ខេត្តកំពង់ស្ពឺ ៖ ផឹកស៊ីជាមួយគ្នា ទាស់ពាក្យសម្តីនឹងគ្នា ទប់កំហឹងមិនបាន បុរសម្នាក់ស្ទុះទាញដែកវាយលើបុរសម្នាក់ទៀត បណ្ដាលឲ្យរងរបួស ត្រូវបានសាច់ញាតិដឹកយកទៅព្យាបាលនៅគ្លីនិកមួយកន្លែង ខណៈជនដៃដល់ ត្រូវកម្លាំងនគរបាលឃាត់ខ្លួន…
ខេត្តកំពង់ស្ពឺ ៖ ផឹកស៊ីជាមួយគ្នា ទាស់ពាក្យសម្តីនឹងគ្នា ទប់កំហឹងមិនបាន បុរសម្នាក់ស្ទុះទាញដែកវាយលើបុរសម្នាក់ទៀត បណ្ដាលឲ្យរងរបួស ត្រូវបានសាច់ញាតិដឹកយកទៅព្យាបាលនៅគ្លីនិកមួយកន្លែង ខណៈជនដៃដល់ ត្រូវកម្លាំងនគរបាលឃាត់ខ្លួន ក្រោយព្យាយាមរត់គេច ។
ករណីហិ.ង្សាខាងលើនេះ កើតឡើងកាលពីវេលាម៉ោង១១និង០៥នាទីព្រឹកថ្ងៃទី០៥ ខែកញ្ញា ឆ្នាំ២០២៣ នៅក្នុងភូមិព្រៃរងាង ឃុំទួលសាលា ស្រុកបសេដ្ឋ ខេត្តកំពង់ស្ពឺ ។
បើតាមមន្ត្រីនគរបាលស្រុកបសេដ្ឋ បានប្រាប់ឲ្យដឹងថា ជនដៃដល់ឈ្មោះ ប៊ិន ទិន ភេទប្រុស អាយុ៣៨ឆ្នាំ មុខរបរមិនពិតប្រាកដ រស់នៅភូមិឃុំ កើតហេតុខាងលើ។ ចំណែកឯ ជនរងគ្រោះមានឈ្មោះ ប៉ោ សុខថេង ភេទប្រុស អាយុ៤៤ឆ្នាំ មុខរបរកសិករ រស់នៅក្នុងភូមិឃុំកើតហេតុ រងរបួសត្រង់ត្របកភ្នែក ។
ប្រភពពីនគរបាលស្រុកបសេដ្ឋ បានបន្តថា នៅមុនកើតហេតុ ជនដៃដល់ និងជនរងគ្រោះ បានផឹកស៊ីជាមួយគ្នា ទាស់ពាក្យសម្តីគ្នា ហើយជនដៃដល់ បានកាន់ដែកទីបជ្រុង មានទំហំ១០លី ប្រវែង៨០សង់ទីម៉ែត្រ ទៅវាយលើជនរងគ្រោះ ខណៈដែលជនរងគ្រោះ កំពុងដេកលើគ្រែ ក្នុងសំយ៉ាបផ្ទះរបស់ខ្លួន រួចហើយជនដៃដល់ បានចាប់អាវអូសទំលាក់ពីលើគ្រែ ហើយវាយជាច្រើនដៃ ចំត្របកភ្នែកខាងស្តាំ ថែមទៀត បណ្តាលឲ្យបុរសរងគ្រោះ រងរបួសស្នាមឆូតក្រហម និងហូរឈាមភ្នែក ក្រោយធ្វើសកម្មភាពរួចជនសង្ស័យ បានព្យាយាមរត់គេចខ្លួន។ ពេលឃើញដូច្នោះ សាច់ញាតិក្រុមគ្រួសារ បានដឹកជនរងគ្រោះទៅព្យាបាលនៅក្នុងគ្លីនិកមួយកន្លែង និងបានទៅដាក់ពាក្យបណ្តឹងទៅសមត្ថកិច្ច អោយជួយអន្តរាគមន៍ ។
ក្រោយពីជំនាញទទួលបណ្តឹងពីជនរងគ្រោះ ក៏បានសហការជាមួយប៉ុស្តិ៍នគរបាលរដ្ឋបាលឃុំទួលសាលា ចុះដល់កន្លែងកើតហេតុ និងបានឃាត់ខ្លួនជនសង្ស័យ នាំខ្លួនយកមកសួរនៅអធិការដ្ឋានស្រុកបសេដ្ឋ ។
បើតាមជនដៃដល់ បានឆ្លើយសារភាពថា ខ្លួនពិតជាបានកាន់ដែកទីប វាយលើជនរងគ្រោះ ពិតប្រាកដមែន ។
មន្ត្រីនគរបាលស្រុកបសេដ្ឋ ក៏បានបញ្ជាក់ដែរថា បុរសជាជនដៃដល់ គឺជាមនុស្សញៀនស្រា ផឹកស្រវឹងរាល់ថ្ងៃ ថែមទាំងមានអត្តចរិត កោងកាច និងធ្លាប់បានធ្វើកិច្ចសន្យា នៅប៉ុស្តិ៍នគររដ្ឋបាលឃុំទួសាលា ចំនួន២ដងរួចមកហើយ ប៉ុន្តែបុរសរូបនេះ មិនរាងចាលនោះទេ។
បច្ចុប្បន្ន មន្ត្រីនគរបាលកំពុងកសាងសំណុំរឿងបញ្ជូនទៅអយ្យការអមសាលាដំបូងខេត្ត ចាត់ការបន្តតាមនីតិវិធី៕
ចែករំលែកព័តមាននេះ