ខេត្តព្រះវិហារ ៖ នៅព្រឹកថ្ងៃទី១២ ឧសភាអង្គភាពខុទ្ទកាល័យសម្ដេចតេជោនាយករដ្ឋមន្ដ្រីហ៊ុន សែន បាននាំយកអំណោយទៅឧបត្ថម្ភដល់អតីតអង្គភាពកងទ័ពការពារព្រំដែនលេខ៤០៤ ចំណុះយោធភូមិភាគទី៤ បច្ចុប្បន្នជាវរៈលេខ៣៧៥ចំណុះកងពលតូចអន្ដរាគមន៍លេខ៧ ដែលជាអង្គភាពសម្ព័ន្ធមេត្រី ។ ពិធីផ្តល់អំណោយនេះបានប្រារព្ធធ្វើក្រោមអធិបតីភាពលោកលឹម លាងសែ នាយករងខុទ្ទកាល័យ សម្ដេចតេជោហ៊ុន សែន ដោយមានការចូលរួមពីនាយទាហាន នាយទាហានរង និងពលទាហានជាច្រើននាក់ដែលកំពុងឈរជើងនៅតំបន់ប្រាសាទព្រះវិហារ ។
លោកវរសេនីយ៍ឯកសែម យោ មេបញ្ជាការវរៈលេខ៣៧៥ បានជម្រាបជូនប្រតិភូអំពីសភាពការណ៍ព្រំដែនចំណុចឈរជើងរបស់វរៈលេខ៣៧៥ នៅលើខ្នងភ្នំដងរែកដែលកន្លងទៅទោះជាសៀមមានមហិច្ឆតាឈ្លានពានទឹកដីខ្មែរយ៉ាងណាក៏ដោយ ក៏នៅតែឈរជើងការពារបានមួយរយភាគរយមិនមឱ្យបាត់បង់ទឹកដីសូម្បីតែមួយមីល្លីម៉ែត្រឡើយ ។ ជំនួសមុខឱ្យនាយទាហាន នាយទាហានរង និងពលទាហានក្នុងវរៈទាំងមូល លោកបានថ្លែងអំណរគុណយ៉ាងជ្រាលជ្រៅចំពោះសម្ដេចតេជោហ៊ុន សែន និងលោកជំទាវបណ្ឌិតដែលគ្រប់ពេលវេលាសម្ដេចនិងលោកជំទាវតែងតែយកចិត្ដទុកដាក់ជួយឧបត្ថម្ភគ្រប់បែបយ៉ាងដល់កងទ័ពនៅជួរមុខនិងគ្រួសារកងទ័ព ។
លោក លឹម លាងសែ ជំនួសមុខឱ្យម្ចាស់អំណោយក្នុងអង្គភាពខុទ្ទកាល័យសម្ដេចតេជោនាយករដ្ឋមន្ដ្រី បានកោតសរសើរដល់នាយទាហាន នាយទាហានរង និងពលទាហានទាំងអស់ ដែលបានតស៊ូយ៉ាងស្វិតស្វាញក្នុងការការពារបូរណភាពទឹកដី ហើយលោកសន្យាថា ក្នុងនាមជាអង្គភាពសម្ព័នមេត្រីភាពគឺនៅតែបន្ដជួយឧបត្ថម្ភដល់វរៈលេខ៣៧៥ជាបន្ដបន្ទាប់ ។
អំណោយដែលបាននាំយកទៅប្រគល់ជូនវរៈលេខ៣៧៥ នាពេលនោះរួមមាន លោកសែមសុវណ្ណនី ឧបត្ថម្ភខោអាវប៉ារ៉ាចំនួន៤៥០ សម្រាប់, មួក៤៥០, ខ្សែប្រឺតែល៤៥០, សាំងទៀរ៉ុង៤៥០, ស្បែកជើងកវែង៤៥០សម្រាប់, អាវភ្លៀង៤៥០។ លោកលី ឈួង ឧបត្ថម្ភមី១០០កេស, លោកស្រីឈីវ ហួរ ឧបត្ថម្ភមី១០០កេស, លោកឧកញ៉ាឡុង ហ៊ឹង ឧបត្ថម្ភឆៃប៉ូវ៣០០ គីឡូក្រាម និងប្រហុក២០០គីឡូក្រាម, លោកវង្សី វិស្សុត ឧបត្ថម្ភខោអាវប៉ារ៉ា៤៥០សម្រាប់ មីយើង១០០កេស ។ លោកវេជ្ជបណ្ឌិត ឌួង សុជាតិ ឧបត្ថម្ភមុងសុវត្ថិភាពចំនួន៤៥០ លោកហ៊ួត ប៊ុនណារី ឧបត្ថម្ភថ្នាំផ្ដាសាយចំនួន៣កេស ។ ខុទ្ទកាល័យសម្ដេចតេជោនាយករដ្ឋមន្ដ្រី ឧបត្ថម្ភស្រាបៀរអង្គរ២៥កេស មាស៊ីនភ្លើងចំនួន៥គ្រឿង ទូរស័ព្ទ៨គ្រឿង អង់តែនទូរទស្សន៍ ឌីធីវីចំនួន៤ប៉ែលត្រាក់ទ័រឈូសដី១សម្រាប់ ត្រីខ១០០កេស ត្រីងៀត៦០០គីឡូក្រាម សាច់ក្រក៥០គីឡូក្រាម ផ្លែឈើកំប៉ុង៦០កេស មីយើង២០០កេស ។
ខុទ្ទកាល័យក៏បានផ្ដល់ជូនទីបញ្ជាការសមរភូមិមុខ ដល់លោកនាយឧត្ដមសេនីយ៍ ជា តារា នូវមាស៊ីនថតវីដេអូ SONY VX 2200E ចំនួន១សម្រាប់ និងម៉ាស៊ីនកុំព្យូទ័រឡេបថបចំនួន១គ្រឿង (កម្រិតRAM 4G) ។ បន្ទាប់ពីមានការឧបត្ថម្ភអំណោយ លោកលឹម លាងសែ ក៏បាននាំប្រតិភូ ឡើងទៅកាន់កំពូលភ្នំដងរែក ក្នុងច្រកតាថាវដើម្បីពិនិត្យមើលលេណដ្ឋានបេតុង ជាអំណោយរបស់ខុទ្ទកាល័យផ្ដល់ជូនវរៈលេខ៣៧៥ កន្លងមក នៅតាមខ្សែត្រៀមជួរមុខដែលបានសាងសង់រួចរាល់ ដែលជាជម្រកដ៏មាន សុវត្ថិភាពពេលប្រយុទ្ធ ៕
ចែករំលែកព័តមាននេះ