នៅទីបំផុត ព្រះរាជអាជ្ញាសម្រេចចោទប្រកាន់បុរសវ័យ២៤ឆ្នាំ ឈ្មោះគីមូរ៉ា (Kimura) ដែលជាប់សង្ស័យពីបទគប់គ្រាប់បែកប្រុសសម្រាល់នាយករដ្ឋមន្ត្រីជប៉ុន លោកគីស៊ីដាក់ កាលពីខែមេសា។ នេះបើយោងតាមការបង្ហើបឱ្យដឹងពីអ្នកនាំពាក្យតុលាការសាលាដំបូងនៃសង្កាត់វ៉ាកាយ៉ាម៉ា (Wakayama)។ មុនពេលកើតហេតុ,…
នៅទីបំផុត ព្រះរាជអាជ្ញាសម្រេចចោទប្រកាន់បុរសវ័យ២៤ឆ្នាំ ឈ្មោះគីមូរ៉ា (Kimura) ដែលជាប់សង្ស័យពីបទគប់គ្រាប់បែកប្រុសសម្រាល់នាយករដ្ឋមន្ត្រីជប៉ុន លោកគីស៊ីដាក់ កាលពីខែមេសា។ នេះបើយោងតាមការបង្ហើបឱ្យដឹងពីអ្នកនាំពាក្យតុលាការសាលាដំបូងនៃសង្កាត់វ៉ាកាយ៉ាម៉ា (Wakayama)។
មុនពេលកើតហេតុ, លោកគីស៊ីដាក់ចុះឃោសនារកសំឡេងឆ្នោតនៅក្នុងភូមិអ្នកនេសាទវ៉ាកាយ៉ាម៉ា ស្ថិតនៅប្រទេសជប៉ុនភាគខាងលិច។ ស្រាប់តែបុរសខាងលើបានគប់គ្រាប់បែកបំពង់ (pipe bomb) ដែលគាត់កែច្នៃតម្រង់ទៅលោកគីស៊ីដាក់។ សំណាងល្អ, លោកគីស៊ីដាក់មិនបានរងរបួសអ្វីទាំងអស់។ ប៉ុន្តែមនុស្ស២នាក់រងរបួសស្រាល។ ជនសង្ស័យរូបនេះត្រូវសមត្ថកិច្ចនាំទៅធ្វើតេស្តជាមួយគ្រូពេទ្យវិកលចរិតដើម្បីវាយតម្លៃស្ថានភាពផ្លូវចិត្តរបស់គាត់។ ការធ្វើតេស្តនេះប្រើប្រាស់រយៈពេលបីខែដើម្បីចង់ដឹងឱ្យកំណត់ឱ្យច្បាស់ថាតើបុរសរូបនេះមានសតិគ្រប់គ្រាន់ដើម្បីយកទៅកាត់ទោសនៅតុលាការដែរឬទេ។
ហេតុការណ៍នេះកើតឡើងមិនដល់១ឆ្នាំផងក្រោយការធ្វើឃាតលោកស៊ីនហ្សូអាបេ អតីតនាយករដ្ឋមន្ត្រីជប៉ុន កាលពីខែកក្កដា ឆ្នាំ២០២២។ កាលនោះ លោកអាបេក៏ចុះឃោសនារកសំឡេងឆ្នោតដូចគ្នា។ គ្រាន់តែថាកាលនោះមិនមែនជាការបោះឆ្នោតថ្នាក់ជាតិ។ ប៉ុន្តែជាការបោះឆ្នោតថ្នាក់មូលដ្ឋាន។ ក្រោយការប៉ុនប៉ងធ្វើឃាតនាយករដ្ឋមន្ត្រីជប៉ុននោះ, សមត្ថកិច្ចចុះឆែកឆេរក្នុងផ្ទះជនសង្ស័យ និងរកឃើញរំសេវ រួមជាមួយបំពង់ទីបដែលគេប្រើប្រាស់សម្រាប់ដាក់គ្រឿងផ្ទុះនៅក្នុងនោះ។
ថ្វីដ្បិតមិនបានបង្កគ្រោះថ្នាក់ធ្ងន់ធ្ងរក៏ពិតមែន ក៏ប៉ុន្តែគ្រឿងផ្ទុះដែលប្រើប្រាស់នោះត្រូវសមត្ថកិច្ចជំនាញវិភាគឃើញថាវាអាចសម្លាប់មនុស្សបាន។ ហេតុនេះ, ព្រះរាជអាជ្ញាសម្រេចចោទប្រកាន់គីមូរ៉ាពីបទប៉ុនប៉ងមនុស្សឃាត និងការចោទប្រកាន់ចំនួន៤ករណីផ្សេងទៀត។ នៅក្នុងចំណោមនោះក៏មានការរំលោភបំពានច្បាប់គ្រប់គ្រងអាវុធ-ជាតិផ្ទុះ និងច្បាប់ដទៃទៀត។
ក្រោយការចាប់ខ្លួនរហូតមកដល់ពេលនេះ, ជនជនជាប់ចោទរក្សាភាពស្ងប់ស្ងាត់ និងមិននិយាយស្ដីជាមួយសមត្ថកិច្ចទេ។ គេកត់សម្គាល់ថាបុរសរូបនេះធ្លាប់ដាក់ពាក្យប្ដឹងទៅតុលាការ និងចោទប្រកាន់រដ្ឋាភិបាលជប៉ុនពីការប្រព្រឹត្តកំហុសឆ្គងខ្លះៗ។ មានចំណុច១ដែលគាត់កើតទុក្ខមិនសុខចិត្តចំពោះការកំណត់អាយុសម្រាប់បេក្ខជនដែលចង់ឈរឈ្មោះបោះឆ្នោត។ ឥឡូវនេះ បន្ទាប់ពីព្រះរាជអាជ្ញាចោទប្រកាន់ហើយ គេមិនទាន់កំណត់កាលបរិច្ឆេទដើម្បីជំនុំជម្រះសំណុំរឿងនេះនៅឡើយទេ។
គេគិតថាគាត់ប្រហែលជាមានអារម្មណ៍ខឹងសម្បារយ៉ាងខ្លាំងដែលគាត់មិនអាចមានសិទ្ធិគ្រប់គ្រាន់ដែលកំណត់ដោយច្បាប់ដើម្បីឈរឈ្មោះជាបេក្ខជននាយករដ្ឋមន្ត្រីកាលពីពេលបោះឆ្នោតឆ្នាំ២០២២។ សមត្ថកិច្ចស្រាវជ្រាវឃើញថាកាលពីខែវិច្ឆិកាគាត់បានទៅទិញរំសេវផ្ទុះសម្រាប់កែច្នៃធ្វើជាគ្រាប់បែក។ នៅអំឡុងពេលនោះ, គាត់ដឹងថាគាត់ចាញ់ក្ដីនៅតុលាការពាក់ព័ន្ធនឹងការប្ដឹងតវ៉ាឱ្យរដ្ឋាភិបាលកែប្រែលក្ខន្តិកៈស្ដីពីការឈរឈ្មោះបោះឆ្នោត៕
ប្រភព៖ Channel News Asia និង Associated Press
https://www.channelnewsasia.com/asia/man-charged-throwing-explosive-device-japan-pm-fumio-kishida-3749611
https://apnews.com/article/japan-prime-minister-suspect-indicted-attempted-murder-9146f3d2d1acf4ca1a41551727b27ff1
ចែករំលែកព័តមាននេះ