ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានចេញសារជាសំឡេង នៅយប់ថ្ងៃទី៨ ខែកញ្ញា ឆ្នាំ២០២៣ ដោយបាន​បញ្ជាឲ្យផ្អាកគ្រប់ក្រសួងស្ថាប័នរដ្ឋទាំងអស់ ត្រូវបញ្ឈប់ការប្រឡងជ្រើសរើសមន្រ្តីរាជការថ្មី ឆ្នាំ២០២៣ នេះ ដោយត្រូវរង់ចាំយន្តការថ្មី ដើម្បីធានាសុក្រឹត្យភាព តម្លាភាព និងយុត្តិធម៌ ក្នុងការប្រឡងជ្រើសរើសនេះ។

ក្នុងសារជាសំឡេងជាង ១នាទី សម្តេចធិបតី ហ៊ុន ម៉ាណែត បានបញ្ជាក់ថា «ដោយសារការ​ជ្រើសរើសមន្ត្រីរាជការ គឺជាកិច្ចការសំខាន់ នៅក្នុងការកែទម្រង់មុខងារសាធារណៈរបស់យើង នៅក្នុងអាណត្តិថ្មី! ( ដូច្នេះ ) ខ្ញុំសូម​ផ្អាក​រាល់ការ​ជ្រើសរើសមន្ត្រីរាជការរបស់យើង នៅក្នុង​ឆ្នាំ២០២៣ ដែលនៅសេសសល់ សម្រាប់ត្រៀមរៀបចំនៅពេលក្រោយ។ ព្រោះខ្ញុំឃើញ​ឯកឧត្តមរដ្ឋមន្ត្រី​មុខងារសាធារណៈ បានស្នើសុំ​រៀបចំនីតិវិធី ដើម្បីប្រឡងជ្រើសរើសមន្រ្តីរាជការ នៅក្រសួង ៣ នៅក្នុងឆ្នាំ២០២៣ នេះ»។

សម្តេចធិបតី ហ៊ុន ម៉ាណែត លើកឡើងថា «គណៈកម្មការជាតិ ពាក់ព័ន្ធទៅនឹងកំណែទម្រង់​មន្ត្រីមុខងារសាធារណៈនេះ ដែលក្នុងនោះ Component ( សមាសភាគ ) មួយដែលសំខាន់ ក្នុងការប្រឡងនេះ ឱ្យសុក្រឹត្យភាព គឺជាគោលដៅធំ សម្រាប់រដ្ឋាភិបាលថ្មី។ អីចឹង ដើម្បីឱ្យចេញដេប៉ាដោយសុក្រឹត្យភាពតែម្តង គឺខ្ញុំសូម​ផ្អាកការប្រឡងជ្រើសរើសមន្ត្រី ចាប់ពីពេលនេះទៅ រហូតទៅដល់ការរៀបចំគណៈកម្មការ និងយន្តការថ្មី ដែលរៀបចំក្នុងពេលឆាប់ៗខាងមុខ​រួច»៕