រោងចក្រកាត់ដេរសម្លៀកបំពាក់មួយកន្លែង ទើបតែបើកបានជាងមួយខែប៉ុណ្ណោះ ស្រាប់តែថៅកែបង្ខំកម្មករឲ្យធ្វើការបន្ថែមម៉ោង ប៉ុន្តែកម្មករមិនព្រម ក៏
រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា រោងចក្រកាត់ដេរសម្លៀកបំពាក់មួយកន្លែង ទើបតែបើកបានជាងមួយខែប៉ុណ្ណោះ ស្រាប់តែថៅកែបង្ខំកម្មករប្រមាណជាង៤០នាក់ឲ្យធ្វើការបន្ថែមម៉ោង ប៉ុន្តែកម្មករមិនព្រម ក៏ប្តឹងសមត្ថកិច្ចនគរបាលប៉ុស្តិ៍ និងអាជ្ញាធរចុះណែនាំថៅកែភ្លាមៗតែម្ដង បង្កឲ្យមានការភ្ញាក់ផ្អើលកាលពីវេលាម៉ោង៨យប់ ថ្ងៃទី១ ខែកញ្ញា ឆ្នាំ២០២៣ នៅចំណុចរោងចក្រមិនទាន់យីហោ ស្ថិតក្នុងភូមិជម្ពូវ័ន សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ ។
បើតាមប្រភពព័ត៌មានពីកម្មកររោងចក្រកាត់ដេរសម្លៀកបំពាក់ខាងលើ បាននិយាយប្រាប់ឱ្យដឹងថា រោងចក្រនេះ ទើបតែបើកថ្មីបានជាងមួយខែប៉ុណ្ណោះ ហើយមានកម្មករប្រមាណជាង១០០នាក់ ចំណែកថៅកែវិញ គឺជាជនជាតិហ្វីលីពីន និងមិនទាន់មានរដ្ឋបាលនៅឡើយទេ។ រោងចក្រនេះ ចូលធ្វើការនៅវេលាម៉ោង៧ព្រឹកចេញនៅម៉ោង១១ ដើម្បីហូបបាយ ហើយចូលធ្វើការវិញនៅវេលាម៉ោង១២ និងចេញទៅផ្ទះនៅវេលាម៉ោង៦ល្ងាច ។
កម្មករខាងលើ បានបន្តទៀតថា ថៅកែរូបនេះបានអោយពួកគាត់ថែមម៉ោងការងារ ចាប់ពីម៉ោង៦ល្ងាចដល់ម៉ោង៨យប់ ដោយមិនបានអោយពួកគាត់ចេញក្រៅទិញអីហូបនោះទេ។ លុះដល់ម៉ោង៨យប់ ក៏បានអោយពួកគាត់ថែមរហូតដល់ម៉ោង១០យប់បន្តទៀត តែកម្មករមិនព្រម ទើបថៅកែរូបនេះបិទទ្វារបង្ខាំងមិនអោយពួកគាត់ចេញនោះទេ ម្ល៉ោះហើយទើបពួកគាត់សម្រេចចិត្តប្តឹងសមត្ថកិច្ចនគរបាលប៉ុស្តិ៍ និងអាជ្ញាធរ ដើម្បីជួយអន្តរាគមន៍ភ្លាមៗតែម្ដង ហើយក្នុងនោះក៏មានកម្មករជាង៣០នាក់ព្រមថែមម៉ោងតាមថៅកែផងដែរ។
បន្ទាប់ពីកម្លាំងសមត្ថកិច្ចនគរបាលប៉ុស្តិ៍ និងអាជ្ញាធរ បានចុះមកដល់រោងចក្រខាងលើ ឃើញថា រោងចក្រខាងលើនេះ ពិតជាបានបិទទ្វារបង្ខាំងមិនឱ្យកម្មករចេញពិតប្រាកដមែន។ ប៉ុន្ដែពេលដែលសមត្ថកិច្ចទៅដល់ ខាងរោងចក្រក៏បើកទ្វារអោយកម្មករចេញភ្លាមៗផងដែរ។
ក្រោយពេលកើតហេតុ សមត្ថកិច្ចនគរបាលប៉ុស្តិ៍ និងអាជ្ញាធរមូលដ្ឋាន បានធ្វើការណែនាំដល់ថៅកែរោងចក្រ ដែលជាជនជាតិហ្វីលីពីនខាងលើនេះ កុំអោយបង្ខំកម្មករហួសពីកម្លាំងពលកម្ម បើពួកគាត់ព្រមថែមម៉ោង គឺមិនអីទេ៕
ចែករំលែកព័តមាននេះ