជាអ្នកសម្របសម្រួលរឿងនេះ និងជាអ្នកកាន់ឯកសាររត់ធ្វើប្លង់។
លោក ឃិន តារា មេឃុំព្នាយ បានបញ្ជាក់ទៀតថា រឿងនេះ បើចង់ដឹងច្បាស់ សូមទាក់ទងទៅក្រសួងរៀបចំដែនដី។ ដោយលោកបានបញ្ជាក់ប្រាប់ថា ឯកសារអ្វីៗ លោក ជួប វណ្ណៈ អតីតប្រធានការិយាល័យភូមិបាលស្រុកសំរោងទង ដែលបច្ចុប្បន្នជាទីប្រឹក្សាក្រសួងរៀបចំដែនដីនគររូបនីយកម្ម និងសំណង់ ជាអ្នកកាន់ឯកសារទៅរត់ការនៅក្រសួងអស់ហើយ។
ដោយឡែកពាក់ព័ន្ធនឹងការលក់ដីរួមភូមិនេះដែរ អភិបាលស្រុកសំរោងទង បានបញ្ជាក់ប្រាប់ផងដែរថា ខាងស្រុកមិនបានដឹងរឿងនេះទេ។ លោកបន្ថែមថា ដីរួមភូមិ ពួកគាត់មិនអាចលក់បានទេ ព្រោះជាដីសម្រាប់ប្រយោជន៍សាធារណៈ។ លោកអភិបាលស្រុកបន្តថា រឿងនេះ អ្នកណាឯកភាព គឺជារឿងរបស់គេ ដោយឡែកខាងស្រុកអត់ដឹងទេ។
សូមរំលឹកផងដែរថា កាលពីពេលថ្មីៗកន្លងទៅនេះ ព្រះករុណាជាអង្គម្ចាស់ជីវិតតម្កល់លើត្បូង បានចេញព្រះរាជក្រឹត្យបញ្ចប់មុខងារទីប្រឹក្សាក្រសួងអស់ហើយ តើមានទីប្រឹក្សាក្រសួងមកពីណាទៀត? ហើយហេតុអ្វីបានជាលោក ជួប វណ្ណៈ យកងារជាទីប្រឹក្សាក្រសួងចុះទៅដោះស្រាយ និងរត់ការឯកសាររឿងលក់ដីរួមភូមិនេះទៅវិញ?។ អ្នកយកព័ត៌មានយើងមិនអាចសុំការពន្យល់បកស្រាយពីលោក ជួប វណ្ណៈ បានទេម្សិលម៉ិញនេះ។
គួររំលឹកទៀតថា ៖ អ្នកណាខ្លះថ្លើមធំហ៊ានលក់ដីរួមភូមិ… សង្ស័យរឿងទន្សោងគោព្រៃ តូចស៊ីតាមតូច ធំស៊ីតាមធំ ទេដឹង? ៕
ចែករំលែកព័តមាននេះ