ភ្នំពេញ៖ បុរសជនជាតិចិន ២នាក់ទៀត ត្រូវបានចាប់ខ្លួន នៅខេត្តព្រះសីហនុ បន្ទាប់ពី​បុរសខ្មែរ ២នាក់ និងស្ត្រីចិនម្នាក់ ត្រូវបានចាប់ខ្លួន ក្រោយពីឡានបែកកង់ ហើយ​យកថ្នាំញៀនជាង ៤គ.ក ទៅលាក់តុកនៅក្នុងព្រៃជិតនោះ។

កម្លាំងសមត្ថកិច្ចចម្រុះខេត្តកំពង់ស្ពឺ សហការជាមួយ​ខេត្តព្រះសីហនុ បានចាត់វិធានការ បង្ក្រាបបទល្មើសគ្រឿងញៀនឆ្លងខេត្តតាមផ្លូវល្បឿនលឿន ដោយឃាត់ខ្លួន ជនសង្ស័យសរុប ៥នាក់ និងរឹបអូសគ្រឿងញៀន ជាង ៤គីឡូក្រាម។

ជនសង្ស័យ​ទាំង ៥នាក់នោះ គឺ ៣នាក់ ( បុរសខ្មែរ ២នាក់ និងស្ត្រីចិនម្នាក់ ) ត្រូវបានចាប់ឃាត់ខ្លួន នៅលើផ្លូវល្បឿនលឿន នៅចំណុច លើផ្លូវល្បឿនលឿន គីឡូម៉េតលេខ៩៣ ភូមិទី៦ ឃុំយាយ​ម៉ៅពេជ្យនិល ស្រុកភ្នំស្រួច ខេត្តកំពង់ស្ពឺ។ ចំណែកបុរសចិន ២នាក់ទៀត ត្រូវបានចាប់ខ្លួន នៅផ្លូវលេខ១១៥ ភូមិ១ សង្កាត់៣ ក្រុងព្រះសីហនុ ខេត្តព្រះសីហនុ។

ជនសង្ស័យ ទាំង ០៥នាក់នោះ រួមមាន៖ ១-ឈ្មោះ ក្វាង ស៊ូសៀន (KUANG  ZUXIAN) ភេទស្រី ជនជាតិចិន ឆ្នាំកំណើត ឆ្នាំ១៩៩៧។ ២- ឈ្មោះ យ៉ៅ ស៊ីភីង (YAO  XIPING) ភេទប្រុស ជនជាតិចិន ឆ្នាំកំណើត ឆ្នាំ១៩៩៥។ ៣-ឈ្មោះ លី សឺ (LI XU) ភេទប្រុស ជនជាតិចិន ឆ្នាំ កំណើត ឆ្នាំ១៩៩១។ ៤-ឈ្មោះ សឿន សៅរ៍ណារិទ្ធ ភេទប្រុស ជនជាតិខ្មែរ ឆ្នាំកំណើត ឆ្នាំ១៩៩០។ ៥-ឈ្មោះ ហែម សំណាង (HEM SAMNANG) ភេទប្រុស ជនជាតិខ្មែរ ​ឆ្នាំកំណើត ឆ្នាំ១៥ មេសា ឆ្នាំ១៩៨១។

វត្ថុតាង ដែលប៉ូលិសចាប់យក គឺ​សារធាតុញៀនទម្ងន់ ៤គីឡូ ៦.៩៧ក្រាម និងរុក្ខជាតិក្រៀមទម្ងន់ ២០.២៨ក្រាម រួមទាំងកាំភ្លើង​ខ្លី ចំនួន ១ដើម។ ជនសង្ស័យទាំង ៥នាក់ រួមទាំងវត្ថុតាងចាប់យក​ខាងលើ ត្រូវ​បានកសាងសំណុំរឿង បញ្ជូនទៅសាលាដំបូង ខេត្តកំពង់ស្ពឺ ចាត់ការបន្តតាមនីតិវិធី។

សូមរម្លឹកថា កាលពីថ្ងៃទី២ ខែកញ្ញា ឆ្នាំ២០២៣ វេលាម៉ោង ០៤ និង៣៥នាទីល្ងាច នៅលើផ្លូវល្បឿន​លឿនភ្នំពេញ-ព្រះសីហនុ មានរថយន្ត១គ្រឿង បានបែកកង់មុខ រេចង្កូត​បុករនាំងផ្លូវ ហើយទៅមុខលែងរួច។ បុរសជនជាតិខ្មែរម្នាក់ បានហៅទូរសព្ទ ទៅបក្ខពួក ឱ្យបើកឡាន ១គ្រឿងទៀត មកយក បន្ទាប់ពីបុរសនោះ បានយកថង់ខ្មៅ ទៅលាក់ទុកក្នុងព្រៃ​នៅជិតកន្លែងឡានបែកកង់ ក្នុងទិសដៅពីខេត្តព្រះសីហនុ មកភ្នំពេញ។ ប៉ុន្តែរហូតដល់ម៉ោង ៦ និង ៤០នាទី ​ប៉ូលិសចរាចរណ៍ និងសណ្តាប់ធ្នាប់សាធារណៈរបស់​នាយកដ្ឋាននគរបាលចរាចរណ៍ និងសណ្តាប់​​ធ្នាប់​​សាធារណៈ ដែល​ប្រចាំការ នៅគោលដៅផ្លូវល្បឿនលឿនភ្នំពេញ-ព្រះសីហនុ បានឃាត់​ជន​សង្ស័យ ៣នាក់ ( បុរសខ្មែរ ២នាក់ និងស្ត្រីចិនម្នាក់ ) នៅចំនុចផ្លូវល្បឿនលឿន នៅចំណុច k27 (+100) ស្ថិតនៅក្នុងភូមិរំលោង ឃុំវល្លិសស្រុកសំរោងទង ខេត្តកំពង់ស្ពឺ។

​សកម្មភាពរបស់ជនសង្ស័យ នៅកន្លែងឡានបែកកង់ ត្រូវបានថតជាប់ ក្នុងកាំម៉ារ៉ាសុវត្ថិភាព ​ដែលបានបំពាក់ នៅលើផ្លូវល្បឿនលឿន៕