ខេត្តសៀមរាប ៖ កម្លាំងនគរបាលស្រុកប្រាសាទបាគង បានធ្វើការល្បាត កាលពីព្រលប់ដល់ទាបភ្លឺឈានចូលថ្ងៃទី១០ ខែកញ្ញា ឆ្នាំ២០២៣ ក៏ប្រទះឃើញបុរសម្នាក់កំពុងបើកម៉ូតូសណ្ដោងរ៉ឺម៉ក មានដឹកម៉ាស៊ីន និងសម្ភារៈគួរឱ្យសង្ស័យក៏បានធ្វើការស្ទាក់សួរ…
ខេត្តសៀមរាប ៖ កម្លាំងនគរបាលស្រុកប្រាសាទបាគង បានធ្វើការល្បាត កាលពីព្រលប់ដល់ទាបភ្លឺឈានចូលថ្ងៃទី១០ ខែកញ្ញា ឆ្នាំ២០២៣ ក៏ប្រទះឃើញបុរសម្នាក់កំពុងបើកម៉ូតូសណ្ដោងរ៉ឺម៉ក មានដឹកម៉ាស៊ីន និងសម្ភារៈគួរឱ្យសង្ស័យក៏បានធ្វើការស្ទាក់សួរ រួចនាំទើបដឹងថាលួចយកសម្ភារ:របស់ប្រជាពលរដ្ឋ ។ ហេតុការឃាត់ខ្លួនចោរលួចទ្រព្យសម្បត្តិប្រជាពលរដ្ឋ បានធ្វើឡើងនៅវេលាម៉ោង១ទាបភ្លឺ ឈានចូលថ្ងៃទី១០ ខែកញ្ញា ឆ្នាំ២០២៣ ក្នុងភូមិសាស្ត្រស្រុកប្រាសាទបាគង ។
បើតាមប្រសាសន៍របស់លោកវរសេនីយ៍ឯក លឹម សម្បត្តិ អធិការនគរបាលស្រុកប្រាសាទបាគង បានឱ្យដឹងថា ជនសង្ស័យមានឈ្មោះ ស៊ុ សិត (ហៅសាំង) ភេទប្រុស អាយុ៣១ឆ្នាំ ទីកន្លែងកំណើត នៅភូមិស្ពានជ្រាវ សង្កាត់ជ្រាវ ក្រុង/ខេត្តសៀមរាប មានអាសយដ្ឋានបច្ចុប្បន្ន នៅភូមិវាល ឃុំដានរុន ស្រុកសូទ្រនិគម ខេត្តសៀមរាប ។
បន្ទាប់ពីបានធ្វើការសាកសួរនាំជនសង្ស័យបានសារភាពថា សម្ភារៈ និងម៉ាស៊ីន ដែលខ្លួនកំពុងដឹកនេះគឺបានលួចចេញពីចំណុចមាត់ស្រះទឹកក្នុងវាលស្រែ ស្ថិតក្នុងភូមិរុនខាងត្បូង ឃុំដានរុន ស្រុកសូទ្រនិគម ខេត្តសៀមរាប កាលពីព្រឹកថ្ងៃទី១០ ខែកញ្ញា ឆ្នាំ២០២៣ ។
ក្រោយពីបានធ្វើការសាកសួរនាំយើងបានទំនាក់ទំនងទៅនគរបាលស្រុកសូទ្រនិគម ដើម្បីស្រាវជ្រាវរកជនរងគ្រោះនៅក្នុងភូមិសាស្ត្រឃុំដានរុន ទើបដឹងថា ម៉ាស៊ីនដែលជនសង្ស័យកំពុងដឹកនេះជារបស់ជនរងគ្រោះឈ្មោះ ជុច ឈឿន ភេទប្រុស អាយុ៤៥ឆ្នាំ មុខរបរកសិករ នៅភូមិរុនខាងត្បូង ឃុំដានរុន ស្រុកសូទ្រនិគម ដែលបានបាត់ម៉ាក សៀងហៃ កម្លាំង១៦សេះ បន្ទាប់ពីយកទៅដាក់បូមទឹកដាក់ស្រែ នាល្ងាចថ្ងៃទី០៣ ខែកញ្ញា ឆ្នាំ២០២៣ នៅភូមិរុនខាងត្បូង ឃុំដានរុន ស្រុកសូទ្រនិគម ខេត្តសៀមរាប ។
នៅក្នុងប្រតិបត្តិការនោះដែរ គឺដោយមានការចង្អុលបង្ហាញពីលោកឧត្តមសេនីយ៍ទោតេង ច័ន្ទណាត ស្នងការនៃស្នងការដ្ឋាននគរបាលខេត្តសៀមរាប និងលោកស្នងការរងទទួលផែនព្រហ្មទណ្ឌ បច្ចុប្បន្នជនសង្ស័យ និងវត្ថុតាង ត្រូវបានប្រគល់ទទួលជូនអធិការដ្ឋាននគរបាលស្រុកសូទ្រនិគម ដើម្បីបន្តនីតិវិធី ។ បច្ចុប្បន្នជនសង្ស័យត្រូវបានកម្លាំងការិយាល័យនគរបាលជំនាញរៀបចំកសាងសំណុំរឿងបញ្ជូនខ្លួនទៅតុលាការ ដើម្បីចាត់ការបន្តតាមផ្លូវច្បាប់ ៕
ចែករំលែកព័តមាននេះ