រដ្ឋមន្ត្រីការពារប្រទេសអ៊ុយក្រែនបដិសេធការចោទថ្មីៗពីរឿងពុករលួយ
សង្គ្រាមនៅអ៊ុយក្រែន ៖ រដ្ឋមន្ត្រីការពារប្រទេសអ៊ុយក្រែនលោកអូឡិចស៊ីអ៊ីរេស្នីកូវ កាលពីថ្ងៃទី២៨
សង្គ្រាមនៅអ៊ុយក្រែន ៖ រដ្ឋមន្ត្រីការពារប្រទេសអ៊ុយក្រែនលោកអូឡិចស៊ីអ៊ីរេស្នីកូវ កាលពីថ្ងៃទី២៨សីហាបានបដិសេធការចោទប្រកាន់ថ្មីៗ ពីរឿងពុករលួយទាក់ទិនការផ្ដល់អាវុធ ដោយបណ្ដាសារព័ត៌មាន បរិហារលើការដាក់តម្លៃខ្ពស់ លើការទិញឯកសណ្ឋានយោធា ក្នុងពេលកំពុងមានការលុកលុយរបស់រុស្ស៊ី។
យោងតាមអត្ថបទស៊ើបអង្កេតរបស់កាសែតអ៊ុយក្រែនជាច្រើនថា ក្រសួងការពារប្រទេសបានចុះហត្ថលេខាកាលពីរដូវស្លឹកឈើជ្រុះឆ្នាំ២០២២ លើកុងត្រាជាមួយសហគ្រាសតួកគី សម្រាប់ការផ្គត់ផ្គង់ឯកសណ្ឋានយោធា ក្នុងតម្លៃគុណនឹង៣ក្រោយការចុះហត្ថលេខានោះមក។ បណ្ដាអ្នកកាសែតអ៊ុយក្រែនក៏ធ្វើការកត់សម្គាល់ដែរថា ឯកសណ្ឋានរដូវរងាសម្រាប់យោធា អាចទិញពីតួកគីក្នុងតម្លៃទាប ជាងខ្ទង់ចំណាយរបស់ក្រសួងការពារប្រទេស។ ម្ចាស់សហគ្រាសនាំចូលឯកសណ្ឋានយោធាមួយ ក្នុងចំណោមសហក្រាសនាំចូលគឺជារបស់លោកអូឡេកសាន់ដ្រេកាស់សៃអ៊ី ក្មួយរបស់ឧត្ដមសេនីយហ្គេនណាឌីកាស់សៃអ៊ី សមាជិកគណបក្សប្រធានាធិបតីលោកវ៉ូឡូឌីមៀរហ្សេឡេនស្គី។
រដ្ឋមន្ត្រីការពារប្រទេសអ៊ុយក្រែន បានបរិហារនាថ្ងៃទី២៨សីហាថា ការចោទប្រកាន់ទាំងនោះ សុទ្ធតែជាការចោទប្រកាន់ខុសដោយលោកអះអាងថា តម្លៃពិតជាសមស្របចំពោះការផ្គត់ផ្គង់របស់បណ្ដាក្រុមហ៊ុនផលិតតួកគី។
នេះជារឿងអាស្រូវពុករលួយលើកទី២ដែលលេចចេញទាក់ទិននឹងការផ្គត់ផ្គង់កងទ័ព ដែល ធ្វើឲ្យរង្គើរដល់ក្រសួងការពារប្រទេសអ៊ុយក្រែន តាំងពីចាប់ផ្ដើមការលុកលុយរបស់រុស្ស៊ីមក។ កាលពីដំណាច់ខែមករា អ្នកទទួលខុសត្រូវជាន់ខ្ព្ស់អ៊ុយក្រែនមួយចំនួន ត្រូវដកហូតចេញពីតំណែង ក្រោយសារព័ត៌មានលាតត្រដាងថា កុងត្រាមួយចុះហត្ថលេខាដោយក្រសួងការពារប្រទេស ទាក់ទិនការទិញផលិតផលស្បៀងសម្រាប់កងទ័ព មានតម្លៃខ្ពស់ជាងតមៃ្លពិត ៕
ចែករំលែកព័តមាននេះ