ដំណើរជីវិត! Nunes ពីអ្នកដុតនំ ប្រឹងតស៊ូរហូតក្លាយជាខ្សែបម្រើថ្មីក្រុមយក្ស Man City
អង់គ្លេស ៖ Matheus Nunes ពីអ្នកដុតនំម្នាក់ នៅក្នុងទីក្រុងលីសបោន ប្រទេសព័រទុយហ្គាល់ ក្លាយជា
អង់គ្លេស ៖ Matheus Nunes ពីអ្នកដុតនំម្នាក់ នៅក្នុងទីក្រុងលីសបោន ប្រទេសព័រទុយហ្គាល់ ក្លាយជាខ្សែបម្រើថ្មីរបស់ក្រុមមេឃខៀវ Manchester City ។
កើតនៅថ្ងៃទី២៧ ខែសីហា ឆ្នាំ១៩៩៨ ក្នុងតំបន់ក្រីក្រ Campo Grande ទីក្រុងរីយ៉ូដឺចេណេរ៉ូ (Rio de Janeiro) ប្រទេសប្រេស៊ីល ក្មេងប្រុស Matheus Nunes ជួបនឹងជីវិតដ៏ជូរចត់ដោយត្រូវឪពុករត់ចោល ហើយតស៊ូរស់នៅជាមួយនឹងម្តាយ។ Nunes បានផ្លាស់ទៅរស់នៅតំបន់ Ericeira ទីក្រុងលីសបោន ប្រទេសព័រទុយហ្គាល់ នៅអាយុ១២ឆ្នាំជាមួយម្តាយ និងឪពុកចុងជាជនជាតិអង់គ្លេស។ នៅទីនោះ Nunes ចាប់ផ្តើមចូលហ្វឹកហាត់បាល់ទាត់នៅសាលាថ្នាលក្លិប Ericeirense ហើយដើម្បីជួយដល់មុខរបររកស៊ីគ្រួសារ Nunes បានធ្វើការជាអ្នកដុតនំ នៅក្នុងហាងនំប៉័ងឪពុកចុងរបស់គេ ដោយត្រូវងើបពីម៉ោង៥ភ្លឺជារៀងរាល់ថ្ងៃ ដោយក្លាយជាអ្នកដុតនំផង និងជាកីឡាករបាល់ទាត់ផង រហូតដល់ឆ្នាំ ២០១៩។
ជាមួយទេពកោសល្យ បូករួមជាមួយនឹងការខំប្រឹងប្រែងហ្វឹកហាត់ Nunes ត្រូវបានកោះហៅចូលក្រុមឈុតធំរបស់ Ericeirense ក្នុងឆ្នាំ ២០១៦ និងបង្ហាញខ្លួនជាលើកដំបូងក្នុងនាមជាកីឡាករអាជីពជាមួយក្រុមនេះ នៅក្នុងរដូវកាល ២០១៥-១៦។ បន្តមកទៀត Nunes បានចាប់ផ្តើមការប្រកួតមុនបើករដូវកាលនៅក្នុងឆ្នាំ ២០១៧ ដែលជាការធ្វើតេស្តជាមួយក្រុមព័រទុយហ្គាល់មួយទៀតគឺ Oriental ប៉ុន្តែមិនអាចឈានដល់ការចុះកិច្ចព្រមព្រៀងនោះទេ ដោយសារតែបញ្ហារបួសភ្លៅ ដែលធ្វើឱ្យរូបគេត្រូវត្រឡប់មកក្លិបចាស់វិញ និងបន្តលេងដល់ឆ្នាំ ២០១៨ មុនពេលផ្លាស់ទៅចូលរួមជាមួយក្លិបក្នុងស្រុកមួយទៀតគឺ Estoril Praia នៃលីគលំដាប់ទី២ ព័រទុយហ្គាល់។
នៅទីនោះបាន១រដូវកាល Nunes បានអភិវឌ្ឍន៍ខ្លួនកាន់តែខ្លាំង រហូតទទួលការចាប់អារម្មណ៍ពីក្លិប Sporting CP មុនពេលសម្រេចការផ្ទេរក្នុងឆ្នាំ ២០១៩ តម្លៃ ៥០ម៉ឺនអឺរ៉ូជាមួយកុងត្រារយៈពេល៥ឆ្នាំ ដោយត្រូវចាប់ផ្តើមជាមួយក្រុមឈុតអាយុក្រោម២៣ឆ្នាំ មុនពេលត្រូវបានលោក Rúben Amorim កោះហៅចូលក្រុមឈុតធំ នៅខែមិថុនា ឆ្នាំ២០២០ ដោយស៊ុតបញ្ចូលទី ៨គ្រាប់ពីការបង្ហាញខ្លួន ១០១ប្រកួត និងបានឈ្នះជើងឯកលីគកំពូលព័រទុយហ្គាល់ Primeira Liga ១ដង, Portuguese League Cup ២ដង និង Portuguese Super Cup ១ដងផងដែរ។ នៅទីនោះហើយ Nunes ត្រូវបានកោះហៅចូលក្រុមជម្រើសជាតិព័រទុយហ្គាល់ នៅក្នុងឆ្នាំ ២០២១ ដោយគិតមកទល់ពេលនេះ រូបគេបានបង្ហាញខ្លួន ១១ប្រកួតនឹងស៊ុតបញ្ចូលទី១គ្រាប់ផងដែរ។
ដោយសារតែភាពលេចធ្លោនេះហើយ Nunes បានឈានជើងចូលក្នុងលីគកំពូលអង់គ្លេស Premier League ដែលជាលីគបាល់ទាត់ល្បីជាងគេបំផុតរបស់ពិភពលោក នៅថ្ងៃទី១៧ ខែសីហា ឆ្នាំ២០២២ បានសម្រេចចុះហត្ថលេខាកុងត្រារយៈពេល៥ឆ្នាំជាមួយក្លិប Wolves ជាមួយតម្លៃផ្ទេរកំណត់ត្រាក្លិបតម្លៃ ៣៨លានផោន នៅទីនោះ Nunes រកបាន ១គ្រាប់ពីការបង្ហាញខ្លួន ៤១ប្រកួតគ្រប់កម្មវិធី។
សមត្ថភាពរបស់ Nunes បានទាក់ចិត្តរបស់លោក Pep Guardiola អ្នកចាត់ទូទៅក្រុម Man City យ៉ាងខ្លាំង រហូតដល់កំពូលអ្នកចាត់ការសញ្ជាតិអេស្ប៉ាញវ័យ៥២ឆ្នាំរូបនេះ បញ្ចូលក្រុមការងាររបស់លោកតាមដានទម្រង់លេងរបស់ Nunes មុនបើកការចរចាជាមួយក្លិប Wolves រហូតឈានដល់កិច្ចព្រមព្រៀងជាផ្លូវការមួយ នៅក្នុងតម្លៃ ៥៣លានផោន កាលពីថ្ងៃទី០១ ខែកញ្ញា កន្លងទៅថ្មីៗនេះ ដោយខ្សែបម្រើព័រទុយហ្គាល់រូបនេះ បានចុះកុងត្រារយៈពេល៥ឆ្នាំផងដែរ ហើយរូបគេនឹងបង្ហាញខ្លួនសម្រាប់ Man City នៅ Premier League ក្រោយបញ្ចប់ការប្រកួតមិត្តភាពអន្តរជាតិ ឬ FIFA Day៕ (ប្រភពពី Premier League និង The Sun)
ចែករំលែកព័តមាននេះ