ខេត្តពោធិ៍សាត់ ៖ ត្រីគល់រាំងមួយក្បាលទម្ងន់១៩គីឡូក្រាមដែលប្រជាពលរដ្ឋនេសាទ ត្រូវសមត្ថកិច្ចលែងចូលក្នុងបឹងទន្លេសាបវិញ បន្ទាប់ពីអ្នកនេសាទរូបនោះយកមកប្រគល់ជូន ។

លោក ឌុក សុខា ប្រធានសហគមន៍នេសាទស្រីចឹក ឃុំកញ្ជរ ស្រុកកណ្ដៀង បានប្រាប់កោះសន្តិភាពអោយដឹងថា នៅព្រឹកថ្ងៃទី០២ កញ្ញា ឆ្នាំ២០២៣ នោះ ប្រជាពលរដ្ឋឈ្មោះ សាយ រដ្ឋា ភេទប្រុស អាយុ៣៨ឆ្នាំ រស់នៅភូមិតាម៉ៅ ឃុំកញ្ជរ ស្រុកកណ្ដៀង ដាក់លបរ៉ាវ នៅចំណុចពាមព្រែកអន្ទង់វល្លិ៍ ក្នុងដែនសហគមន៍ស្រីចឹកបានត្រីគល់រាំងខាងលើនេះ បានយកមកប្រគល់អោយរូបលោក ហើយរូបលោកក៏បានយកទៅប្រគល់បន្តឱ្យលោក ហុក ម៉េងអាន នាយសង្កាត់រដ្ឋបាលជលផលកណ្ដៀង និងគណៈកម្មការសហគមន៍នេសាទស្រីចឹក ធ្វើពិធីលែងចូលក្នុងបឹងទន្លេសាបវិញ នៅកន្លែងអភិរក្សជលផលឡូត៍លេខ៦ ដែលជាកន្លែងថែរក្សាការពារត្រីមេពូជ ។

លោក ហុក ម៉េងអាន បានអោយដឹងថា កន្លងមកនេះ ប្រជាពលរដ្ឋស្រុកកណ្ដៀង និងស្រុកក្រគរ ធ្លាប់នេសាទបានត្រីគល់រាំងពីរបីដងមកហើយ ដែលខ្លះមានទម្ងន់ដល់ទៅ៨០គក្រក៏មាន ហើយបានយកមកប្រគល់អោយសមត្ថកិច្ចយើងលែងចូលក្នុងបឹងធម្មជាតិទន្លេសាបវិញ។

លោកបញ្ជាក់ថា ត្រីគល់រាំងគឺជាប្រភេទត្រីកម្រ ហើយច្បាប់ជលផលបានហាមដាច់ខាត មិនឱ្យប្រជាពលរដ្ឋណានេសាទបានហើយ យកទៅលក់ដូរឬសម្លាប់ធ្វើម្ហូបនោះទេ ពោលគឺពេលនេសាទបានហើយត្រូវយកមកប្រគល់អោយសមត្ថកិច្ចជលផលលែងចូលក្នុងបឹងធម្មជាតិវិញ បើមិនដូច្នេះទេ នឹងត្រូវមានទោសជាមិនខាន ៕
ចែករំលែកព័តមាននេះ