ADផ្ទាំងផ្សព្វផ្សាយពាណិជ្ជកម្ម

រុស្ស៊ីថ្លែងថាអាមេរិកព្យាយាមប៉ែ.ង.ជើ.ងខ្លួ.នឱ្យចាកឆ្ងាយពីតំបន់ឥណ្ឌូ-ប៉ាស៊ីហ្វិក

1 ឆ្នាំ មុន

០៨ ខែ កញ្ញា ឆ្នាំ ២០២៣ ម៉ោង ០៤:៥០

រដ្ឋមន្ត្រីការបរទេសរុស្ស៊ីចោទប្រកាន់ថាអាមេរិកមានបំណងប៉ែងជើងរុស្ស៊ីឱ្យថយឆ្ងាយពីតំបន់ឥណ្ឌូ-ប៉ាស៊ីហ្វិក និងបន្ទច់បង្អាក់ប្រទេសចិនមិនឱ្យកម្រើកខ្លួនរួច។ លោកថ្លែងបែបនេះនៅក្នុងសន្និសីទដែលរៀបចំធ្វើឡើងនៅទីក្រុងដាកា ប្រទេសបង់ក្លាដែស។ លោកសឺហ្កេ ឡាវរ៉ោហ្វ (Sergei Slavrov) ជាប្រមុខការទូតរុស្ស៊ីទី១ដែលបំពេញទស្សនកិច្ចនៅបង់ក្លាដែសចាប់តាំងពីបង់ក្លាដែសទទួលបានឯករាជ្យកាលពីឆ្នាំ១៩៧១។ លោកទៅដល់ទីក្រុងដាកា (Dhaka) រាងល្ងាចបន្តិចទៅហើយ ព្រោះអាល័យតែចូលរួមកិច្ចប្រជុំកំពូលអាស៊ីបូព៌ានៅទីក្រុងហ្សាកាតា ប្រទេសឥណ្ឌូណេស៊ី។

លោកឡាវរ៉ោហ្វថ្លែងថាពួកគេមិនអាចបញ្ឈប់សកម្មភាពត្រឹមនេះទេ។ ផ្ទុយទៅវិញ លោកយល់ថាសកម្មភាពរបស់ពួកគេកាន់តែខ្លាំងឡើងជាលំដាប់។ យើងត្រូវតែត្រៀមខ្លួនទប់ទល់នឹងបញ្ហានេះ។ យើងនឹងសហការគ្នាជាមួយប្រទេសជាដៃគូដទៃទៀតនៅក្នុងតំបន់ដើម្បីទប់ស្កាត់នយោបាយដើរត្រួតត្រាបង្គាប់បញ្ជាប្រទេសដទៃ។ នេះជានយោបាយដែលខ្វាយខ្វល់តែអំពីផលប្រយោជន៍ជាតិរបស់ខ្លួនឯង ហើយគិតតែដើរប្រាប់ប្រទេសដទៃឱ្យធ្វើបែបនេះ ឬបែបនោះទៅតាមចិត្តរបស់ខ្លួន។

ឥឡូវនេះ ទាំងប្រទេសរុស្ស៊ី និងក្រុមបស្ចិមប្រទេសកំពុងជួយប្រទេសបង់ក្លាដែសទៅតាមលទ្ធភាពដែលអាចធ្វើទៅបាន។ បង់ក្លាដែសប្រកាន់គោលជំហរកណ្ដាលនៅក្នុងបញ្ហាអ៊ុយក្រែន មិននិយាយអ្វីប៉ះពាល់រុស្ស៊ី ហើយក៏មិនកាន់ជើងក្រុមបស្ចិមប្រទេស។ ប៉ុន្តែប្រទេសនេះទទួលរងឥទ្ធិពលអាក្រក់ពីសង្គ្រាមអ៊ុយក្រែនដែលធ្វើឱ្យស្បៀងអាហារ និងប្រេងឥន្ធនៈឡើងថ្លៃ។

