អេ​ស្ប៉ា​ញ ៖ លោក Jorge Vilda គ្រូបង្វឹក​ក្រុមបាល់ទាត់​ជម្រើសជាតិ​នារី​អេ​ស្ប៉ា​ញ ដែល​ទើបតែ​ឈ្នះ​ពានរង្វាន់​បាល់ទាត់​ពិភពលោក​ឆ្នាំ ២០២៣ (FIFA Women’s World Cup 2023) កាលពី​ខែសីហា កន្លង​ទៅ​ថ្មី​ៗ​នេះ ត្រូវ​បាន​បណ្តេញ​ចេញពី​តំណែង​ហើយ ស្រប​ពេល​តវ៉ា​ប្រឆាំង​ពាក់ព័ន្ធ​នឹង​រឿងអាស្រូវ​របស់​លោក Luis Rubiales ប្រធាន​សហព័ន្ធ​បាល់ទាត់​ប្រទេស​អេ​ស្ប៉ា​ញ ផ្ទុះ​កាន់តែ​ខ្លាំង​ឡើង​។

លោកស្រី Montse Tome នឹង​ត្រូវ​ឡើង​មក​ជំនួស​តំណែង​របស់​លោក Jorge Vilda ដោយ​លោកស្រី​ក្លាយជា​ស្ត្រី​ដំបូង​គេ ដែល​ចូល​កាន់​តំណែង​មួយ​នេះ​។ នៅ​ក្នុង​សេចក្តីថ្លែងការណ៍​មួយ សហព័ន្ធ​អេ​ស្ប៉ា​ញ RFEF មិន​បាន​ផ្តល់​ហេតុផល​ជាក់លាក់​សម្រាប់​ការ​បណ្តេញ​លោក Vilda នោះ​ទេ ដោយ​គ្រាន់តែ​លើក​ឡើង​ថា «​គ្រូបង្វឹក​រូប​នេះ គឺជា​អ្នក​ផ្សព្វផ្សាយ​តម្លៃ​នៃ​ការ​គោរព និង​កីឡា​នៅ​ក្នុង​កីឡាបាល់ទាត់​»​។ ប៉ុន្តែ​ទោះ​យ៉ាងណា​ក៏​ដោយ RFEF ត្រូវ​បាន​គេ​ដឹង​ថា បាន​ស្វែងរក​ការ​បណ្តេញ​គ្រូបង្វឹក​វ័យ​៤២​ឆ្នាំ​រូប​នេះ ដែល​មិត្ត​ដ៏​ជិត​ស្និទ្ធ​របស់​លោក Rubiales តាំងពី​ស​ប្តា​ហ៍​មុន​មក​ម្ល៉េះ​។

លោក Vilda ត្រូវ​បាន​ប្រទះ​ឃើញ​អបអរសាទរ​លោក Rubiales នៅ​ឯ​មហាសន្និបាត​វិសាមញ្ញ​របស់ RFEF កាលពីដើម​ខែសីហា នៅ​ពេល​ដែល Rubiales បាន​ទទូច​ម្តង​ហើយ​ម្តងទៀត​ថា គាត់​នឹង​មិន​លាលែង​ពី​តំណែង​នោះ​ទេ ហើយ​បាន​និយាយ​ថា គាត់​នឹង​ផ្តល់​ឱ្យ Vilda នូវ​កុងត្រា​ថ្មី​មួយ បើ​ទោះបីជា​គ្រូបង្វឹក​រូប​នេះ បាន​រង​ការ​រិះគន់​អំពី​អាកប្បកិរិយា​មិនល្អ​របស់​គាត់​យ៉ាងណា​ក៏​ដោយ​។

លោក Jorge Vilda ដែល​ធ្លាប់​ជា​គ្រូបង្វឹក​ក្រុម​នារី​អេ​ស្ប៉ា​ញ​ឈុត U-17 និង U-19 ត្រូវ​បាន​តែងតាំង​ជា​គ្រូបង្វឹក​ក្រុម​ឈុត​ធំ នៅ​ក្នុង​ឆ្នាំ ២០១៥ ហើយ​ស្នាដៃ​ដ៏​ធំ​របស់​គាត់​គឺ​ការ​ឈ្នះ World Cup 2023 ក្នុង​ចំណោម​ការ​ឈ្នះ​ពានរង្វាន់​២​ផ្សេង​ទៀត​គឺ Algarve Cup និង Cyprus Cup ។

ជ័យជម្នះ​របស់​ក្រុម​នារី​អេ​ស្ប៉ា​ញ ត្រូវ​បាន​គ្របដណ្ដប់​ដោយ​រឿងអាស្រូវ​របស់​លោក Luis Rubiales នៅ​ពេល​ដែល​បរុស​វ័យ​៤៦​ឆ្នាំ​រូប​នេះ បាន​ទៅ​ថើប​មាត់​កីឡាការិនី Jenni Hermoso អំឡុង​ពិធី​បំពាក់​មេដាយ​ដល់​ម្ចាស់​ជើងឯក ខណៈ​ដែល​ក្រោយមក​ខ្សែប្រយុទ្ធ​វ័យ​៣៣​ឆ្នាំ​រូប​នេះ បាន​និយាយ​ថា ការ​ថើប​នោះ​មិនមែន​ជា​ការ​យល់ព្រម​ពី​នាង​នោះ​ទេ​។ ភ្លាម​ៗ ក្រោយ​រឿងអាស្រូវ​នេះ​កើតឡើង បុគ្គលិក​គ្រូបង្វឹក​របស់​លោក Vilda ភាគច្រើន​បាន​លាលែង​ពី​តំណែង ហើយ​កីឡាករ​-​កីឡាការិនី​៨១​នាក់ បាន​បដិសេធ​មិន​លេង​សម្រាប់​ក្រុម​ជម្រើសជាតិ​អេ​ស្ប៉ា​ញ នៅ​ការ​ប្រកួត​បន្ទាប់​។

ទោះ​ផ្ទុះ​មានការ​តវ៉ា​ប្រឆាំង​ពី​សំណាក់​មន្ត្រីជាន់ខ្ពស់ នៃ​រដ្ឋាភិបាល​អេ​ស្ប៉ា​ញ រួម​នឹង​មហាជន​កក្រើក​ប្រទេស​យ៉ាងណា​ក៏​ដោយ ក៏​លោក Rubiales បាន​បដិសេធ​មិន​ព្រម​លាលែង​ពី​តំណែង ប៉ុន្តែ​ត្រូវ​បាន​ព្យួរការងារ​ជា​បណ្តោះអាសន្ន​ដោយ​សហព័ន្ធ​បាល់ទាត់​ពិភព FIFA​។ លោក Pedro Rocha ត្រូវ​តែងតាំង ដើម្បី​កាន់​ការងារ​បណ្តោះអាសន្ន អំឡុង​ពេល​លោក Rubiales ត្រូវ​បាន​ព្យួរការងារ​ដោយ FIFA ៕ (​ប្រភព​ពី BBC)