អង្គការសេដាកចែកអណ្តូងទឹកស្អាតដល់ប្រជាជននៅស្រុកបាភ្នំ

ថ្ងៃទី ១៥ ខែ ឧសភា ឆ្នាំ ២០១១2011-05-15T09:25:00+00:00
ម៉ោង ០៩:២៥
sara

ខេត្តព្រៃវែង ៖ កាលពីថ្ងៃទី៩ ឧសភា នៅក្នុងបរិវេណការិយាល័យអង្គការសេដាក ស្រុកបាភ្នំមានចែកចាយអណ្តូងស្នប់ចំនួន៣០ដល់ប្រជាជនចំនួន៥០គ្រួសារ នៅក្នុងស្រុកបាភ្នំដែលកំពុងជួបការខ្វះខាតទឹកស្អាតក្នុងការហូបចុក និងស្រោចស្រពផលដំណាំដាំដុះនានា ។

លោកហួរ ស្រេង មន្ត្រីរបស់អង្គការសេដាកនៃកម្មវិធីអភិវឌ្ឍន៍រៀបរាប់ឱ្យដឹងថា កម្មវិធី អភិវឌ្ឍន៍របស់អង្គការសេដាកដែលមានលោកបណ្ឌិតយ៉ង សាំងកុមារ ជាប្រធានតែងខិតខំដឹកនាំកម្មវិធីគ្រប់បែបយ៉ាង ដើម្បីជួយរំដោះគ្រោះអវិជ្ជា ភាពក្រីក្រ និងជាពិសេសគឺកម្មវិធីហូបចុកដែលជាសុខុមាលភាពចម្បងនៃប្រជាជនយើងនៅតាមជនបទដាច់ស្រយាលដែលខ្វះខាតទឹកស្អាតសម្រាប់ហូបចុក និងស្រោចស្រពដំណាំផ្សេងៗ ។ ជាពិសេសនៅខេត្តព្រៃវែងស្រុកបាភ្នំគឺជាតំបន់ខ្វះទឹកបំផុតតាំងពីបុរាណមក ប្រជាជនយើងមិនដែលបានទឹកហូបចុក និងស្រោចស្រពផលដំណាំផ្សេងៗគ្រប់គ្រាន់ទេ ។ ដូច្នេះទាំងមនុស្ស-សត្វឱ្យតែរដូវប្រាំងរីងហួត ស្ងួតប្រេះបែកក្រហែង មនុស្សសត្វក៏ឈឺរីឯដំណាំក៏ងាប់ អង្គការសេដាកកន្លងមក បានចែកចាយអណ្តូងស្នប់ប្រមាណ៣៨៤អណ្តូងស្នប់ដល់ប្រជាជននៅភូមិ-ឃុំដែលកំពុងខ្វះខាតឱ្យមានអណ្តូងប្រើប្រាស់ ដើម្បីរស់នៅមានអនាម័យ និងភាពលូតលាស់ រីកចំរើនផ្នែកផលកសិកម្មដាំដុះនានាមានស្រូវ ឬដំណាំហូបផ្លែមានល្ហុង ចេក ជី ស្លឹកគ្រៃ ឬត្រកួន ត្រប់ ។ល។ ជាលក្ខណៈគ្រួសារធ្វើឱ្យគ្រួសារនីមួយៗលែងព្រួយភ័យនឹងការខ្វះខាតទឹក ។

លោកហួរ ស្រេង បន្តទៀតថា នេះជាលើកទី១២របស់អង្គការសេដាកដែលបានទទួលអំណោយពីលោកកាស៊ូ មីស៊ូ ដែលបានផ្តល់តាមសំណើនៃកម្មវិធីរបស់យើង ។ ដូច្នេះក្នុងលើកទី១២ នេះ កម្មវិធីយើងនាំយកមកផ្តល់ជូនគ្រួសារនីមួយៗ ទទួលបានគឺអណ្តូងស្នប់១ និងដៃកាន់១ កែង១ ស៊ីម៉ង់ត៍១បាវកន្លះ និងប្រដាប់ញ៉ុកមិនឱ្យចូលខ្យល់១ ។
លោកម៉ៅ អ៊ាង អភិបាលស្រុកបាភ្នំបានថ្លែងអំណរគុណចំពោះអង្គការសេដាកដែលមានលោកហួរ ស្រេង ជាមន្ត្រីអភិវឌ្ឍន៍តែងតែនាំយកអំណោយអណ្តូងស្នប់មកផ្តល់ជូនប្រជាជនមូលដ្ឋានរបស់លោកដែលកំពុងមានការខ្វះខាតទឹកប្រើប្រាស់តាមតម្រូវការ ។

លោកអភិបាលស្រុកបានផ្តាំផ្ញើដល់ប្រជាជនដែលបានទទួលអណ្តូងស្នប់ប្រើប្រាស់នេះត្រូវចេះថែទាំ ការពារឱ្យបានល្អ និងឱ្យអ្នកដែលរស់នៅជិតខាងបានប្រើប្រាស់ និងជួយថែរក្សាការពារផង ។ ស្រុកបាភ្នំជាស្រុក ជីកអណ្តូងអត់ចេញទឹកទេនៅតាម ចំណុចខ្លះជុំវិញជើងភ្នំប្រមាណជិតមួយគីឡូម៉ែត្រ ។ ដូច្នេះប្រជាជនប្រើតែទឹកភ្លៀង ឬទឹកប្រឡាយ តែធម្មជាតិមិនទៀងទាត់ពេលខ្លះក្តៅ ខ្លាំងរីងទឹកអាង ឬទឹកប្រឡាយ ដូច្នេះមានតែទឹកអណ្តូងស្នប់ទេ ដែលអាចធានាបាននូវទឹកហូបចុក និងប្រើប្រាស់ ។ លោកអភិបាលស្រុកបញ្ជាក់ទៀតថា ក្នុងកម្មវិធីចែកអណ្តូង នេះមិនមែនចែកឱ្យតែអ្នកខ្វះខាតធម្មតាទេ គឺមានអ្នកផ្ទុកមេរោគអេដស៍២គ្រួសារក៏ទទួលដែរ ដើម្បីជួយដល់ការថែទាំ ផ្នែកសុខភាព ៕