លោកឡាវរ៉ោហ្វសន្យាថាទោះបីរុស្ស៊ីជួបបញ្ហាលំបាកដោយសារការដាក់ទណ្ឌកម្មពីក្រុមបស្ចិមប្រទេស ប៉ុន្តែរុស្ស៊ីនឹងជួយឱ្យបង់ក្លាដែសស្ថាបនារោងចក្រអគ្គិសនីដែលប្រើថាមពលនុយក្លេអ៊ែរ ឬហៅដោយខ្លីថារោងចក្រនុយក្លេអ៊ែរ។ គម្រោងរបស់បង់ក្លាដែសត្រូវសាងសង់រោងចក្រនេះឱ្យ២។ ឥឡូវនេះសាងសង់ជិតបាន១ហើយ ក្រោមកិច្ចសហការជាមួយក្រុមហ៊ុនរុស្ស៊ី។ គម្រោងនេះចាយថវិកាជាង១២ពាន់លានដុល្លារ។ ៩០%ជាប្រាក់កម្ចីរបស់រុស្ស៊ីដែលត្រូវសងរំលស់រយៈពេល២៨ឆ្នាំ។

តាមពិត រោងចក្រនេះគួរណាស់សាងសង់រួចរាល់តាំងពីយូរមកហើយ។ ប៉ុន្តែដោយសារបញ្ហាកូវីដ១៩ទើបធ្វើឱ្យមានភាពរអាក់រអួល និងពន្យារពេល។ ម៉្យាងទៀត បញ្ហាទណ្ឌកម្មដែលដាក់ទៅលើរុស្ស៊ីក៏មានចំណែកនៅក្នុងការយឺតយ៉ាវនេះផងដែរ។ កាលពីខែធ្នូ ឆ្នាំ២០២២, ដោយសាររុស្ស៊ីទទួលរងទណ្ឌកម្មពីអាមេរិក បង់ក្លាដែសមិនហ៊ានអនុញ្ញាតឱ្យកប៉ាល់របស់រុស្ស៊ី១គ្រឿងចូលចតនៅកំពង់ផែបង់ក្លាដែសទេ។ កប៉ាល់នោះដឹកជញ្ជូនគ្រឿងបរិក្ខារសម្រាប់ដំឡើងរោងចក្រនុយក្លេអ៊ែរ។

រោងចក្រទី១អាចផលិតអគ្គិសនី២ពាន់ ៤រយមេហ្កាវ៉ាត់ និងត្រៀមដាក់ឱ្យដំណើរការចាប់ពីខែកក្កដា ឆ្នាំ២០២៤តទៅ។ ប៉ុន្តែគម្រោងនេះមានបញ្ហាខ្លះៗដោយសារលក្ខខណ្ឌនៃការបង់រំលស់នោះនិយាយមិនទាន់ត្រូវរ៉ូវគ្នានៅឡើយទេ។ មានតែរោងចក្រនុយក្លេអ៊ែរទេដែលជាក្ដីសង្ឃឹមសម្រាប់បង់ក្លាដែសព្រោះប្រទេសនេះមិនអាចស៊ូទ្រាំចំណាយលុយទិញប្រេងយកទៅចាក់ម៉ាស៊ីនភ្លើងសម្រាប់ផលិតអគ្គិសនីបានទេ។ ម៉្យាងទៀត ប្រទេសនេះជួបនឹងវិបត្តិអគ្គិសនីធ្ងន់ធ្ងរកាលពីឆ្នាំ២០១៣ដោយសារបញ្ហាអាកាសធាតុ, បញ្ហាថវិកាសម្រាប់ទិញប្រេងពីក្រៅប្រទេស, ប្រាក់បម្រុងថយចុះ និងតម្លៃសាច់ប្រាក់ចុះថោក។

ក្រៅពីប្រទេសរុស្ស៊ី, ប្រធានាធិបតីបារាំង លោកម៉ាក្រុង ក៏ត្រៀមបំពេញទស្សនកិច្ចនៅបង់ក្លាដែសផងដែរបន្ទាប់ពីលោកចាកចេញពីកិច្ចប្រជុំកំពូលជីម្ភៃ (G20) នៅទីក្រុងញូដេលី ប្រទេសឥណ្ឌា ដែលរៀបចំឡើងចាប់ពីថ្ងៃទី៩ដល់ថ្ងៃទី១០ ខែកញ្ញា។ ទស្សនកិច្ចរបស់លោកម៉ាក្រុងមានគោលដៅពង្រីកទំនាក់ទំនងជាមួយប្រទេសដែលរីកចម្រើនសេដ្ឋកិច្ចឆាប់រហ័ស៕

ប្រភព៖ Reuters
https://www.reutersconnect.com/detail?id=tag%3Areuters.com%2C2023%3Anewsml_RW015707092023RP1%3A6
https://www.reuters.com/world/bangladesh-tackle-nuclear-power-plant-issue-lavrov-visit-officials-2023-09-07/